បើទោះបីជាមានការសម្ភាសន៍៍ផ្ទាល់ជាមួយអភិបាលស្រុកអង្គរបូរី និងរូបភាពសកម្មភាព នៃជនជាតិវៀតណាមចូលមកធ្វើស្រែប្រាំង នៅក្នុងភូមិសាស្ត្រឃុំគោកធ្លក ស្រុកអង្គរបូរី យ៉ាងណាក៏ដោយ ក៏រដ្ឋបាលស្រុកចេញលិខិតបំភ្លឺថា មិនមែនជាការពិតដែរ ដោយថា – រដ្ឋបាលស្រុកបានប្រជុំផ្សព្វផ្សាយដល់សមត្ថកិច្ចពាក់ព័ន្ធ មេឃុំគ្រប់ឃុំ ប្រជាជន និងបានចុះផ្សព្វផ្សាយនិងវិធានការ ទប់ស្កាត់នៅពេលទឹកស្រក មុនការបង្កបង្កើនផលមកដល់ជារៀងរាល់ឆ្នាំ និងជាបន្តបន្ទាប់។
បានបង្កើតក្រុមចម្រុះមួយក្រុម ចុះតាមដាន ត្រួតពិនិត្យនិងទប់ស្កាត់នូវករណីជួលដីនេះនិងបទល្មើសនានា។ បានសហការជាមួយសមត្ថកិច្ចសាធារណរដ្ឋសង្គមនិយមវៀតណាម ទាំងនៅព្រំដែនរហូតដល់ស្រុកអានភូ ក្នុងការចូលរួមផ្សព្វផ្សាយនិងទប់ស្កាត់ករណីជួលដីនេះ។ ហើយអាជ្ញាធរស្រុកមិនបណ្តែតបណ្តោយ ឲ្យមានការជួលដីស្រែប្រាំង នៅតាមបណ្តោយព្រំដែន និងមិនមានការជួលដីឲ្យទៅជនជាតិវៀតណាម នៅឃុំគោកធ្លកដូចការចុះផ្សាយនោះទេ។
មតិប្រជាពលរដ្ឋជាច្រើនក្នុងខេត្តតាកែវ សម្តែងការខកបំណងចំពោះលិខិតបំភ្លឺនេះ ក្រោយមានរូបភាពចុះផ្សាយអំពីសកម្មភាព ជនជាតិវៀតណាម ចូលធ្វើស្រែប្រាំងនៅក្នុងភូមិសាស្ត្រឃុំគោកធ្លក ស្រុកអង្គរបូរីហើយ ក៏នៅតែអាជ្ញាធរបដិសេធរួចមិនមានវិធានការទប់ស្កាត់ ចំណុចនេះបានធ្វើឲ្យប្រជាពលរដ្ឋបាត់បង់ទំនុកចិត្ត ចំពោះអាជ្ញាធរជាខ្លាំង ខណៈដែលអាជ្ញាធរមានសមត្ថកិច្ច អាជ្ញាធរស្រុក អាជ្ញាធរខេត្ត មិនគោរពតាមសារាចរណែរនាំរបស់រាជរដ្ឋាភិបាល។
គួរំលឹកផងដែរថា ទាក់ទងបញ្ហាជួលដីស្រែក្បែរព្រំដែនឲ្យជនជាតិវៀតណាមនេះផងដែរ ប្រមុខរាជរដ្ឋាភិបាល បានលើកទ្បើងពីហេតុផលថា ការជួលដីជាប់ព្រំដែនឲ្យទៅប្រទេសជិតខាងនេះ វាបង្កភាពស្មុគស្មាញ ដល់ការអនុវត្តការងារ របស់គណៈកម្មាធិការចម្រុះលើកិច្ចការព្រំដែន និង មានការលំបាកក្នុងការគ្រប់គ្រង ។
ក្នុងនោះរាជរដ្ឋាភិបាលកម្ពុជា កាលពីខែវិច្ឆិកា ឆ្នាំ២០១៥ កន្លងទៅ បានចេញសារាចរណែនាំទៅដល់គ្រប់ក្រសួង ស្ថាប័ន និង អាជ្ញាធរ ដែនដីពាក់ព័ន្ធ ទាំងអស់ហាមជួល ឬ លក់ដីស្រែ ចម្ការ ឬ លំនៅឋាន នៅតាមព្រំដែន ទៅឲ្យប្រជាពលរដ្ឋ នៃប្រទេសជិតខាង រួមទាំងតំបន់មិនទាន់បានកំណត់ខណ្ឌសីមា និងបោះបង្គោលព្រំដែន ផ្លូវការរួច៕
អត្ថបទ៖ cen
