អ្នកនាំពាក្យក្រសួងធនធានទឹក បញ្ជាក់ថា ស្ថានភាពទឹកក្នុងប្រទេសមានបញ្ហាប្រឈមដោយកន្លែង ដោយសារកសិករធ្វើស្រែប្រាំងលើសការកំណត់ ទោះជាយ៉ាងណា ស្ថិតក្នុងលក្ខខណ្ឌដែលអាចគ្រប់គ្រងបាន។
អ្នកនាំពាក្យក្រសួងធនធានទឹក លោក ចាន់ យុត្ថា មានប្រសាសន៍ប្រាប់ VOD ថាស្ថានភាពទឹកនៅកម្ពុជានាដើមរដូវប្រាំងនេះ មានបញ្ហាប្រឈមនៅតាមខេត្តមួយចំនួន ដោយសារពលរដ្ឋធ្វើស្រែប្រាំងលើសការកំណត់របស់រដ្ឋបាលខេត្តខ្លួន តែទោះជាយ៉ាងណា ស្ថានភាពនាពេលបច្ចុប្បន្ននេះនៅតែអាចគ្រប់គ្រងបាន។
លោក ចាន់ យុត្ថា៖ «ស្ថានភាពចំពោះយើងៗអត់មានអីបារម្ភខ្លាំងដូចប្រទេសជិតខាងយើងទេ! ព្រោះបណ្ដាអាងទឹករបស់យើងគឺនៅតែរក្សាបាន។ ថ្វីត្បិតថា មួយចំនួន យើងត្រូវបានប្រើប្រាស់នៅក្នុងការងារបង្កបង្កើនស្រូវប្រាំង»។
បើតាមលោក ចាន់ យុត្ថា ខេត្តដែលកំពុងប្រឈមនឹងការខ្វះខាតទឹកមានដូចជាបន្ទាយមានជ័យ កំពង់ធំ ព្រៃវែង ស្វាយរៀង បាត់ដំបង តាកែវ និងកំពត ជាដើម។
ក្នុងហ្វេសប៊ុករបស់ក្រសួងធនធានទឹកកាលពីម្សិលមិញ ឱ្យដឹងថា ក្រសួងចាប់ផ្ដើមបូមទឹកចេញពីស្ទឹងសិរីសោភ័ណ្ឌ ទម្លាក់ចូលប្រឡាយមេ ឱ្យហូរទៅក្នុងស្ទឹងមង្គលបុរី បន្ទាប់ពីឃើញថា ស្ទឹងមង្គលបុរីអាចធានាការប្រើប្រាស់បានតែ៣ថ្ងៃទៀតប៉ុណ្ណោះ។
ទាក់ទងនឹងការខ្វះខាតទឹកនេះ លោក ចាន់ យុត្ថា បានបញ្ជាក់ថា ក្នុងរដូវប្រាំងខាងមុខ កម្ពុជាអាចប្រើប្រាស់ទឹកបានសម្រាប់តែបម្រើជីវភាពរស់នៅប្រចាំថ្ងៃប៉ុណ្ណោះ។
លោកថា៖ «ធ្វើយ៉ាងណា ចូលរួមថែរក្សាប្រភពទឹកដែលមានស្រាប់ ចៀសវាងការបូមបាចពង្រីកនាំឱ្យយើងមានការខ្វះខាតធ្ងន់ធ្ងរ បញ្ហាទី២ គឺស្រូវប្រាំង សូមធ្វើតែម្ដងដូចសារាចរណែនាំរបស់រាជរដ្ឋាភិបាល អាហ្នឹងបើមានការប្រឈមក៏តិចតួចដែរ។ តែនេះចាត់ទុកថា ធ្វើគ្រប់គ្រងបានល្អប្រសើរ យើងឃើញហើយប្រទេសជិតខាងយើងកុំថាឡើយការងារដាំដុះ សូម្បីតែការងូតទឹកហ្នឹងក៏ប្រមុខរដ្ឋាភិបាលគេក៏អំពាវនាវឱ្យពលរដ្ឋកាត់បន្ថយនូវការងូតទឹកដែរ»។
យោងតាមសេចក្ដីប្រកាសព័ត៌មានរបស់ក្រសួងធនធានទឹក កាលពីថ្ងៃទី៨ ខែមករា ឆ្នាំ២០២០ ស្ថានភាពអាកាសធាតុនៅកម្ពុជា ចាប់ពីថ្ងៃទី៨ ដល់ថ្ងៃទី១៤ ខែមករា មានសីតុណ្ហភាពចន្លោះពី២០ ដល់៣៤អង្សារ ដោយអាចមានភ្លៀងតិចតួចប៉ុណ្ណោះ។
ទាក់ទងនឹងការខ្វះទឹកនេះ លោកនាយករដ្ឋមន្ត្រី ហ៊ុន សែន កាលពីថ្ងៃទី៧ ខែវិច្ឆិកា ឆ្នាំ២០១៩ បានប្រកាសថា កម្ពុជានឹងប្រឈមនឹងការខ្វះទឹកចាប់ពីខែវិច្ឆិកា ឆ្នាំ២០១៩ តទៅ ដោយលោកសុំទោសពលរដ្ឋជាមុនលើការប្រើប្រាស់ទឹក និងការផ្គត់ផ្គង់អគ្គិសនី ដោយថា ស្ថានភាពទឹកអាចនឹងមិនអាចផ្ដល់គ្រប់គ្រាន់ក្នុងការបង្វិលតួប៊ីនវារីអគ្គិសនីបានគ្រប់គ្រាន់នោះទេ។
មន្ត្រីប្រតិបត្តិការ និងថែទាំនៅទំនប់វារីអគ្គិសនីសេសានក្រោម២ ក្នុងខេត្តស្ទឹងត្រែង លោក ម៉ា មករា បានប្រាប់ VOD ថា នៅរយៈពេលប៉ុន្មានសប្ដាហ៍ចុងក្រោយនេះ ស្ថានភាពទឹកហូរចូលអាងសេសានក្រោម២ មានប្រមាណ ៤១៩ម៉ែត្រគូបក្នុងមួយវិនាទីប៉ុណ្ណោះ ដែលលោកថា ជាកម្រិតមួយតិចតួច។ លោកបន្ថែមថាបច្ចុប្បន្ន ទំនប់សេសានក្រោម២ ដែលមានសមត្ថភាពផ្ដល់ថាមពល៤០០មេហ្គាវ៉ាត់ អាចផ្ដល់ថាមពលបានប្រមាណ៩០មេហ្គាវ៉ាត់ប៉ុណ្ណោះ។
លោក ម៉ា មករា៖ «ពីបច្ចុប្បន្ននេះរហូតដល់ខែប្រាំង ថ្ងៃមុខទៀតគឺយើងអាចផលិតថាមពលបានអស់ធំហើយ១០០មេហ្គាវ៉ាត់នោះ។ អាស្រ័យទៅលើលំហូរទឹកមកពីខាងលើ ព្រោះវាទាក់ទងនឹងលំហូរទឹកមកដែរទេ បើសិនជាលំហូរទឹកមកបានច្រើន យើងនឹងអាចផលិតថាមពលបានច្រើនដូចគ្នា។ […] យើងបានផលិតពិបាកដែរ ព្រោះដោយសារលំហូរទឹកមកបានតិច អ៊ីចឹងយើងចង់ផលិតថាមពលឱ្យបានច្រើនដូចគ្នា ក៏ប៉ុន្ដែលំហូរទឹកមកវាតិច ធ្វើឱ្យយើងធ្វើមិនបាន»។
អ្នកពិគ្រោះយោបល់ឯករាជ្យផ្នែកធនធានទន្លេ និងបរិស្ថាន លោក ហែម ឧត្តម បានឱ្យ VOD ដឹងថា បញ្ហាដែលធ្វើឱ្យកម្ពុជាជួបប្រទះបញ្ហាខ្វះទឹកនេះ គឺបណ្ដាលមកពីការប្រែប្រួលអាកាសធាតុ ការបន្ស៊ាំខ្លួនទៅនឹងភាពរាំងស្ងួតមិនទាន់ពេលរបស់កម្ពុជា ការសាងសង់ទំនប់វារីអគ្គិសនីនៅតាមដង និងដៃទន្លេមេគង្គផ្នែកខាងលើ និងកង្វះតម្លាភាពក្នុងការរៀបចំប្រព័ន្ធធារាសាស្ត្រ ដោយមិនបានពិភាក្សាជាមួយពលរដ្ឋ។
លោកជំរុញដល់រដ្ឋាភិបាល ងាកទៅរកប្រភពថាមពលដែលអាចប្រើប្រាស់ឡើងវិញ និងត្រូវមានការពិភាក្សាជាមួយពលរដ្ឋ និងអង្គការសង្គមស៊ីវិលលើបញ្ហានេះឱ្យបានទូលំទូលាយដើម្បីរកដំណោះស្រាយ និងបញ្ចៀសនូវបញ្ហា។
លោកសរសេរថា៖ «លើកកម្ពស់ការយល់ដឹង និងលើកទឹកចិត្តឱ្យមានការអនុវត្តប្រសិទ្ធភាពថាមពល (energy efficiency) និងវិសហមជ្ឈការថាមពល (De-centralized energy) ដែលអាចឱ្យសហគមន៍ដាច់ស្រយាលអាចចូលរួមផលិតថាមពល ដើម្បីផ្គត់ផ្គង់តម្រូវការដោយខ្លួនឯងមុននឹងខ្សែបណ្ដាញអគ្គិសនីជាតិអាចទៅដល់។ ពង្រីកលំហនៃការពិភាក្សាឱ្យបានទូលំទូលាយ ដែលភាគីពាក់ព័ន្ធផ្សេងៗអាចចូលរួមបានពេញលេញ ជាពិសេស ប្រជាពលរដ្ឋមូលដ្ឋាន អ្នកការពារបរិស្ថាន សង្គមស៊ីវិល ស្ថាប័នសិក្សាធិការ (academic) ជាតិ និងអន្តរជាតិ។ល។»។
នេះជាឆ្នាំទី២ហើយ ដែលកម្ពុជាត្រូវប្រឈមនឹងការខ្វះខាតទឹក និងអគ្គិសនីក្នុងប្រទេស បន្ទាប់ពីបញ្ហានេះបានកើតឡើងម្ដងរួចហើយកាលពីឆ្នាំ២០១៩កន្លងទៅ ដែលធ្វើឱ្យប៉ះពាល់ដល់ជីវភាព និងការរស់នៅរបស់ប្រជាជនជាច្រើនលាននាក់។ អ្នកធ្វើការពាក់ព័ន្ធជំរុញដល់រដ្ឋាភិបាលឱ្យមានវិធានការជាក់លាក់ និងដោះស្រាយបញ្ហាឱ្យបានឆាប់ ដើម្បីបញ្ចៀសនូវបញ្ហានេះនៅឆ្នាំបន្តបន្ទាប់ទៀត៕
អត្ថបទ៖ VOD
