ខេត្តកំពង់ចាម៖លោកជំទាវម៉ែន សំអន រដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភានិងអធិការកិច្ច ប្រធានសមាគមនារីកម្ពុជាដើម្បីសន្តិភាពនិងអភិវឌ្ឍន៍បានអះអាងថាប្រជាពលរដ្ឋគ្រប់រូបសុទ្ធតែទទួលផលប្រយោជន៍ជាក់ស្តែងពីការអនុវត្តន៍កម្មវិធីនយោបាយរបស់រដ្ឋាភិបាល
ពិសេសការកែទម្រង់គ្រប់វិស័យ ដែលបានធ្វើឲ្យប្រជាជនគ្រប់ស្រទាប់មានការពេញចិត្តជាអាទិ៍ការតម្លើងបៀវត្សមន្ត្រីរាជការ កងកម្លាំងប្រដាប់អាវុធមន្ត្រីចូលនិវត្តន៍និងអតីតយុទ្ធជនការតម្លើងបៀវត្សកម្មករនិយោជិកការផ្តល់ប្រាក់ឧបត្ថម្ភដល់ស្ត្រីមានផ្ទៃពោះជាកម្មករ និយោជិកការអនុវត្តន៍សន្តិសុខសង្គមផ្នែកសុខុមាលភាពសម្រាប់កម្មករនិយោជិកការពង្រីកសមធម៌មូលនិធិសម្រាប់ជនក្រីក្រការលុបចោលការយកថ្លៃសេវាសាធារណៈនិងការអនុគ្រោះពន្ធមួយចំនួនផងដែរ។
ថ្លែងយ៉ាងដូច្នេះក្នុងអង្គសន្និបាតបូកសរុបលទ្ធផលការងារឆ្នាំ២០១៩និងលើកទិសដៅអនុវត្តន៍បន្តឆ្នាំ២០២០ និងពិធីប្រកាសទទួលស្គាល់ការកែសម្រួល និងបំពេញបន្ថែម សមាសភាពថ្នាក់ដឹកនាំសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្តកំពង់ចាមនាព្រឹកមិញនៅសាលាខេត្តកំពង់ចាម ។
លោកជំទាវបានរំលឹកថាកាលពី៤០ឆ្នាំមុន គឺមានតែការឈឺចាប់ និរាសព្រាត់ប្រាស់ គ្រួសារ ប្រទេសជាតិបានធ្លាក់ដល់ចំណុចសូន្យ ប៉ុន្តែ បច្ចុប្បន្នប្រទេសកម្ពុជា បានប្រែក្លាយពីប្រទេសដែលពោពេញទៅដោយសង្គ្រាម ទៅជាប្រទេសមួយ ដែលមានសន្តិភាព ស្ថិរភាព សុវត្ថិភាព និងការរីកចំរើនគ្រប់វិស័យ ប្រជាជនមានជីវភាពធូរធារជាលំដាប់ និងមានការទទួលស្គាល់ពីសហគមន៍អន្តរជាតិ។
លោកជំទាវបានបន្តថាក្នុងរយៈពេលប៉ុន្មានឆ្នាំចុងក្រោយនេះ កម្ពុជារក្សាបាននូវភាពជោគជ័យក្នុងការអភិវឌ្ឍន៍សេដ្ឋកិច្ច ដោយអាចរក្សាបាននូវកំណើនសេដ្ឋកិច្ចខ្ពស់ប្រហែល ៧%ជាប់ៗគ្នាដូចដែលបានគ្រោងទុកក្នុងផែនការយុទ្ធសាស្រ្តអភិវឌ្ឍន៍ជាតិ។ វិស័យធំៗដែលជាក្បាលម៉ាស៊ីនរុញកំណើនសេដ្ឋកិច្ចដូចជាឧស្សាហកម្មវិស័យវាយណភ័ណ្ឌកាត់ដេរ កសិកម្មទេសចរណ៍ និងសំណង់នៅតែបន្តលូតលាស់ និងរីកចម្រើនយ៉ាងខ្លាំងក្លា ។
លោកជំទាវបានសង្កត់ធ្ងន់ថាដោយសារតែប្រទេសជាតិរក្សាបាននូវកំណើនដ៏ខ្ពស់នេះទើបផ្តល់លទ្ធភាពឲ្យរាជរដ្ឋាភិបាលមានលទ្ធភាព តម្លើងប្រាក់បៀវត្ស ដល់មន្ត្រីរាជការ គ្រូបង្រៀន និងកងកម្លាំងប្រដាប់អាវុធជាបន្តបន្ទាប់។ ស្របទៅនឹងវិធានការកែទម្រង់ថ្មីរបស់រាជរដ្ឋាភិបាល ក្រោមបាវចនា កែទម្រង់ខាងក្នុង កសាងមិត្តខាងក្រៅ ដោយឈរលើមូលដ្ឋានឯករាជ្យ រួមជាមួយនឹងការ អនុវត្តន៍ ឲ្យកាន់តែមានប្រសិទ្ធិភាពនូវអភិក្រមទាំង៥គឺឆ្លុះកញ្ចក់ងូតទឹកដុសក្អែលព្យាបាលនិងវះកាត់ សំដៅកសាងមូលដ្ឋានគ្រឹចាំបាច់ ដើម្បីប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០និងជាប្រទេសមានចំណូលខ្ពស់នៅឆ្នាំ២០៥០ ។
នាឱកាសនោះដែរលោកអ៊ុន ចាន់ដា អភិបាលខេត្តកំពង់ចាម បានសម្តែងនូវការអបអរសាទរចំពោះបងប្អូននារី ដែលត្រូវបានរាជរដ្ឋាភិបាលកម្ពុជា មានសម្តេចតេជោ ហ៊ុន សែន បានដាក់ចេញនូវកម្មវិធីលើកកម្ពស់តម្លៃស្ត្រីខ្មែរ ហើយសង្គមទាំងមូលក៏បានទទួលស្គាល់នូវសមត្ថភាពនិងឧត្តមភាពរបស់ស្ត្រីខ្មែរ ដែលសុទ្ធសឹងតែជាធាតុដ៏សំខាន់ក្នុងការរួមចំណែកធ្វើ ឲ្យមានសុខសន្តិភាពនិងវឌ្ឍនភាពសង្គមយូរអង្វែង៕
អត្ថបទ៖ សៀមរាបប៉ុស្តិ៍
