សហភាពសហជីពកម្ពុជា បានប្រមូលស្នាមមេដៃពីសមាជិក និងកម្មករកម្មការិនីជាង១ពាន់មេដៃ ដើម្បីដាក់ជូនលោកនាយករដ្ឋមន្រ្តី ហ៊ុន សែន ស្នើសុំឱ្យធ្វើតាមសំណើសហភាពអឺរ៉ុប រក្សាប្រព័ន្ធអនុគ្រោះពន្ធ EBA ដោយសារព្រួយបារម្ភថា បើបាត់បង់ប្រព័ន្ធអនុគ្រោះពន្ធ EBA នោះ GSP របស់សហរដ្ឋអាមេរិក ក៏បាត់បង់ដែរ ហើយនឹងធ្វើប៉ះពាល់ដល់ជីវភាពប្រជាពលរដ្ឋ ជាពិសេសកម្មករកម្មការិនី និងក្រុមគ្រួសាររបស់ពួកគេ។
លោក រ៉ុង ឈុន ប្រធានសហភាពសហជីពកម្ពុជា បានលើកឡើងក្នុងសន្និសិទសារព័ត៌មាន នាព្រឹកថ្ងៃទី០៣ ខែមករា ឆ្នាំ២០២០ ថា ស្នាមមេដៃដែលប្រមូលបានពីសមាជិក សមាជិកា របស់សហភាពសហជីពកម្ពុជា និងកម្មករកម្មការិនី ១៣៧៩មេដៃ នឹងយកទៅដាក់ជូនលោក ហ៊ុន សែន នាយករដ្ឋមន្ត្រី នៅថ្ងៃនេះ ដើម្បីអំពាវនាវឱ្យលោកនាយករដ្ឋមន្ត្រី អនុវត្តតាមសំណើ របស់សហភាពអឺរ៉ុប ដែលស្នើឱ្យរាជរដ្ឋាកម្ពុជា បើកចំហប្រព័ន្ធនយោបាយនៅប្រទេសកម្ពុជា ឱ្យមានលក្ខណៈទូលំទូលាយដូចមុនថ្ងៃបោះឆ្នោតក្រុមប្រឹក្សាឃុំ សង្កាត់ ឆ្នាំ២០១៧ ដើម្បីពង្រឹលទ្ធិប្រជាធិបតេយ្យ និងធានាការគោរពសិទ្ធិសេរីភាពសម្រាប់ប្រជាពលរដ្ឋ ក្នុងគ្រប់វិស័យ ជាពិសេសវិស័យការងារ និងសិទ្ធិសេរីភាពសហជីព។
ទន្ទឹមនឹងនេះ ប្រធានសហភាពសហជីពកម្ពុជារូបនេះ បានបញ្ជាក់ថា សំណើរបស់សហភាពអឺរ៉ុប មិនមែនជារឿងធ្ងន់ធ្ងរអ្វីនោះទេ។ មិនមែនជារឿងធ្ងន់ធ្ងរ ដោយលោកអះអាថា សហភាពអឺរ៉ុប គ្រាន់តែចង់ឱ្យស្ថានភាពសិទ្ធិមនុស្សល្អប្រសើរឡើងវិញ ធ្វើឱ្យប្រលទ្ធិប្រជាធិបតេយ្យល្អប្រសើរឡើងវិញ ដោះលែងលោក កឹម សុខា ប្រធានអតីតគណបក្សសង្គ្រោះជាតិ ឱ្យមានសេរីភាពឡើងវិញ ព្រមទាំងលើកលែងការចោទប្រកាន់ទៅលើលោក សម រង្ស៊ី អតីតប្រធានអតីតគណបក្សសង្គ្រោះជាតិ នោះអ្វីនឹងល្អប្រសើរ ហើយអាចរក្សាបានប្រព័ន្ធអនុគ្រោះពន្ធ EBA របស់សហភាពអឺរ៉ុបផងដែរ
ប៉ុន្តែយ៉ាងណាក៏ដោយពាក់ព័ន្ធសំណើរបស់សហភាពអឺរ៉ុបនេះ លោកនាយករដ្ឋមន្ត្រី ហ៊ុន សែន ធ្លាប់បានបញ្ជាក់ជាបន្តបន្ទាប់ម្ដងជាពីរដងរួចមកហើយថា កម្ពុជាមិនអាចយកអធិបតេយ្យភាពរបស់ខ្លួន ទៅដោះដូរអ្វីដែលបរទេសបង្គាប់បញ្ជានោះទេ។ លោក ហ៊ុន សែន ថែមទាំងនិយាយថា ទោះជាគ្មានប្រព័ន្ធអនុគ្រោះពន្ធអ្វីៗទាំងអស់លើកលែងតែអាវុធ (EBA) ដែលផ្តល់ដោយសហគមន៍អឺរ៉ុប ក៏កម្ពុជាមិនបានពិបាករហូតដល់លៀនអណ្តាតនោះឡើយ ហើយប្រាក់បៀវត្សមន្ត្រីរាជការខ្មែរ ក៏មិនបានមកពី EBA របស់សហភាពអឺរ៉ុបនោះដែរ។
គួរបញ្ជាក់ផងដែរថា កាលពីពេលថ្មីៗនេះ តាមរយៈបណ្តាញសង្គមតេឡេក្រាម (Telegram) លោក សុខ ឥសាន អ្នកនាំពាក្យគណបក្សប្រជាជនកម្ពុជា បានលើកឡើងថា អ្នកតាំងខ្លួនថា ព្រួយបារម្ភពីការបាត់ EBA គឺកំពុងបំភិតបំភ័យសង្គម និង ចង់បំផ្លាញសន្តិភាពនៅកម្ពុជា។ លោក សុខ ឥសាន ថែមទាំងបញ្ជាក់ទៀតថា អ្នកដែលដកប្រព័ន្ធEBA ពីកម្ពុជាគឺជាអ្នករំលោភសិទ្ធិមនុស្សលើកម្មករនិយោជិតកម្ពុជា និងប្រជាជនកម្ពុជា ដែលរងផលប៉ះពាល់ផងដែរ។
សម្រាប់លោក រ៉ុង ឈុន ប្រធានសហភាពសហជីពកម្ពុជាវិញ បានចាត់ទុកការលើកឡើងរបស់លោក សុខ ឥសាន ខាងលើនេះ វាមិនមែនដូច្នេះទេ អ្នកដែលព្រួយបារម្ភពីការខ្លាចបាត់បង់ប្រព័ន្ធអនុគ្រោះពន្ធ EBA របស់សហភាពអឺរ៉ុប គឺជាអ្នកចូលរួមការពារសន្តិភាពទៅវិញទេ ព្រោះបើបាត់បង់ប្រព័ន្ធអនុគ្រោះពន្ធ EBA ធ្វើឱ្យអស្ថេរភាពសង្គម អសន្តិសុខសង្គម នឹងកើតឡើង នៅពេលដែលកម្មករកម្មការិនី បាត់បង់ការងារធ្វើ ប្រជាពលរដ្ឋបាត់បង់ចំណូលជាដើម៕
អត្ថបទ៖ វាយោ
