លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួង ទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានថ្លែងថា អរគុណសន្តិភាព ដែល ធ្វើឲ្យវិស័យឯកជន បានចូលរួមចំណែកអភិវឌ្ឍន៍រីកចម្រើនជាមួយរដ្ឋាភិបាល ដែលមានសម្តេចតេជោ ជានាយករដ្ឋមន្ត្រី។
លោកជំទាវកិត្តសង្គហបណ្ឌិត ម៉ែន សំអនថ្លែងបែបនេះ ខណៈអញ្ជើញជាអធិបតីក្នុងពិធី បើកការដ្ឋានសម្ពោធផ្លូវបេតុងប្រវែង ១.១១០ម ចំណាយថវិកាអស់ ១២៥.៧៩០ដុល្លារ (មួយរយម្ភៃប្រាំពាន់ប្រាំពីររយកៅសិបដុល្លារ) តភ្ជាប់ពីវិទ្យាល័យ ហ៊ុន សែន សាមគ្គីដូនស ទៅដល់វត្តល្ងើនស្ថិតក្នុងឃុំដូនស ស្រុកស្វាយជ្រំ ខេត្តស្វាយរៀង នាព្រឹកថ្ងៃសៅរ៍ ១០កើត ខែបុស្ស ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៤ ខែមករា ឆ្នាំ២០២០។
ថ្លែងក្នុងឱកាសនោះ លោកជំទាវកិត្តិសង្គហបណ្ឌិត ម៉ែន សំអនក៏បាន ពាំនាំនូវការផ្តាំផ្ញើសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនដល់អង្គពិធី។
លោកជំទាវកិត្តិសង្គហបណ្ឌិត ម៉ែន សំអន ក៏បាន អរគុណសន្តិភាព មានសន្តិភាព ជាឱកាសពេជ្រដែលធ្វើឲ្យប្រជាពលរដ្ឋខ្មែរបានជួបជុំគ្នាសប្បាយរីករាយ និងមានការអភិវឌ្ឍដូចដែលយើងឃើញផ្ទាល់ភ្នែកនៅខេត្តស្វាយរៀង និងបានអំពាវនាវឲ្យប្រជាពលរដ្ឋចូលរួមថែរក្សាសន្តិភាពបច្ចុប្បន្ន ដើម្បីពន្លឿនវឌ្ឍនភាពនៃការអភិវឌ្ឍប្រទេស ឲ្យបានខ្លាំងក្លាថែមទៀត ស្របតាមផែនការយុទ្ធសាស្ត្រអភិវឌ្ឍជាតិ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីជាមគ្គុទ្ទេសក៍ដ៏ឆ្នើម។
លោកជំទាវកិត្តិសង្គហបណ្ឌិត ម៉ែន សំអន សង្ឃឹមថា ផ្លូវថ្មីនេះនឹងលើកស្ទួយមុខមាត់ស្រុកស្វាយជ្រំ ដែលជាបេះដូងនៃខេត្តស្វាយរៀង។ ជាទីបញ្ចប់លោកជំទាវកិត្តិសង្គហបណ្ឌិត ក៏បានថ្លែងអំណរគុណវិស័យឯកជន ដែលបានចូលរួមចំណែកក្នុងការអភិវឌ្ឍខេត្តស្វាយរៀងនាពេលនេះ ដែលមានលោកជំទាវឧកញ៉ា យូ លឹម និងលោកឧកញ៉ា សួង ធឿន និងសប្បុរសជនជាច្រើននាក់ទៀតរួមគ្នាកសាងផ្លូវមួយខ្សែនេះ៕
អត្ថបទ៖ កម្ពុជាថ្មី
