នៅក្នុងឆ្នាំ២០១៩ ចំនួនភ្ញៀវទេសចរបរទេសនិងចំណូលដែលទទួលបានពីការលក់ប័ណ្ណទស្សនាអង្គរ ធ្លាក់ចុះប្រមាណ១៥% ក្នុងនោះភ្ញៀវទេសចរបរទេសសរុបមានចំនួនជាង២លាននាក់ ថយចុះជាង១៤% និងចំណូលពីការលក់ប័ណ្ណទស្សនាអង្គរ សរុបជិត១០០លានដុល្លារ ថយចុះជាង១៥%។
យោងតាមសេចក្តីប្រកាសព័ត៌មានរបស់គ្រឹះស្ថានអង្គរ លេខ០០១គសអ ចុះថ្ងៃពុធ៧កើត ខែបុស្ស ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី០១ ខែមករា ឆ្នាំ២០២០ បានឱ្យដឹងដូចខាងក្រោម ៖
១-ក្នុងខែធ្នូ ឆ្នាំ២០១៩ ចំនួនភ្ញៀវទេសចរបរទេស និងចំណូលដែលទទួលបានពីការលក់ប័ណ្ណចូលទស្សនារមណីយដ្ឋានអង្គរ រួមមាន ៖
-ទេសចរបរទេសទិញប័ណ្ណចូលទស្សនារមណីយដ្ឋានអង្គរ មានចំនួនសរុប២០៨៤៣០នាក់ ប្រៀបធៀបនឹងខែធ្នូ ឆ្នាំ២០១៨ ថយចុះ២២,១៣%។-ចំណូលពីការលក់ប័ណ្ណទស្សនាអង្គរ សរុប៩៥៣៣៤២០ដុល្លារ ប្រៀបធៀបនឹងខែធ្នូ ឆ្នាំ២០១៨ ថយចុះ២១,៣៤%។-ចំណូលឧបត្ថម្ភមូលនិធិគន្ធបុប្ផា សម្រាប់ខែធ្នូ ឆ្នាំ២០១៩ មានចំនួន៤១៦៨៦០ដុល្លារ។២-រយៈពេល១២ខែ ឆ្នាំ២០១៩ ចំនួនភ្ញៀវទេសចរបរទេស និងចំណូលដែលទទួលបានពីការលក់ប័ណ្ណចូលទស្សនារមណីយដ្ឋានអង្គរ រួមមាន ៖-ទេសចរបរទេសទិញប័ណ្ណចូលទស្សនារមណីយដ្ឋានអង្គរ មានចំនួនសរុប២២០៥៦៩៧នាក់ ប្រៀបធៀបរយៈពេលដូចគ្នា ឆ្នាំ២០១៨ ថយចុះ១៤,៨៦%។-ចំណូលពីការលក់ប័ណ្ណទស្សនាអង្គរ សរុប៩៩០៨៨៨៩៤ដុល្លារ ប្រៀបធៀបនឹងរយៈពេលដូចគ្នា ឆ្នាំ២០១៨ ថយចុះ១៥,០៥%។-ចំណូលឧបត្ថម្ភមូលនិធិគន្ធបុប្ផា រយៈពេល១២ខែ ក្នុងឆ្នាំ២០១៩ មានចំនួនសរុប៤៤១១៣៩៤ដុល្លារ។
សូមបញ្ជាក់ថា ចាប់ពីខែកុម្ភៈ ឆ្នាំ២០១៧ មក ប័ណ្ណទស្សនារមណីយដ្ឋានអង្គរ ត្រូវបានដំឡើងថ្លៃ ដោយបែងចែកជា៣ប្រភេទ គឺទី១- ប្រភេទប័ណ្ណចូលទស្សនា១ថ្ងៃ មានតម្លៃ៣៧ ដុល្លារអាមេរិក។ ទី២-ប្រភេទប័ណ្ណចូលទស្សនា៣ថ្ងៃ មានតម្លៃ៦២ដុល្លារអាមេរិក និងមានសុពលភាព១០ថ្ងៃ និងទី៣-ប្រភេទប័ណ្ណចូលទស្សនា ៧ថ្ងៃ មានតម្លៃ៧២ដុល្លារអាមេរិក និងមានសុពលភាព១ខែ។
ជាមួយនេះ ចំណូលពីការលក់ប័ណ្ណចូលទស្សនារមណីយដ្ឋានអង្គរ ត្រូវបានកាត់ចំនួន២ដុល្លារ ក្នុង១ប័ណ្ណ សម្រាប់ផ្តល់ជូនមូលនិធិមន្ទីរពេទ្យគន្ធបុប្ផា។
គួររំលឹកថា កាលពីឆ្នាំ២០១៧ ភ្ញៀវទេសចរបរទេសដែលបានទិញប័ណ្ណទស្សនារមណីយដ្ឋានអង្គរ មានចំនួន២៤៥៧០២៣នាក់ កើនឡើង១១,៨២% ធៀបទៅនឹងឆ្នាំ២០១៦ និងចំណូលពីការលក់ប័ណ្ណទស្សនារមណីយដ្ឋានអង្គរ ឆ្នាំ២០១៧ មានចំនួន១០៧៩៧៦៤៣៩ដុល្លារអាមេរិក កើនឡើង ៧២,៥៤% ធៀបទៅនឹងឆ្នាំ២០១៦ ។
ចំណែកនៅក្នុងឆ្នាំ២០១៨ ភ្ញៀវទេសចរបរទេសទស្សនារមណីយដ្ឋានអង្គរ មានចំនួនសរុប២៥៩០៨១៥នាក់ ប្រៀបធៀបនឹងរយៈពេលដូចគ្នាឆ្នាំ២០១៧ កើន៥,៤៥% និងចំណូលដែលទទួលបានពីការលក់ប័ណ្ណចូលទស្សនារមណីយដ្ឋានអង្គរ មានចំនួនសរុប១១៦៦៤៦៦៨៥ដុល្លារ ប្រៀបធៀបនឹងរយៈពេលដូចគ្នា ឆ្នាំ២០១៧ កើន៨,០៣%។
ដោយឡែក ចំណូលឧបត្ថម្ភមូលនិធិមន្ទីរពេទ្យគន្ធបុប្ផា រយៈពេល១២ខែ ក្នុងឆ្នាំ២០១៨ មានចំនួនសរុប៥១៨១៦៣០ដុល្លារ៕
អត្ថបទ៖ នគរធំ
