សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានធ្វើការអំពាវនាវ ដល់ក្រុមប្រឹក្សាឃុំ-សង្កាត់ទាំងអស់ ត្រូវគ្រប់គ្រង ចាត់ចែង និងប្រើប្រាស់ឲ្យបានច្បាស់លាស់ បន្ទាប់ពីរដ្ឋ បង្កើនថវិកាសម្រាប់ថ្នាក់មូលដ្ឋាន នាពេលខាងមុខនេះ ស្របតាមគោលការណ៍ និងនីតិវិធី ដែលបានកំណត់ ដើម្បីឆ្លើយតបទៅនឹងបញ្ហាប្រឈម និងតម្រូវ ការចាំបាច់នានា របស់ប្រជាពលរដ្ឋ ក្នុងដែនសមត្ថកិច្ចរបស់ខ្លួន។
នៅក្នុងពិធីបិទមហាសន្និបាត សម្ព័ន្ធភាពជាតិសមាគមក្រុមប្រឹក្សាក្រុង ស្រុក ខណ្ឌ ឃុំ សង្កាត់ (សម្ព័ន្ធភាពជាតិ ក្រុមប្រឹក្សាថ្នាក់មូលដ្ឋាន) នៅព្រឹកថ្ងៃទី២៧ ខែធ្នូ នេះ សម្តេចក្រឡាហោម ស ខេង បានថ្លែងថា រាជរដ្ឋាភិបាល បាន សម្រេចផ្ទេរធនធានបន្ថែម ពីថវិការដ្ឋ ជូនរដ្ឋបាលឃុំ-សង្កាត់នីមួយៗ ដែលនឹងទទួលបានថវិកា សរុបចំនួនជាង១២ម៉ឺន ដុល្លារ ដោយក្នុងនោះ ថវិកាផ្នែកអភិវឌ្ឍន៍មូលដ្ឋាន មានចំនួនជាងប្រាំពីរម៉ឺនដុល្លារ។
សម្តេចក្រឡាហោម បានបញ្ជាក់ថា ថវិកា ដែលបានផ្តល់ជូននេះ គឺបានកើនឡើងទ្វេដងធៀបនឹងឆ្នាំ២០១៩ ហើយថវិកានេះ នឹងកើនឡើងជាបន្តបន្ទាប់រៀងរាល់ឆ្នាំ ដែលរហូតដល់ឆ្នាំ២០២៣ រដ្ឋបាលឃុំ-សង្កាត់នីមួយៗ នឹងទទួល បានថវិកាជាមធ្យម ប្រមាណជិត២០ម៉ឺនដុល្លារ ក្នុងនោះថវិកាសម្រាប់អភិវឌ្ឍន៍មូលដ្ឋាន មានចំនួនជាមធ្យម ប្រមាណជាង ១៣ម៉ឺន ពីរពាន់ដុល្លារ។
សម្តេចក្រឡាហោម ស ខេង បានស្នើដល់សមាគមក្រុមប្រឹក្សាថ្នាក់ក្រោមជាតិ សហការជាមួយក្រសួងស្ថាប័នពាក់ ព័ន្ធ និងរដ្ឋបាលរាជធានី ខេត្ត ក្រុង ស្រុក ខណ្ឌ បន្តផ្តល់ការគាំទ្រផ្នែកបច្ចេកទេស និងការអភិវឌ្ឍសមត្ថភាព ដល់ក្រុម ប្រឹក្សាឃុំ-សង្កាត់ ដើម្បីធានាដល់ការចាត់ចែង និងការប្រើប្រាស់ថវិកាទាំងនេះ ឲ្យបានត្រឹមត្រូវ និងមានប្រសិទ្ធភាពខ្ពស់ បំផុត។
ក្នុងពិធីបើកមហាសន្និបាត កាលពីម្សិលមិញ សម្ព័ន្ធភាពជាតិសមាគមក្រុមប្រឹក្សាក្រុង ស្រុក ខណ្ឌ ឃុំ សង្កាត់ បានរៀបចំមហាសន្និបាតអាណត្តិទី៣ បានជ្រើសរើសលោក សយ កុសល បច្ចុប្បន្ន ជាសមាជិកក្រុមប្រឹក្សាខណ្ឌឫស្សីកែវ ឲ្យ បន្តកាន់តំណែងជាប្រធានសម្រាប់៥ឆ្នាំបន្តទៀត។ លោក សយ កុសល បានជាប់ជាប្រធានសម្ព័ន្ធភាពជាតិ លើកទី១ នៅឆ្នាំ២០០៦ កាលនោះជាសម្ព័ន្ធភាពជាតិឃុំសង្កាត់ និងលើកទី២ ក្នុងឆ្នាំ២០១៤ ជាប្រធានសម្ព័ន្ធភាពជាតិសមាគម ក្រុមប្រឹក្សាក្រុង ស្រុក ខណ្ឌ ឃុំ សង្កាត់។
សម្ព័ន្ធភាពជាតិក្រុមប្រឹក្សាថ្នាក់មូលដ្ឋាន ត្រូវបានបង្កើតឡើង ក្នុងគោលបំណងលើកកម្ពស់ឋានៈ និងសមត្ថភាព របស់ក្រុម ប្រឹក្សាក្រុង ស្រុក ខណ្ឌ ឃុំ សង្កាត់។ ការពារ និងស្វែងរកការគាំទ្រ ដើម្បីជាប្រយោជន៍ និងភាពស្របច្បាប់ជូនដល់សមាជិក លើក កម្ពស់ការចូលរួមអនុវត្តលទ្ធិប្រជាធិបតេយ្យ នៅថ្នាក់មូលដ្ឋាន ឲ្យមានប្រសិទ្ធភាព មាននិរន្តរភាព តម្លាភាព គណនេយ្យភាព និងភាព ជាម្ចាស់ និងកសាងភាពជាដៃគូ ជាមួយក្រសួង ស្ថាប័នពាក់ព័ន្ធ អង្គការជាតិ អន្តរជាតិ ដើម្បីអភិវឌ្ឍមូលដ្ឋាន រួមចំណែក ក្នុងការ ពង្រឹងនីតិរដ្ឋ និងប្រជាធិបតេយ្យ នៅប្រទេសកម្ពុជា៕
អត្ថបទ៖ btv
