រយ:ពេលតែ៣ថ្ងៃប៉ុណ្ណោះ បន្ទាប់ពីប្រកាសដាក់លក់ជាផ្លូវការ ចាប់ពីថ្ងៃទី០៧ ខែមករា ឆ្នាំ២០២០ កន្លងទៅនេះ «ស្លាកលេខពិសេសផ្ទាល់ខ្លួន» លក់បានជាង១០០ស្លាក ហើយបានចំណូលប្រមាណ១លានដុល្លារអាមេរិក។
លោក ស៊ុន ចាន់ថុល បានថ្លែងថា ស្លាកលេខពិសេសផ្ទាល់ខ្លួន នេះទទួលបានការចាប់អារម្មណ៍ ពីម្ចាស់រថយន្ត ហើយថា ការទិញស្លាកលេខពិសេសផ្ទាល់ខ្លួន នេះ មិនត្រឹមតែងាយស្រួលសម្រាប់ម្ចាស់រថយន្តនោះទេ តែវាចំណេញថែមទៀតផង ព្រោះពេលដូររថយន្តមិនបាច់ចំណាយថ្លៃស្លាកលេខទៀតនោះឡើយ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងថា ការបង្កើតឱ្យមាន «ស្លាកលេខរថយន្តពិសេសនេះ» ដើម្បីបំពេញតម្រូវការ បន្ថែមទៀត ជូនប្រជាពលរដ្ឋដែលចង់ប្រើប្រាស់ស្លាកពិសេសផ្ទាល់ខ្លួន ដូចជាចង់ដាក់ឈ្មោះ ឬលេខពិសេសដែលខ្លួនពេញចិត្ត។
ក្រៅពីបង្កើតជម្រើសសម្រាប់អ្នកប្រើប្រាស់ រថយន្តហើយនោះ ការរៀបចំឱ្យមានស្លាកលេខរថយន្តពិសេសផ្ទាល់ខ្លួននេះ ក៏ដើម្បីចូលរួមស្វែងរកចំណូលពីការលក់ស្លាកលេខជួយទ្រទ្រង់ដល់សេដ្ឋកិច្ចជាតិ និងពង្រឹងដល់ការគ្រប់គ្រងយានយន្តនៅកម្ពុជាផងដែរផងដែរ។
សូមបញ្ជាក់ថា «ស្លាកលេខពិសេសផ្ទាល់ខ្លួន» ត្រូវបានប្រកាសដាក់លក់ជាផ្លូវការ កាលពីថ្ងៃទី០៧ ខែមករា ឆ្នាំ២០២០កន្លងទៅនេះ ខួប៤១ឆ្នាំនៃការផ្តួលរំលំរបបខ្មែរថ្ងៃដែលពលរដ្ឋខ្មែររស់រានមានជីវិតឡើងវិញ៕
អត្ថបទ៖ kbn
