រថយន្តធំៗចំនួន៨គ្រឿងកំពុងសម្រុកប្រមូលឈើ នៅតាមស្នាក់ការរដ្ឋបាលព្រៃឈើ និងស្នាក់ការបរិស្ថាននៅស្រុកសៀមប៉ាង ខេត្តស្ទឹងត្រែង ដើម្បីត្រៀមដឹកចេញទៅតាមបណ្ដាខេត្តនានា,,,!។ពលរដ្ឋលើកឡើងថា៖ ក្រុមហ៊ុនបានយករថយន្តយីឌុប ចូលដឹកឈើនៅស្រុកសៀមប៉ាង ដោយបានលើកឈើដាក់លើរថយន្ត អស់ហើយដើម្បីត្រៀមដឹកចេញ។
សកម្មភាពនេះបានធ្វើឲ្យឈ្មួញ អ្នករកស៊ីបទល្មើស ជ្រួលនាំគ្នាប្រើរថយន្តតូចធំម៉ូតូសម្រុកដឹកជញ្ជូនឈើចូលសិប្បកម្មនៅក្នុងខេត្តស្ទឹងត្រែង យ៉ាងពេញបន្ទូក។ខណៈជំនាញឆ្លើយតបតែរឿងខាងក្រុមហ៊ុនថា៖ មានច្បាប់អនុញ្ញាតក្នុងការដឹកជញ្ជូនឈើនៅតាមស្នាក់រដ្ឋបាលព្រៃឈើនិងបរិស្ថាន។
តែមិនទាន់បានធ្វើបែបបទដើម្បីអោយរថយន្តដឹកចេញពីស្ទឹងត្រែង នៅឡើយទេ។លោក លៀង សេង ប្រធានមន្ទីរកសិកម្មរុក្ខាប្រមាញ់ និងនេសាទខេត្តស្ទឹងត្រែងបានបញ្ជាក់ថា៖ លោកនៅមិនទាន់ដឹងរបាយការណ៍លម្អិត ពីចំនួនម៉ែត្រគូបឈើត្រូវដឹកចេញនៅឡើយទេ។លោកសុំអោយអ្នកកាសែតសួរទៅខណ្ឌរដ្ឋបាលឈើវិញទើបដឹងច្បាស់ពីរឿងនេះ។
លោក អន ចាន់សុជាតិ នាយខ័ណ្ឌរដ្ឋបាលព្រៃឈើស្ទឹងត្រែងបានបញ្ជាក់ថាលោកកំពុងរង់ចាំមន្រ្តីជំនាញបំពេញបែបបទ ដើម្បីផ្ទៀងផ្ទាត់អនុញ្ញាតអោយក្រុមហ៊ុនប្រមូលឈើដេញថ្លៃ បំពេញបែបបទ។មន្រ្តីរដ្ឋបាលព្រៃឈើបាននិយាយថារថយន្តដឹកឈើក្រុមហ៊ុនទ្រីភាពបានប្រមូលឈើលើកដាក់លើរថយន្តចំនួន៨គ្រឿងហើយនៅស្រុកសៀមប៉ាង។
គេរង់ចាំតែថ្នាក់លើអនុញ្ញាតអោយចេញពេលណា រថយន្តនឹងវិលកង់ភ្លាម។ព្រោះក្រុមហ៊ុនបានប្រមូលឈើនៅតាមផ្នែករដ្ឋបាលព្រៃឈើផ្សេងរួចជាស្រេច។ដោយឡែកបុរសម្នាក់ឈ្មោះផៃ ដែលសមត្ថកិច្ចបង្ហើបថាគឺជាមេការទទួលខុសត្រូវប្រមូលឈើដេញថ្លៃមិនបានបកស្រាយអំពីច្បាប់អនុញាតចំនួនឈើដឹកចេញពីទឹកដីខេត្តស្ទឹងត្រែងនោះទេ។
បុរសនោះបានអោយអ្នកសារព័ត៌មានសួរទៅមន្ទីរកសិកម្មនិងខ័ណ្ឌរដ្ឋបាលព្រៃ។ហើយថែមទាំងប្រើអំណាចក្រុមហ៊ុនមកសម្លុតអ្នកសារព័ត៌មាន ដោយចោទសួររកប្រភពអ្នកផ្តល់លេខទូរស័ព្ទទៅវិញ។មជ្ឈដ្ឋានខាងក្រៅបានលើកឡើងថា៖ គ្រាន់តែឃើញវត្តមានរថយន្តក្រុមហ៊ុន ចូលមកប្រមូលដឹកឈើ នៅតាមស្នាក់ការរដ្ឋបាលព្រៃឈើ និងស្នាក់ការបរិស្ថាននៅស្រុកសៀមប៉ាង ខេត្តស្ទឹងត្រែង នោះភ្លាម។
បទល្មើសព្រៃឈើបានកម្រើកឡើងវិញភ្លាមដែរដោយបន្លំអែបៗនឹងក្រុមហ៊ុន ភាគច្រើន។បទល្មើសទាំងនោះគេដឹកចេញពីស្រុកសៀមប៉ាង តាមរថយន្តតូចៗនិងម៉ូូតូដឹកចូលសិប្បកម្ម ក្នុងខេត្តស្ទឹងត្រែង គ្មានការបង្រ្កាបពីសមត្ថកិច្ចនិងជំនាញឡើយ៕
អត្ថបទ៖ ដើមរាំង
