រយៈពេលប៉ុន្មានឆ្នាំចុងក្រោយនេះ ស្វាយបានក្លាយជាផ្លែឈើនាំចេញអាទិភាពមួយរបស់កម្ពុជា ដែលមានលទ្ធភាពអាចនាំចេញទៅកាន់ទីផ្សារអាស៊ី និងអឺរ៉ុប។ កំណើនកើនឡើងជាបន្តបន្ទាប់នេះ ជាសញ្ញាបង្ហាញថាទីផ្សារស្វាយនៅក្នុងស្រុកខ្មែរអាចនឹងមានទីផ្សារកាន់តែខ្លាំងជាងមុន ដោយសារតែកំណើននៃការនាំចេញឥតឈប់ឈរពីមួយឆ្នាំទៅមួយឆ្នាំ។
ក្រុមហ៊ុនធ្វើដំណាប់ស្វាយបឹងកេត ដែលមានរោងចក្រផលិតដំណាប់ស្វាយ ស្ថិតនៅក្នុងស្រុកភ្នំស្រួច ខេត្តកំពង់ស្ពឺ បានប្រមូលទិញផ្លែស្វាយនៅទូទាំងប្រទេសមកច្នៃធ្វើជាដំណាប់ដើម្បីនាំចេញ។ តំណាងក្រុមហ៊ុនធ្វើដំណាប់ស្វាយបឹងកេត លោក ហេង ស្រេង ឲ្យដឹងថា ក្នុងមួយថ្ងៃក្រុមហ៊ុនត្រូវការផ្លែស្វាយចន្លោះពី ១៥០តោន ទៅ១៨០តោន សម្រាប់ធ្វើដំណាប់ស្វាយនេះ។ ប៉ុន្តែបច្ចុប្បន្នប្រមូលទិញបានចន្លោះពី ៦០តោន ទៅ១០០តោនប៉ុណ្ណោះ។
លោក ហេង ស្រេង ប្រាប់សារព័ត៌មានក្នុងស្រុកមួយថា ក្រុមហ៊ុនប្រមូលទិញផ្លៃស្វាយពីប្រជាពលរដ្ឋប្រមាណ ២០% ឈ្មួញកណ្តាល ៦០% និង ២០% ទៀតប្រមូលទិញពីសហគមន៍។ លោក ហេង ស្រេង បន្តថា ចំនួនស្វាយដែលលោកប្រមូលទិញបាននេះ មិនគ្រប់គ្រាន់សម្រាប់ផលិតជាដំណាប់ទៅកាន់ប្រទេសចិននោះឡើយ ខណៈទីផ្សារនៅក្នុងប្រទេសចិនមានតម្រូវការខ្ពស់។
សូមជម្រាបថា ដើម្បីបំពេញតម្រូវការក្នុងការផលិតដំណាប់ស្វាយ លោក ហេង ស្រេង បានប្រកាសប្រមូលទិញផ្លែស្វាយពីប្រជាពលរដ្ឋគ្រប់ទីកន្លែង ពិសេសស្វាយកែវរមៀត ដែលក្រុមហ៊ុនទិញតម្លៃប្រមាណជា ១,៤៥០រៀលមួយគីឡូក្រាម៕
អត្ថបទ៖ cpcnews
