ក្រសួងទេសចរណ៍ បានចាត់ទុកភ្ញៀវទេសចរចិន គឺជាកំណប់ទ្រព្យដ៏សំខាន់នៅក្នុងវិស័យទេសចរណ៍នៅព្រះរាជាណាចក្រកម្ពុជា ព្រោះភ្ញៀវទេសចរចិន ស្ថិតនៅលំដាប់លេខរៀងទី១ ដែលមានចំនួន ២,៥លាននាក់ នៃចំនួនភ្ញៀវទេសចរអន្តរជាតិសរុប ដែលមានទស្សនាកម្ពុជា កាលពីឆ្នាំ២០១៩។ នេះបើយោងតាមអត្ថបតបទយកការណ៍របស់ក្រសួងទេសចរណ៍ ចេញផ្សាយនៅថ្ងៃទី១៧ ខែមករា ឆ្នាំ២០២០។
លោក ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍ថា កត្តាសំខាន់ៗចំនួន២ ដែលជំរុញឱ្យចំនួនភ្ញៀវទេសចរជនជាតិចិន មកកម្សាន្តនៅកម្ពុជាកើនឡើងពីមួយឆ្នាំទៅមួយឆ្នាំ នោះរួមមាន គោលដៅទេសចរណ៍វប្បធម៌ ធម្មជាតិ និងទេសចរណ៍ក្នុងគោលដៅវិនិយោគជាដើម។
ក្រសួងទេសចរណ៍បានឱ្យដឹងទៀតថា ប្រទេសកម្ពុជា នៅមិនទាន់បានទាក់ទាញភ្ញៀវទេសចរចិនមកកម្សាន្តអស់សក្កានុពលឡើយ ដោយកម្ពុជា ត្រូវបន្តការខិតខំពង្រឹងវិស័យទេសចរណ៍ និងបដិសណ្ឋារកិច្ចជាច្រើនទៀត ដើម្បីទាក់ទាញភ្ញៀវទេសចរចិន ឱ្យមកកម្សាន្តបានច្រើនដូចបណ្ដាប្រទេសជិតខាង ដូចជា ថៃ ដែលបានទាញភ្ញៀវទេសចររហូតដល់ ១០លាននាក់ វៀតណាម ៥លាននាក់ និង ម៉ាឡេស៊ី ៤លាននាក់។
សូមជម្រាបថា ក្រៅពីភ្ញៀវទេសចិន ដែលស្ថិតនៅលេខរៀងទី១ កម្ពុជាទទួលភ្ញៀវទេសចរ វៀតណាមលេខ២ ថៃលេខ៣ ឡាវលេខ៤ កូរ៉េខាងត្បូងលេខ៥ សហរដ្ឋអាមេរិកលេខ៦ ជប៉ុនលេខ៧ ម៉ាឡេស៊ីលេខ៨ បារាំងលេខ៩ និងអង់គ្លេសលេខ១០៕
អត្ថបទ៖ mytv
