ប្រជាកសិករនៅក្នុងភូមិកោះតាម៉ូវ ឃុំកំពង់ព្រះគគីរ ស្រុកបរិបូណ៌ ជាង១០០គ្រួសារ នៅព្រឹកថ្ងៃទី០៦ ខែមករា ឆ្នាំ២០២០ នេះបានសម្តែងនូវទឹកចិត្តស្បាយរីក រាយ ខណៈដែលស្រូវប្រាំងក្នុងស្រែរបស់ពួកគាត់ជាង៣០០ហិកតាដែលកំពុងក្រៀមស្វិត ត្រូវបានក្រុមការងារសម្តេចឪ តាមរយះសម្តេចជវាហ្វាំង គង់ សំអុល ប្រធានក្រុមការងារថ្នាក់កណ្តាលចុះជួយខេត្តកំពង់ឆ្នាំង បានដឹកបញ្ជូនម៉ាស៊ីនបូមទឹក ចំនួន០៥គ្រឿង មកដា ក់ជួយបូមទឹកពីទន្លេដាក់ស្រែរបស់ពួកគាត់រយះពេល៣ថ្ងៃកន្លងមកនេះ។
លោក ឈួន រ៉ា អនុប្រធានសហគមន៍នេសាទ ឃុំកំពង់ព្រះគគីរតំណាងអោយប្រ ជាកសិករ ជាង១០០គ្រួសារនៅក្នុងភូមិកោះតាម៉ូវ នៅរសៀលថ្ងៃទី០៦ ខែមករា ឆ្នាំ២០ ២០នេះ បាននិយាយអោយដឹងថា ៖ ប្រជាកសិករនៅក្នុងភូមិកោះតាម៉ូវ ជាង១០០គ្រួសារនៅក្នុងរដូវប្រាំងឆ្នាំនេះ បាននឹងកំពុងធ្វើស្រែប្រាំង ចំនួន៣១៥ហិកតា ។ ចំណែកដីស្រែប្រាំង ជាង១០០ហិកតាទៀត នៅក្នុងភូមិកោះតាម៉ូវនេះដែរ ជារបស់ប្រជាកសិករនៅក្នុងឃុំផ្សារ និងឃុំមេលំ ដែលប៉ុន្មានថ្ងៃមុននេះស្រូវបានក្រៀមស្វិតដោយសារតែអត់ទឹក។
លោក ឈួន រ៉ា បានបន្តថា៖ ដោយពិនិត្យឃើញផលលំបាក និងការខ្វះខាតរបស់ប្រជាកសិករនៅក្នុងភូមិកោះតាម៉ូវ តាមសំណើររបស់ប្រជាកសិករ ក្រុមការងារសម្តេចឪ តាមរយះសម្តេចជវាហ្វាំង គង់ សំអុល កាលពីថ្ងៃទី០៣ ខែមករា នេះបានដឹកម៉ាស៊ីនបូមទឹកចំនួន០៥គ្រឿង ក្នុងនោះមានធំ០២គ្រឿង និងតូច០៣គ្រឿង មកដាក់បូមទឹកពីទន្លេបញ្ចូលមកក្នុងប្រឡាយមេ ដើម្បីអោយប្រជាកសិករដាក់ម៉ាស៊ីនតូចៗបូមទឹកបន្ត បញ្ចូលស្រែប្រាំងរៀងៗខ្លួន ។ បើគិតមកដល់ពេលនេះ ដីស្រែប្រាំងប្រមាណ៦០% បានសង្គ្រោះរួចហើយ និងនៅ៤០% ទៀត ប្រមាណ៣ទៅ៤ថ្ងៃទៀត និងមានទឹកពេញស្រែហើយ។
តំណាងប្រជាកសិករភូមិកោះតាម៉ូវ សូមថ្លែងអំណរគុណយ៉ាងជ្រាលជ្រៅ សម្តេចជវាហ្វាំង គង់ សំអុល និងក្រុមសម្តេចឪ ដែលបានដាក់ម៉ាស៊ីនជួយសង្គ្រោះស្រូវប្រាំងពួកគាត់ ក៏ដូចជាបានផ្តល់បាយជូនពួកគាត់អញ្ចឹងដែរ និងដែលក្នុងរយះពេល៣ឆ្នាំកន្លងមក ក្នុងពេលខ្វះទឹកធ្វើស្រែប្រាំងជារៀងរាល់ឆ្នាំ ក្រុមការងារសម្តេចឪ និងសម្តេចជវាហ្វាំងតែងចុះមកដាក់ម៉ាស៊ីនជួយបូមទឹកដាក់ស្រែ រហូតដល់ប្រជាកសិរប្រមូលផលរួចរាល់។
ប្រជាកសិករទាំងអស់បានថ្លែងអំណគុណដល់សម្តេចចៅហ្វាវាំង គង់ សំអុល និងក្រុមការងារសម្តេចឪ សូមជួបប្រទះតែនិងសេចក្តីសុខគ្រប់ប្រការ និងមានជោគជ័យគ្រប់ការងារភារកិច្ច ដើម្បីអោយប្រជាពលរដ្ឋបានរស់នៅក្នុងសុខសន្តិភាព និងមានជីវភាពធូរធាប្រសើរឡើង។
អត្ថបទ៖ អេអិនអិន
