លោកខៀវ កាញារីទ្ធ រដ្ឋមន្ត្រីក្រសួងព័ត៌មាន បានឆ្លើយតប និងពន្យល់ទៅកាន់នារី ជាអ្នកសារព័ត៌មានមួយរូប ដែលបានបង្ហោះការមិនពេញចិត្ត ចំពោះពិធីជួបជុំអ្នកសារព័ត៌មានប្រចាំឆ្នាំ ជាមួយលោកនាយករដ្ឋមន្ត្រីហ៊ុន សែន កាលពីថ្ងៃទី១៤ ខែមករា កន្លងទៅនេះ។
នារីជាអ្នកសារព័ត៌មាន ដែលមាន Facebook ឈ្មោះ «Ly Na» ដោយបានលើកឡើងថា ជាជំនួបគ្រាន់តែទៅស្តាប់លោកនាយករដ្ឋមន្ត្រី និងហូបអាហារ ហើយមិនបានលើកឡើងនូវអ្វីដែលជាទុក្ខកង្វល់របស់ខ្លួនជាអ្នកសារព័ត៌មាន។ ហើយសម្រាប់ជំនួបលើកក្រោយ ខ្លួននឹងមិនចូលរួមទៀតនោះឡើយ។
លោកខៀវ កាញារីទ្ធិ រដ្ឋមន្ត្រីក្រសួងព័ត៌មាន បានពន្យល់ថា នៅមុនពេលជំនួបជារៀងរាល់ឆ្នាំ សមាគមអ្នកកាសែត តែងពិគ្រោះគ្នាលើកពីចំណុច ដែលត្រូវដាក់ជូននាយករដ្ឋមន្ត្រីសម្រេច ហើយក្រសួងព័ត៌មាន ពិនិត្យពីចំណុចណា ដែលគួរដាក់ ដើម្បីនាយករដ្ឋមន្ត្រីសម្រេចជាគោលការណ៍ គឺនិយាយពីរឿងព្រៃ មិននិយាយពីដើមឈើទេ។
លោករដ្ឋមន្ត្រី បានបន្តពន្យល់ថា នៅក្នុងឆ្នាំនេះ បញ្ហាដែលលើកឡើង គឺកិច្ចការពារអ្នកកាសែតនៅចំពោះមុខច្បាប់ និង សំណូមពរអ្នកកាសែតចង់មានប្រព័ន្ធសន្តិសុខសង្គមនៅពេលពួកគេមានជំងឺដង្កាត់ផ្សេងៗ។ ដោយប្រព័ន្ធ ប.ស.ស. មាននីតិវិធីច្បាស់លាស់ហើយ ក្រសួងមានគំរោងបើកសិក្ខាសាលាមួយ ជូនអ្នកកាសែតដោយអញ្ជើញតំណាងក្រសួងសង្គមកិច្ចមកពន្យល់ ហេតុនេះនៅសល់តែរឿងការពារអ្នកកាសែត នៅចំពោះការប្តឹងផ្តល់នានា ។ ហើយសំណូមពរនេះត្រូវបានលោកនាយករដ្ឋមន្ត្រី ដោះស្រាយជូននៅថ្ងៃទី ១៤ មករា នោះហើយ តែប្រហែលអ្នករិះគន់នោះ រវល់តែវ៉ែជជែកគ្នាបានជាមិនឮឬយ៉ាងណា ?
ខ្លាំងមិនទាន់បានប៉ុន្មានផង ស្រាប់តែម្ចាស់គណនីនេះដដែល បានចេញលិខិតសុំទោសសម្តេចហ៊ុន សែន កាលពីថ្ងៃទិ១៧ខែមកវានេះ។
សូមបញ្ជាក់ថា កាលពីថ្ងៃទី១៤ ខែមករា ឆ្នាំ២០២០កន្លងទៅថ្មីៗនេះ លោកនាយករដ្ឋមន្ត្រីហ៊ុន សែន បានផ្តល់កិត្តិយស ពិសាអាហារសាមគ្គីជាលើកទី៤ ជាមួយអ្នកព័ត៌មានជិត៦ពាន់នាក់។ក្នុងជំនួបនេះ ក្រៅតែពីការកោតសរសើរ ចំពោះការវិវឌ្ឍន៍លើវិស័យព័ត៌មាននៅកម្ពុជា លោកនាយករដ្ឋមន្ត្រី ក៏បានមានប្រសាសន៍កែលំអរលើចំណុចឆ្គាំឆ្គង និងកង្វះខាតរបស់អ្នកព័ត៌មានផងដែរ។
ទន្ទឹមនឹងនេះ លោកនាយករដ្ឋមន្ត្រី បានផ្តល់នូវពាក្យស្លោកមួយឃ្លា ដោយលោកអះអាងថា ជាយ័ន្តការពារខ្លួនសម្រាប់អ្នកសារព័ត៌មាន គឺពាក្យថា «កុំបំពានសិទ្ធិអ្នកដទៃ កុំបំភ្លៃការពិត»។ ប្រមុខរដ្ឋាភិបាល ក៏បានក្រើនរំលឹកទៅដល់មន្ត្រីរបស់រាជរដ្ឋាភិបាល កុំឱ្យចាត់ទុកអ្នកសារព័ត៌មានជាសត្រូវ ដោយត្រូវចាត់ទុកជាដៃគូសហការមួយដ៏ប្រសើរផងដែរ៕
