នៅវេលាយប់ថ្ងៃទី០៤ ខែធ្នូ ឆ្នាំ២០២០នេះ ក្រុមជួយសង្គ្រោះរបស់រាជរដ្ឋាភិបាល បានជួយជីវិតសត្វឆ្កែមួយក្បាល ជាប់គាំងនៅក្នុងគំនរបែកបាក់ អគារកម្ពស់៦ជាន់រលំរាបដល់ដី នៅក្នុងខេត្តកែប។
ឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ នៅវេលាម៉ោងជាង២ រំលងអាធ្រាត្រ ឈាងចូលថ្ងៃទី០៥ ខែធ្នូនេះ បានបង្ហោះរូបថតសត្វឆ្កែមួយក្បាល ដែលក្រុមជួយសង្គ្រាះទើបយកចេញពីគំនរបេតុងបាក់សង្កត់ ដោយសរសេរសារយ៉ាងខ្លីថា សត្វនេះនៅសល់ជីវិត ក្នុងគំនរបែកអស់រយៈពេលជាច្រើនម៉ោង។
ឯកឧត្តមបានសរសេរដូច្នេះថា «គួរឲ្យស្រឡាញ់ ទើបសង្រ្គោះបាន នៅជាប់ក្នុងគំនរបាក់បែក អស់រយៈពេល៣៣ម៉ោង»។
សូមរម្លឹកថា កាលពីម៉ោង៤ និង១៥នាទី រសៀលថ្ងៃទី០៣ ខែមករា ឆ្នាំ២០២០ អគារកម្ពស់៦ជាន់ ដែលកំពុងសាងសង់ នៅភូមិកែប សង្កាត់កែប ក្រុងកែប ខេត្តកែប បានបាក់រលំទាំងស្រុង ដោយធ្វើឲ្យមនុស្សយ៉ាងហោចណាស់ មានមនុស្សពី២០ ទៅ៣០នាក់ បានជាប់ក្នុងគំនរបាក់រលំនេះ។
ប្រតិបត្តិការជួយសង្គ្រោះ ក៏ត្រូវបានធ្វើឡើងភ្លាមៗ ហើយសម្តេចតេជោ នាយករដ្ឋមន្ត្រី ហ៊ុន សែន ក៏បានចេញដំណើរទាំងយប់ ពីភ្នំពេញ ទៅកាន់កន្លែងបាក់រលំអគារ នៅខេត្តកែប ដើម្បីដឹកនាំបញ្ជាប្រតិបត្តិការជួយសង្គ្រោះដោយផ្ទាល់។
រហូតដល់ម៉ោង៥ល្ងាច ថ្ងៃទី០៤ ខែមករា ឆ្នាំ២០២០ នាយករដ្ឋបាលខេត្តកែប លោក អ៊ឹង រិទ្ធី បានបញ្ជាក់ប្រាប់ Swift News ថា ក្រុមប្រតិបត្តិការជួយសង្គ្រោះ បានរុករកឃើញជនរងគ្រោះ នៅក្រោមគំនរអគារបាក់រលំ សរុប២៥នាក់ ( ស្ត្រី០៩នាក់ ដែលក្នុងនេះអ្នករបួសធ្ងន់ និងស្រាល មានចំនួន២០នាក់ ជាស្រី០៦នាក់ ចំណែកជនរងគ្រោះ បាត់បង់ជីវិត មានចំនួន០៥នាក់ ជាស្រី០៣នាក់ )។
ប៉ុន្តែនៅម៉ោងជាង៥ល្ងាច ថ្ងៃទី០៤ ខែមករា ឆ្នាំ២០២០ ក៏មានសេចក្តីរាយការណ៍ពីកន្លែងកើតហេតុមកថា ក្រុមអ្នកជួយសង្គ្រោះ បានយកចេញនូវសាកសពស្ត្រី២នាក់ទៀត។ ដូច្នេះ នាំឲ្យចំនួនអ្នកស្លាប់ ក្នុងហេតុការណ៍បាក់រលំអគារ នៅខេត្តកែប កើនឡើងដល់៧នាក់៕
អត្ថបទ៖ swiftnews
