ដោយសារតែទ្រាំមិនបាននិងសកម្មភាពរបស់លោក កាំង វ៉ាន់ឌី មេឃុំ ចុងជាច ជាឃុំមួយ ស្ថិតក្នុងស្រុកតំបែរខេត្តត្បូងឃ្មុំ ដែលពួកគាត់លើកឡើងថាពូកែកោសរូសលុយកាក់ពីប្រជាពលរដ្ឋលើសេវ៉ាផ្សេងៗ ស្ដីបន្ទោសថ្នាក់ក្រោមរបស់ខ្លួនមិនសមហេតុផល គម្រាមដកតំណែង ក្រុមប្រឹក្សាឃុំ ស្មៀនក៏ដូចមេភូមិ អនុភូមិ សមាជិកភូមិ គ្រូមតេយ្យសហគមន៍ក្នុងឃុំជាដើម ។
នៅក្នុងលិខិស្នើរទៅលោកអភិបាលស្រុកតំបែរដើម្បីសុំដកមេឃុំ ចុងជាចនេះ ក៏បានលើកឡើងដែរថា លោកមេឃុំតែងតែនិយាយរាយការណ៍ទៅថ្នាក់លើទំលាក់កំហុសដាក់មកមន្ដ្រីក្រោមឱវាទ ធ្វើឲ្យប៉ះពាល់សតិអារម្មណ៍របស់ពលរដ្ឋ មានការគាបសង្កត់ កោសរូសពីលុយកាក់ពីពលរដ្ឋនៅពេលមកទទួលសេវ៉ាផ្សេងៗ ជាងនេះទៅទៀតលោកមេឃុំបានបំផុសបំផុលរារាំងការសាងសង់សមិទ្ធិផលនានាតាមភូម ជាក់ស្ដែងដូចជាភូមិន ជាច កើត ជាដើមមានរបាយការណ៍របស់មេភូមិស្រាប់ និងការងារជាច្រើនទៀត ។
លោកមេភូមិទាំងនោះបានប្ដេជ្ញាចិត្តថា បើសិនជាបុគ្គលរូបនោះនៅតែដឹកនាំធ្វើជាមេឃុំទៀត ពួកគាត់សុខចិត្ដលាឈប់ពីតំណែងទាំងអស់គ្នាដោយខ្លួនឯង។ ចំពោះក្នុងភូមិសាស្ដ្រឃុំចុងជាច មានចំនួន១៣ភូមិ ប៉ុន្ដែពេលនេះមានមេភូមិចំនួន១១ហើយដែលបានមូលមតិគ្នាដាក់ពាក្យស្នើរសុំដកលោកមេឃុំនេះចេញ នៅសល់តែ២ភូមិប៉ុណ្ណោះដែលមិនយល់ព្រមតាមនោះ ។
នៅក្នុងលិខិតស្នើរសុំទៅអភិបាលស្រុកនោះត្រូវបានធ្វើឡើងចុះកាលបរិច្ឆេទកាលពីថ្ងៃទី២៧ខែធ្នូឆ្នាំ២០១៩ តែរហូតមកដល់ពេលនេះមិនដឹងថាលោកអភិបាលស្រុក តំបែរបានទទួលឬចាត់វិធានការយ៉ាងណានោះទេ ។ ស្រដៀងគ្នានេះដែរ កាលពីពេលថ្មីៗនេះ នៅក្នុងខេត្តរតនគិរិ ក៏ធ្លាប់មានមន្ដ្រីក្រោមឱវាទនិងពលរដ្ឋមួយចំនួនធ្វើពាក្យស្នើរសុំដកអភិបាលស្រុក អភិបាលរងនៃស្រុកមួយដែរ តែមិនបានជោគជ័យឡើយ ៕
អត្ថបទ៖ PN
