លោក លន់ សុភាពអភិបាលរងខេត្តតំណាងលោក ថង សាវុនអភិបាលខេត្តរតនគិរីបានក្រើនរំលឹកដល់មេប៉ុស្តិ៍អន្តោប្រវេសន៍ត្រូវដឹងពីខ្លួនឯងជាស្អីនិងត្រូវធ្វើអ្វី ខ្លះ មិនមែនមកឲ្យអនុវត្តខុសច្បាប់បង្កើតបទល្មើស និងបក្ខពួកដើម្បីប្រមូលប្រយោជន៍នោះទេគឺមករួមគ្នាធ្វើការបង្រ្កាប ទប់ស្កាត់គ្រប់បទល្មើសនានានិងអនុវត្តច្បាប់ឲ្យមានតម្លាភាព។
ការថ្លែងរបស់លោកអភិបាលរងខេត្តរតនគិរីបែបនេះនៅក្នុងពិធីប្រកាសនាយប៉ុស្តិ៍នគរបាលច្រកទ្វារព្រំដែនអន្តរជាតិអូរយ៉ាដាវនៅព្រឹកថ្ងៃទី២៨ ខែធ្នូ ឆ្នាំ២០១៩ ក្រោមអធិបតីភាពនាយឧត្តមសេនីយ៍ ពិន ពិសិដ្ឋ អគ្គនាយករងនៃអគ្គនាយកដ្ឋាននគរបាលអន្តោប្រវេសន៍ក្រសួងមហាផ្ទៃ និងអស់លោក លោកស្រី មន្ត្រីរាជការគ្រប់ ស្ថាប័នពាក់ពន្ធ័ជាច្រើនរូប។
យោងតាមសេចក្តីសម្រេចរបស់ក្រសួងមហាផ្ទៃចុះថ្ងៃទី០៧ ខែធ្នូ ឆ្នាំ២០១៩ដែលចុះហត្ថលេខាដោយ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃបានសម្រេចតែងតាំងលោកវរៈសេនីយ៍ឯក ឃឹម ចិត្រា អតីតនាយប៉ុស្តិ៍នគរបាលច្រកទ្វារអន្តរជាតិប៉ោយប៉ែតមកជានាយប៉ុស្តិ៍នគរបាលច្រកទ្វារអន្តរជាតិអូរយ៉ាដាវជំនួសលោកឧត្តមសេនីយ៍ត្រី អ៊ី ចំរើន ដែលប្រកាសទៅកាន់តំណែងជានាយប៉ុស្តិ៍ច្រកទ្វារអន្តរជាតិប៉ោយប៉ែតវិញ។
នាយឧត្តមសេនីយ៍ ពិន ពិសិដ្ឋ អគ្គនាយករងនៃអគ្គនាយកដ្ឋាននគរបាលអន្តោប្រវេសន៍ បានផ្តាំផ្ញើដោយលើកឡើងថា ចំពោះកិច្ចការងាររបស់នាយប៉ុស្តិ៍ថ្មី ធ្វើយ៉ាងណាត្រូវមានសាមគ្គីភាពផ្ទៃក្នុងនិងសហការជាមួយស្ថាប័ណរដ្ឋនិងឯកជនឲ្យបានល្អនិងសិក្សាពីគ្នារវាងភាគីកម្ពុជានិងវៀតណាមក្នុងនាមជាប្រទេសជាប់ព្រំដែន។ ក្នុងនោះនាយឧត្តមសេនីយ៍បានសំណូមពរដល់គ្រប់ស្ថាប័ណ្ណក្នុងខេត្តសូមមេត្តាផ្តល់កិច្ចសហការរួមគ្នាជាមួយនគរបាលអន្តោប្រវេសន៍ផងដើម្បីសំរួលដល់ការងារជំនាញអន្តោប្រវេសន៍ទទួលបានប្រសិទ្ធិភាពខ្ពស់៕
អត្ថបទ៖ ANN
