ខណៈដែលអ្នកលេងហ្វេសប៊ុកមួយចំនួនបានធ្វើការរិះគន់អាជ្ញាធរខេត្តបាត់ដំបង ពីបញ្ហាដីហុយនៅកណ្តាលក្រុងនោះ នៅថ្ងៃនេះ លោកផែង វណ្ណៈ បង្ហោះសារព្រមានទៅអ្នករិះគន់ទាំងនោះថា ឲ្យបញ្ឈប់ការរិះគន់ភ្លាម បើចង់សុខខ្លួន។
លោកផែង វណ្ណៈ បានបង្ហោះសារថា “ជូនបងប្អូននៅខេត្តបាត់ដំបង សំណូមពរបងប្អូននៅខេត្តបាត់ដំបង ដែលកំពុងសរសេររិះគន់ បញ្ហាដីហុយនៅក្រុងបាត់ដំបងនោះ មេត្តាបញ្ឈប់សកម្មភាពរិះគន់តាមហ្វេសប៊ុកទៅ បើចង់សុខខ្លួន។ បើបងប្អូនជាមន្ត្រីរាជការ គួរតែឈប់រិះគន់មុនគេ ប្រយ័ត្នមេអង្គភាពដកចេញពីដំណែង។ ចំណែកប្រជាជន ឬអាជីវករលក់ដូរ ក៏គួរតែឈប់រិះគន់ដែរ ប្រយ័ត្នអាជ្ញាធរគាបសង្កត់ ឬលាបពណ៌ចោទប្រកាន់យ៉ាងនេះ ឬយ៉ាងនោះ ពិបាករកស៊ី។
លោកបន្តថា “នាំគ្នាហៃអើតាមគ្នាទៅ បើឃើញដីហុយ នាំគ្នាសរសើរថា ក្រុងបាត់ដំបងធ្លាក់ព្រឹលស្អាតណាស់ ។ បើឃើញផ្លូវខូច សរសេរថា ផ្លូវរលោងស្អាតណាស់។ សរសេរបែបនេះទើបបងប្អូនបានក្ដីសុខ។ និយាយរួមធ្វើគ ធ្វើថ្លង់ទៅ លេងហ្វេសប៊ុក ចាំតែផុសលើកជើងមេទៅទើបគ្មានបញ្ហា។
លោកវណ្ណៈ បានបន្ថែមថា “ខ្ញុំនិយាយនេះ ព្រោះមិនចង់អោយបងប្អូនមានវាសនាអាក្រក់ដូចខ្ញុំទេ ។ បើបងប្អូននៅតែបន្តរិះគន់បញ្ហាអសកម្មនានាក្នុងខេត្ត មេអង្គភាពរបស់បងប្អូន នឹងរៀបចំឯកសារបណ្ដេញបងប្អូនចេញពីក្របខ័ណ្ឌដូចខ្ញុំជាមិនខាន”។
គួបញ្ជាក់ថា មុនពេលលោកផែង វណ្ណៈ បានចេញសារព្រមានដល់បងប្អូនដែលធ្វើការរិះគន់អាជ្ញាធរខេត្តបាត់ដំបង ដែលបានបណ្តែតបណ្តោយឲ្យផ្លូវក្នុងក្រុងជាច្រើនខូចខាត ដោយមិនមានការថែទាំ ធ្វើឲ្យប្រជពលរដ្ឋដែលធ្វើដំណើរតាមដងផ្លូវហុយដីដូចចុះអ័ព្ទមើលផ្លូវសឹងតែមិនឃើញ៕
អត្ថបទ៖ នគរធំ
