មន្ទីរវប្បធម៌និងវិចិត្រសិល្បៈខេត្តកំពង់ឆ្នាំង បានប្រតិកម្មទៅនិងការវាយកម្ទេចចោលនូវអគារបុរាណមានអាយុកាលជិត ៧០ឆ្នាំ ពីគណៈកម្មការអាចារ្យ ក៏ដូចជា ចៅអធិការវត្តទេពធីតារាម ហៅវត្តយាយទេព ដោយពុំមានការសុំច្បាប់អនុញ្ញាត។
យ៉ាងនេះក្តីការប្រតិកម្មបែបនេះហាក់យឺតពេលទៅហើយ គ្រាដែលអគារបុរាណនោះបានបាក់រាបដល់ដីហើយពេលនេះកំពុងកសាងអគារថ្មីឈានដល់ការចាក់គ្រឹះនឹងឡើងសសរ ជាបណ្ដើរៗហើយដែរ។
លោក សុខ ធួក ប្រធានមន្ទីរវប្បធម៌និងវិចិត្រសិល្បៈខេត្តកំពង់ឆ្នាំង បានអោយដឹងនៅរសៀលថ្ងៃទី៣ ខែមករា ឆ្នាំ២០២០នេះថា លោកទើបតែនឹងទទួលព័ត៌មាននៅព្រឹកថ្ងៃទី២ខែមករានេះទេ ដោយសារតែជាប់រវល់ភារកិច្ចច្រើនហើយបើដឹងពីដើមទីមកលោកក៏នឹងឃាត់ភ្លាមៗដែរ។ប៉ុន្តែទោះជាយ៉ាងនេះក្តី នៅព្រឹកថ្ងៃទី ២ ខែមករា នេះ លោកក៏បានចុះទៅធ្វើកំណត់ហេតុមានសមត្ថកិច្ចនិងអាជ្ញាធរផងដែរ។
លោកប្រធានមន្ទីរបានបញ្ជាក់ថាអគារធម្មមន្ទីរនៅក្នុងវត្តទេពធីតារាមហៅវត្តយាយទេពកសាងឡើងនៅឆ្នាំ១៩៥០ និងសម្ពោធដាក់ឲ្យប្រើប្រាស់ជាផ្លូវការនៅឆ្នាំ១៩៥១ ដែលគិតមកដល់ពេលនេះមានអាយុកាល៦៩ឆ្នាំទៅហើយ។ក្នុងច្បាប់ស្តីពីបេតិកភណ្ឌជាតិអគារឬសំណង់បុរាណដែលមានចំណាស់អាយុចាប់ពី៥០ឆ្នាំឡើងទៅជាសម្បត្តិបេតិកភណ្ឌជាតិ។ជាក់ស្ដែងដូចជាសសរស្ពាននៅខេត្តបាត់ដំបងដែលអភិបាលខេត្តសំណូមពរវាយកំទេចចោលកសាងថ្មីនោះ ត្រូវបានរដ្ឋមន្ត្រីក្រសួងវប្បធម៌និងវិចិត្រសិល្បៈធ្វើការជំទាស់ព្រមទាំងប្រមុខរាជរដ្ឋាភិបាលក៏មិនអនុញ្ញាតផងដែរ តែឲ្យធ្វើស្ពានថ្មីនៅជិតនោះ។ សម្រាប់អគារធម្មមន្ទីរនៅក្នុងវត្តទេពធីតារាមនេះ ពេលមានការវាយកម្ទេចចោលមិនបានសុំច្បាប់ការអនុញ្ញាតនោះទេ គឺគ្មានទាំងអស់។
ជុំវិញបញ្ហានេះគណៈកម្មការអាចារ្យវត្តក៏ដូចជាចៅអធិការវត្តទេពធីតារាមហៅវត្តយាយទេព មិនអាចសុំការបំភ្លឺបានទេ ក៏ប៉ុន្តែយោងតាមតាមប្រសាសាន៍របស់ប្រធានមន្ទីរវប្បធម៌និងវិចិត្រសិល្បៈដែលបានដកស្រង់សំដីចៅអធិការ ក៏ដូចជាគណៈកម្មការវត្តបានឱ្យដឹងថាអគារនោះមានសភាពចាស់ទ្រុឌទ្រោមណាស់ទៅហើយម្យ៉ាងវិញទៀតមិនមានភិក្ខុ ឬពុទ្ធបរិស័ទណាហ៊ានចូលទៅស្នាក់នៅនោះឡើយ។
ដោយឡែកយោងតាមបណ្ដាញសង្គមក៏បានប្រតិកម្មទៅនឹងការវាយកម្ទេចអគារចាស់បុរាណរបស់វត្តទេពធីតារាមនោះច្រើនដែរ ដោយលើកហេតុផលផ្សេងៗ៕
អត្ថបទ៖ ANN
