គណៈកម្មាធិការអន្តររដ្ឋាភិបាលវៀតណាម-ឡាវ ប្តេជ្ញាក្នុងឆ្នាំថ្មីដើមឆ្នាំ២០២០នេះ ក្នុងការពង្រឹងចំណងមិត្តភាពបន្ថែមទៀតលើគ្រប់វិស័យ បង្កើនការជឿជាក់លើគ្នាទៅវិញទៅមកដែលហៅថា មហាមិត្ត។
នាយករដ្ឋមន្ត្រីឡាវ លោក Thongloun Sisoulith បានដឹកនាំមន្ត្រីជាន់ខ្ពស់ធ្វើដំណើរទៅកាន់ទីក្រុងហាណូយប្រទេសវៀតណាម ដើម្បីចូលរួមប្រជុំប្រចាំឆ្នាំគណៈកម្មាធិការអន្តររដ្ឋាភិបាលវៀតណាម-ឡាវ ចាប់ពីថ្ងៃទី២ ដល់ថ្ងៃទី៤ ខែមករា ឆ្នាំ២០២០។
តាមការចុះផ្សាយរបស់ទីភ្នាក់ងារសារព័ត៌មានវៀតណាមបង្ហាញថា រដ្ឋាភិបាលនៃប្រទេសទាំងពីរបានចុះហត្ថលេខាកិច្ចព្រមព្រៀងសំខាន់ៗជាច្រើន ដោយផ្តោតលើការពង្រឹងកិច្ចសហប្រតិបត្តិការនៃប្រទេសទាំងពីរឱ្យកាន់តែរឹងមាំឡើងថែមមួយកម្រិតទៀត។
គណៈកម្មាធិការដែលមានអាយុ៤២ឆ្នាំរវាងប្រទេសវៀតណាម និងប្រទេសឡាវនេះ កើតឡើងក្រោមការផ្តួចផ្តើមរបស់អតីតប្រធានាធិបតីវៀតណាម លោក ហូ ជីមិញ។
នៅក្នុងអត្ថបទរបស់ទីភ្នាក់ងារព័ត៌មានវៀតណាមនេះ បានបញ្ជាក់ថា ចាប់តាំងពីប្រទេសទាំងពីរសហការចងមិត្តភាពស្និទ្ធស្នាលជាមួយគ្នាមក គឺទទួលបានការរីកចម្រើនឥតឈប់ឈរ ហើយជួយការពារគ្នាទៅវិញទៅមក។
មុនពេលឈានដល់ការប្រជុំប្រចាំឆ្នាំរវាងថ្នាក់ដឹកនាំកំពូលនេះ មន្ត្រីជាន់ខ្ពស់នៃប្រទេសទាំងពីរ ចំនួន១២០រូបក្នុងនោះ៦០រូបជាអនុរដ្ឋមន្ត្រី បានផ្លាស់ប្តូរដំណើរទស្សនកិច្ចរវាងគ្នាទៅវិញទៅមក តាំងពីចុងខែសីហាឆ្នាំមុនដើម្បីរៀបចំរបាយការណ៍។
កិច្ចសហការចំនួន៣ដែលលេចធ្លោក្នុងការលើកឡើងមកជជែកពេលនេះគឺ កិច្ចការពារប្រទេស ការពារសន្តិសុខផ្ទៃក្នុង និងកិច្ចការការបរទេសរវាងប្រទេសទាំង២ និងអន្តរជាតិ។ ក្នុងចំណុចទាំង៣នេះ ប្រទេសទាំង២បានបន្ថែមចំណុចខ្លះដើម្បីបំពេញបន្ថែមលើផែនការ៥ឆ្នាំ នៃកិច្ចការពារសន្តិសុខ ជួយគ្នាទៅវិញទៅមក ដើម្បីធានាស្ថិរភាពនយោបាយ សន្តិសុខ និងសណ្ដាប់ធ្នាប់សង្គម រួមទាំងកិច្ចព្រមព្រៀងត្រួតពិនិត្យនៅតាមព្រំដែននៃប្រទេសទាំងពីរ។
នៅឆ្នាំ២០២០នេះ វៀតណាមបានបើកវគ្គបណ្ដុះបណ្ដាលវគ្គខ្លីចំនួន២៤ សម្រាប់ជួយបណ្ដុះបណ្ដាលពង្រឹងជំនាញផ្សេងៗគ្នាដល់គ្រូបង្គោលឡាវចំនួន៤៩៧រូប ហើយវៀតណាមក៏បានបញ្ជូនគ្រូភាសាវៀតណាមចំនួន២៨រូប ទៅជួយបង្រៀនតាមស្ថាប័នបណ្ដុះបណ្ដាលតំបន់ផ្សេងៗគ្នានៅក្នុងប្រទេសឡាវ។
បើនិយាយពីដៃគូពាណិជ្ជកម្មគឺតម្លៃនៃការដោះដូរទំនិញរវាងប្រទេសទាំងពីរ គិតពីខែមករាដល់ខែតុលា ឆ្នាំ២០១៩ មាន៩៤០លានដុល្លារ។ វៀតណាមជាដៃគូពាណិជ្ជកម្មធំលំដាប់ទី៣ របស់ឡាវ បន្ទាប់ពីថៃ និងចិន៕
អត្ថបទ៖ VOD
