យុវជនពីរនាក់ ខណៈជិះម៉ូតូសេ១២៥ ស៊េរី២០២០ មួយគ្រឿង ទើបតែទិញថ្មី ជូន ស្រីស្នេហ៍ ទៅផ្ទះជួល លុះវិលត្រឡប់មកវិញ ត្រូវបានក្រុមចោរ៤នាក់ធាក់ផ្តួលប្លន់យកទៅបាត់ កាលពីវេលាម៉ោង៤និង៣០នាទីទៀបភ្លឺ ព្រឹកថ្ងៃទី០២ ខែមករា ឆ្នាំ២០២០ ចំណុចភ្លើងស្តុបផ្លូវវេងស្រេង កែងផ្លូវទួលពង្រ ភូមិត្រពាំងថ្លឹង៤ សង្កាត់ចោមចៅ១ ខណ្ឌពោធិ៍សែនជ័យ។
ម៉ូតូដែលចោរប្លន់យកទៅបាត់ ម៉ាកហុងដា សេ១២៥ ស៊េរី២០២០ ពណ៌ខ្មៅ ពាក់ស្លាកលេខ ត្បូងឃ្មុំ 1H-8082 មានម្ចាស់ជាជនរងគ្រោះឈ្មោះ មុំ ម៉េងអៀន ភេទប្រុស អាយុ២១ឆ្នាំ មុខរបរបុគ្គលិកកាស៊ីណូ ស្នាក់នៅក្បែរផ្សារស្ទឹងមានជ័យ សង្កាត់ស្ទឹងមានជ័យ ខណ្ឌមានជ័យ មានស្រុកកំណើតភូមិតំណាក់ចារ ឃុំចិញ្ចើម ស្រុកត្បូងឃ្មុំ ខេត្តត្បូងឃ្មុំ។
តាមប្រភពបានឲ្យដឹងថា មុនកើតហេតុ ជនរងគ្រោះ រួមជាមួយមិត្តភក្ដិ ជិះឌុបជូនមិត្តស្រី២នាក់ទៀត សរុបគ្នា៤នាក់ ទៅផ្ទះជួលនៅភូមិអូរដឹម សង្កាត់ចោមចៅ៣ លុះវិលត្រឡប់មកវិញ នៅតែគ្នា២នាក់ ជិះទៅផ្ទះនៅស្ទឹងមានជ័យ ដោយធ្វើដំណើរតាមផ្លូវវេងស្រេង ពីលិចទៅកើត ដល់ចំណុចភ្លើងស្តុប កែងផ្លូវទួលពង្រ ស្រាប់តែលេចមុខជនសង្ស័យ៤នាក់ ជិះម៉ូតូ២គ្រឿង មកដល់ទន្ទឹមគ្នា ធ្វើសកម្មភាពធាក់ បណ្ដាលឲ្យដួល ហើយជនសង្ស័យដែលប្រដាប់ដោយកាំបិតបុ័ងតោ គំរាម លើកយកម៉ូតូជិះគេចទៅបាត់។
ក្រោយកើតហេតុ ជនរងគ្រោះរួមដំណើរជាមួយមិត្តភក្ដិនាំគ្នាទៅដាក់ពាក្យបណ្ដឹងនៅប៉ុស្តិ៍ចោមចៅ១ ដើម្បីឲ្យសមត្ថកិច្ចជួយស្រាវជ្រាវ និងកំណត់មុខសញ្ញាចោរប្លន់ខាងលើ ក្រែងអាចរកឃើញ៕
អត្ថបទ៖ កម្ពុជាថ្មី
