វៀតណាមបានកំណត់ទិសដៅប្រាក់ចំណូលរបស់ខ្លួនក្នុងការនាំចេញ គឺ ៣០០ ពាន់លានដុល្លារនៅឆ្នាំក្រោយ ទោះបីមានការព្រួយបារម្ភអំពីឱនភាពពាណិជ្ជកម្មចំពេលដែលសេដ្ឋកិច្ចពិភពលោកកំពុងធ្លាក់ចុះក៏ដោយ។
គោលដៅដែលបានប្រកាសដោយនាយករដ្ឋមន្រ្តីង្វៀនសួនភុកនៅក្នុងកិច្ចប្រជុំតាមអ៊ីនធឺណេតជាមួយថ្នាក់ដឹកនាំខេត្តក្រុងកាលពីថ្ងៃចន្ទទី៣០ធ្នូ មានន័យថាការនាំចេញនឹងត្រូវការកើនឡើង ១៣,៨ ភាគរយពីការនាំចេញតម្លៃ ២៦៣,៥ ពាន់លានដុល្លារក្នុងឆ្នាំនេះ ដើម្បីផ្តល់ឱ្យប្រទេសវៀតណាមនូវអតិរេកពាណិជ្ជកម្ម៥ឆ្នាំជាប់គ្នា។
វាអាចមានន័យថា អត្រាកំណើនសេដ្ឋកិច្ចឆ្នាំ២០២០គឺខ្ពស់ជាង ៨ ភាគរយ ដែលបានកត់ត្រាក្នុងឆ្នាំ ២០១៩។
នាយករដ្ឋមន្រ្តីវៀតណាមបាននិយាយថា “បន្ទាប់ពីអំឡុងពេលនៃការឧបត្ថម្ភធន វៀតណាមបានប្រែក្លាយជាអ្នកនាំចេញលើពិភពលោកដ៏សំខាន់មួយ។ ប្រទេសវៀតណាមឥឡូវនេះមានផលិតផលច្រើនហួសប្រមាណ ហើយអាចស្វែងរកទីផ្សារដើម្បីលក់ផលិតផលទាំងនោះបាន”។
ទោះបីជាប្រទេសវៀតណាមនៅឆ្នាំ ២០១៩ បានកត់ត្រាអតិរេកពាណិជ្ជកម្ម៤ឆ្នាំជាប់ៗគ្នាក្នុងទំហំទឹកប្រាក់ ៩,៩៤ ពាន់លានដុល្លារក៏ដោយ ក៏ប៉ុន្តែមន្ត្រីរដ្ឋាភិបាលបារម្ភថាអតិរេកជាប់ៗគ្នានេះនឹងត្រូវខូចដោយសារឱនភាពនៅឆ្នាំក្រោយ។
រដ្ឋមន្រ្តីក្រសួងឧស្សាហកម្មនិងពាណិជ្ជកម្មលោក ត្រឹន តួនអាញ់ បានប្រាប់រដ្ឋសភាកាលពីខែវិច្ឆិកាថាកំណើននៃការនាំចេញនឹងធ្លាក់ចុះមកនៅត្រឹម ៦ទៅ៧ ភាគរយនៅឆ្នាំ ២០២០ ហើយការនាំចូលនឹងកើនឡើងក្នុងអត្រា ៨ទៅ១០ ភាគរយ ហើយអាចនឹងមានឱនភាពពាណិជ្ជកម្មតិចតួច។
ការចូលជាធរមាននៃកិច្ចព្រមព្រៀងពាណិជ្ជកម្មសេរីអឺរ៉ុប-វៀតណាម (EVFTA) និងផលប៉ះពាល់កាន់តែអាក្រក់ឡើងនៃសង្គ្រាមពាណិជ្ជកម្មរវាងសហរដ្ឋអាម៉េរិកនិងចិនអាចនាំឱ្យមានការកើនឡើងនៃការនាំចូលទៅក្នុងប្រទេសវៀតណាមនៅឆ្នាំក្រោយ។ នេះយោងតាមរបាយការណ៍របស់រដ្ឋាភិបាលដែលបានដាក់ជូនទៅរដ្ឋសភា។
នាយករដ្ឋមន្រ្តីភុកទាមទារឱ្យស្ថាប័នរដ្ឋាភិបាលទាំងអស់បង្កើតលក្ខខណ្ឌអំណោយផលសម្រាប់អ្នកនាំចេញនិងបញ្ឈប់រាល់សកម្មភាពការិយាធិបតេយ្យនានា ដែលអាចរារាំងដល់ដំណើរការនេះ។
ដោយលើកឡើងពីករណីនៃការនាំចេញផ្លែស្វាយខណៈស្វាយនាំចេញរបស់វៀតណាមកំណត់ថ្លៃភស្តុភារចំនួន ៥០ ភាគរយលើតម្លៃរបស់វា លោកភុកបានបន្ថែមថា ប្រទេសត្រូវតែកាត់បន្ថយថ្លៃភស្តុភារដើម្បីបង្កើនតម្លៃនាំចេញ៕
អត្ថបទ៖ រស្មីកម្ពុជា
