មកដល់ពេលនេះ សម្រាប់រាជធានីភ្នំពេញ មានរថយន្តជាង៥០ម៉ឺនគ្រឿង និងម៉ូតូជិត២លានគ្រឿង នេះមិនគិតពីរថយន្តពាក់ស្លាកលេខ ខ.ម ,ន.ប រ៉ឺម៉ក និងត្រីចក្រយានយន្តនោះទេ។
ការកើនឡើង នូវចំនួនយានយន្តនេះ បានធ្វើឲ្យគ្រប់បណ្តាលផ្លូវនៅក្នុងរាជធានីភ្នំពេញ មានការកកស្ទះចរាចរណ៍រាល់ថ្ងៃ បើទោះបីរដ្ឋបាលរាជធានីភ្នំពេញ បាននិងកំពុងធ្វើការដោះស្រាយជាប្រចាំយ៉ាងណាក្តី។
ប្រធានមន្ទីរសាធារណការ និងដឹកជញ្ជូនរាជធានីភ្នំពេញ លោក សាំ ពិសិដ្ឋ បានឲ្យដឹងនៅព្រឹកថ្ងៃទី១៦ ខែមករានេះថា គិតត្រឹមខែធ្នូ ឆ្នាំ២០១៩នេះ ស្ថិតិយានយន្តក្នុងរាជធានីភ្នំពេញ មានរថយន្តចំនួន៥០៨១៤៣គ្រឿង និងទោចក្រយានយន្តចំនួន ១៩៦៦៣២២ គ្រឿង ដែលបានចុះបញ្ជីត្រឹមត្រូវនៅមន្ទីរសាធារណការ និងដឹកជញ្ជូនរាជធានីភ្នំពេញ។ តែនៅក្នុងចំនួននេះ យើងមិនបានគិតនិងរាប់បញ្ចូលរថយន្តដែលពាក់ស្លាកលេខខ.ម ស្លាកលេខ ន.ប រ៉ឺម៉ក និងត្រីចក្រយានយន្តឡើយ។
លោក សាំ ពិសិដ្ឋ ក៏បានបញ្ជាក់ផងដែរថា ដោយសារកំណើនយានយន្ត មានការកើនឡើងខ្លាំង រួមទាំងការបើកបរ មិនសូវគោរពច្បាប់ចរាចរណ៍ ការរំលោភចិញ្ចើម និងផ្លូវ ទៀតនោះ បានធ្វើឲ្យផ្លូវមួយចំនួនក្នុងរាជធានីភ្នំពេញ មានការកកស្ទះចរាចរណ៍ ដែលជាបញ្ហាប្រឈមរបស់អាជ្ញាធរជារៀងរាល់ថ្ងៃ។ ជុំវិញបញ្ហានេះ លោក សាំ ពិសិដ្ឋ បានអំពាវនាវដល់បងប្អូនប្រជាពលរដ្ឋទាំងអស់ សូមគោរពច្បាប់ចរាចរណ៍ កុំរំលោភចិញ្ចើម និងផ្លូវ ត្រូវចូលរួមទាំងអស់គ្នាដើម្បីកាត់បន្ថយការកកស្ទះចរាចរណ៍។
ដើម្បីដោះស្រាយបញ្ហាកកស្ទះចរាចរណ៍នេះដែរ រដ្ឋបាលរាជធានីភ្នំពេញ មានគម្រោងនឹងស្ថាបនាផ្លូវក្រោមដី២ខ្សែទៀត រត់ក្រោមផ្លូវ សហព័ន្ធរុស្ស៊ីនៅចំណុចមុខសាកលវិទ្យាល័យភូមិន្ទភ្នំពេញ ទម្លុះទៅផ្លូវ២៦៥ ដោយធ្វើចរាចរទៅមក និងផ្លូវក្រោមដីមួយខ្សែទៀត គ្រោងនឹងធ្វើឡើងនៅមុខវិទ្យាស្ថានភាសាបរទេស ដោយចេញពីក្នុងសាលាមុជក្រោមផ្លូវសហព័ន្ធរុង្ស៊ី ទម្លុះមកផ្លូវ២៦១ស្ថិតក្នុងសង្កាត់ទឹកល្អក់ទី១ ខណ្ឌទួលគោក។ ក្រៅពីនេះនៅតំបន់ក្តាន់២ ក៏មានការកែសម្រួលសួនច្បារផងដែរ។ ជាងនេះទៀតដើម្បីដោះស្រាយបញ្ហាចរាចរណ៍នេះដែរ រដ្ឋបាលរាជធានីភ្នំពេញ ក៏បានធ្វើការពង្រីកផ្លូវមួយចំនួននៅក្នុងរាជធានីភ្នំពេញផងដែរ៕
អត្ថបទ៖ កម្ពុជាថ្មី
