ការបង្ក្រាបនោះ បានធ្វើឡើងនៅថ្ងៃសៅរ៍ទី១៨មករាឆ្នាំ២០២០ នៅលើដងផ្លូវជាតិលេខ៧៨ ត្រង់គោលដៅប៉ុស្តិ៍ត្រួតពិនិត្យចរាចរណ៍ផ្លូវគោក ជិតផ្លូវចូលទៅទំនប់វារីអគ្គិសនីសេសាន្តក្រោម៣ ស្ថិតក្នុងឃុំភ្លុក ស្រុកសេសាន្ត ខេត្តស្ទឹងត្រែង។
រថយន្តក្រុងវៀតណាមមួយគ្រឿង បង្កប់ដឹកជញ្ជូនឈើប្រណិតល្មើសច្បាប់ ត្រូវបានកម្លាំងនគរបាលខេត្តស្ទឹងត្រែង ធ្វើការបង្ក្រាបាន និងឃាត់ខ្លួនមនុស្ស៧នាក់ បញ្ជូនមកកាន់ស្នងការដ្ឋាននគរបាលខេត្ត ចាត់ការតាមច្បាប់។
រថយន្តក្រុងនេះ បានផ្ទុកឈើប្រណិត ដោយដឹកចេញពីខេត្តស្ទឹងត្រែង ឆ្ពោះទៅកាន់ខេត្តរតនគិរី ក្នុងបំណង នាំឆ្លងដែនចូលទៅប្រទេសវៀតណាម តាមច្រកទ្វារអន្តរជាតិអូរយ៉ាដាវ ស្ថិតក្នុងស្រុកអូរយ៉ាដាវ ខេត្តរតនគិរី។ សមត្ថកិច្ចបន្តថា ដោយមានការសង្ស័យ កន្លងគោលដៅ ក៏បានឃាត់រថយន្តក្រុងនេះត្រួតពិនិត្យ ហើយបានរកឃើញមានផ្ទុកសុទ្ធតែឈើប្រណិត នៅក្នុងពេលនោះ ក៏បានឃាត់រថយន្តក្រុងនោះ រួមទាំងជនជាតិវៀតណាម៧នាក់ផងដែរ។
រថយន្តក្រុងដឹកឈើល្មើសច្បាប់ និងជនសង្ស័យ៧នាក់ ត្រូវបានបញ្ជូនមកកាន់ ការិយាល័យនគរបាលប្រឆាំងបទល្មើស នៃស្នងការដ្ឋាននគរបាលខេត្តស្ទឹងត្រែង ចាត់ការជាបន្តតាមច្បាប់៕
អត្ថបទ៖ អរិយធម៌
