បុរសជនជាតិវៀតណាមម្នាក់ ត្រូវបានសមត្ថកិច្ចនគរបាលស្រុកពញាឮឃាត់ខ្លួនតាមបណ្ដឹងរបស់ជនរងគ្រោះ កាលពីថ្ងៃទី០១ ខែមករា ឆ្នាំ២០២០ ចោទពីបទគាស់ទម្លុះទម្លាយផ្ទះលួចយកទ្រព្យសម្បត្តិជាច្រើនលើកច្រើនសាបន្តបន្ទាប់គ្នា នៅចំណុចភូមិស្លែងដីដុះ ឃុំព្រែកតាទែន ស្រុកពញាឮ ខេត្តកណ្ដាល។
សមត្ថកិច្ច បានឲ្យដឹងថា ៖ ជន ដែលត្រូវបានចាប់ខ្លួនខាងលើ ឈ្មោះម៉ាប់គង់ ហៅវ៉ាង ភេទប្រុសអាយុ២៦ឆ្នាំ ជនជាតិវៀតណាម មានទីលំនៅភូមិពោធិមង្គល ឃុំព្រែកតាទែន ស្រុកពញាឮខេត្តកណ្ដាល។
លោកវរសេនីយ៍ឯកដួងតេង អធិការ នៃអធិការដ្ឋាននគរបាលខណ្ឌសែនសុខ មានប្រសាសន៍ថា ៖ ជនសង្ស័យខាងលើ ត្រូវប្ដឹងចោទប្រកាន់ ដោយឈ្មោះឌុចសុផលភេទប្រុស អាយុ៥៥ឆ្នាំ មុខរបរលក់ដូរមានទីលំនៅភូមិទួលសង្កែ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ និងមានផ្ទះមួយកន្លែងទៀតនៅចំណុចកើតហេតុខាងលើ។
តាមប្រសាសន៍របស់លោកអធិការ បានឲ្យដឹងថា កាលពីថ្ងៃទី២៩ ខែធ្នូ ឆ្នាំ២០១៩ វេលាម៉ោង១១ព្រឹកនៅពេលដែលគាត់(ជនរងគ្រោះ) ចេញពីផ្ទះនៅទួលសង្កែ មកមើលផ្ទះគាត់មួយផ្សេងទៀត នៅចំណុចកើតហេតុភូមិស្លែងដីដុះ ឃុំព្រែកតាទែន ស្រុកពញាឮ ខេត្តកណ្ដាល ក៏បានប្រទះឃើញផ្ទះរបស់គាត់ ត្រូវរងការទម្លុះទម្លាយបង្អួចចំនួន២ចូលមកលួចយកទ្រព្យសម្បត្តិអស់មួយចំនួន។
នៅថ្ងៃបន្ទាប់ថ្ងៃទី៣០ វេលាម៉ោង៩ព្រឹកគាត់ ក៏បាន ហៅជាងជំនាញផ្នែកបច្ចេកទេសកាមេរ៉ាសុវត្ថិភាពនាំឲ្យមកផ្ទះគាត់ដើម្បីឆែកឆេរម៉ាស៊ីនកាមេរ៉ាសុវត្ថិភាព ដែលបានបំពាក់នៅជុំវិញផ្ទះនោះទើបឃើញស្គាល់មុខភិនភាគចោរនោះ ច្បាស់លាស់ និងបានផ្ដិតយករូបភាពជនសង្ស័យជចោរនោះទុកដើម្បីជាឯកសារយកមកប្ដឹងសមត្ថកិច្ចឲ្យជួយរកយុត្តិធម៌ឲ្យ។
ក្រោយមក១ថ្ងៃទៀតគឺនៅថ្ងៃទី៣១គាត់ ក៏បានមកដាក់ពាក្យ ប្ដឹងនៅទីស្នាក់ការនគរបាលប៉ុស្តិ៍ព្រែកតាទែន ដើម្បីឲ្យជួយអន្តរាគមន៍តាមស្វែងរកជនល្មើសជាចោរតាមរយៈរូបថតនៅជាប់ក្នុងម៉ាស៊ីនកាមេរ៉ាសុវត្ថិភាពនោះ។
នៅថ្ងៃទី០១ ខែមករា ឆ្នាំ២០២០ ប៉ូលិសមូលដ្ឋាន បានរកឃើញជនសង្ស័យខាងលើ ហើយបានមកចាប់ឃាត់ខ្លួនយកមកសួរនាំ និងដោយមានការអនុញ្ញាតពីមន្ត្រីតុលាការលោកឯកស៊ុនរស្មីព្រះរាជអាជ្ញារងអមសាលាដំបូង ខេត្តកណ្ដាលផង បញ្ជាឲ្យចូលឆែកឆេរក្នុងផ្ទះជនសង្ស័យបន្ថែមទៀត ទើបរកឃើញទ្រព្យសម្បត្តិរបស់ជនរងគ្រោះរឹបអូសយកបានមកវិញ ដែលរួមមានទូរទស្សន៍ស៊េរីទំនើបទំហំ៣២អ៊ីង១គ្រឿង និងកញ្ចក់ចំនួន៧ផ្ទាំងយកមប្រគល់ជូនជនរងគ្រោះវិញ។
ជនសង្ស័យរូបនេះ បានសារភាពថា នៅថ្ងៃទី២៧ ខែធ្នូ ឆ្នាំ២០១៩ វេលាម៉ោង៨យប់ខ្លួនបានចូលមកលួចដោះយកកញ្ចក់បង្អួចចំនួន៤ផ្ទាំងដើម្បីទុកធ្វើទូលក់ឲ្យគេ១ថ្ងៃ។ បន្ទាប់ទៀតគឺថ្ងៃទី២៨វេលាម៉ោង២រសៀល ក៏បានចូលមកលួចទៀត ដោយគាស់ទម្លុះបង្អួចចូលទៅលើផ្ទះជនរងគ្រោះលួចដោះយកទូរទស្សន៍ព្យួរនៅជញ្ជាំងដោយប្រើទួរណឺវិសមួលដោះយកមកផ្ទះ។ ក្រោយមកនៅថ្ងៃទី០១ ខែមករា ឆ្នាំ២០២០ ប៉ូលិស បានមកចាប់ខ្លួនតែម្ដង៕
អត្ថបទ៖ កម្ពុជាថ្មី
