រដ្ឋមន្រ្តីក្រសួងឧស្សាហកម្ម បានអះអាងថា ការនាំចូលអំបិលនិងការចរាចរណ៍អំបិលលើទីផ្សារ ត្រូវមានការត្រួតពិនិត្យតឹងរ៉ឹង ហើយបើពិនិត្យឃើញថា អំបិលមិនមានបញ្ចូលជាតិអ៊ីយ៉ូត បញ្ចូលមិនគ្រប់តាមស្តង់ដារ ឬអំបិលមិនមានស្លាកសញ្ញាបញ្ចូលជាតិអ៊ីយ៉ូតដែលទទួលស្គាល់ដោយក្រសួងឧស្សាហកម្ម និងសិប្បកម្ម ត្រូវណែនាំ ដកហូត ឬពិន័យតាមច្បាប់និងអនុក្រឹត្យ ។
ក្នុងសិក្ខាសាលាពិគ្រោះយោបល់ ស្តីពីការរៀបចំផែនការផលិតកម្មអំបិល និងការបញ្ចូលជាតិអ៊ីយ៉ូតក្នុងអំបិល សម្រាប់ឆ្នាំ២០២០
នៅព្រឹកថ្ងៃទី ២០ ខែមករា ឆ្នាំ២០២០ នាទីស្តីការក្រសួងលោក ចមប្រសិទ្ធ ទេសរដ្ឋមន្រី្តរដ្ឋមន្ត្រីក្រសួងឧស្សាហកម្ម និងសិប្បកម្ម បានថ្លែងថា អំបិលមានសារប្រយោជន៍សម្រាប់មនុស្ស សត្វ និងរុក្ខជាតិទាំងអស់ ដើម្បីទ្រទ្រង់រីកលូតលាស់នៃសរីរាង្គ ដោយគ្រាន់តែសេចក្តីត្រូវការនោះអាស្រ័យ ទៅតាមសភាវៈរៀងៗខ្លួន ។
បើយោងតាមស្តង់ដារ CS 548:2017 បរិមាណសារធាតុអ៊ីយ៉ូត មានប្រមាណពី៣០ ទៅ ៤០ មីក្រូក្រាម ក្នុងមួយគីឡូក្រាមអំបិល និងមនុស្សម្នាក់ត្រូវបរិភោគក្នុងរង្វង់ប្រមាណជា១០ ក្រាម ដើម្បីទ្រទ្រង់ដល់រាងកាយដូចជា៖ -ជួយបង្កើនការចងចាំ និងឆ្លាតវៃ-ជួយការពារជំងឺពកករ -ការពារជំងឺក្រិនក្រេះ -និងជំងឺស្លេកស្លាំងរបស់មាតា និងទារកជាដើម ។
លោកទេសរដ្ឋមន្រ្តី បានបានសង្កត់ធ្ងន់ថា អំបិលជាស្បៀងអាហារមានលក្ខណៈយុទ្ធសាស្ត្រ ដូច្នេះការថែរក្សាផ្ទៃក្រឡាធ្វើស្រែអំបិលជាការចាំបាច់មួយត្រូវគិតគូ ។ ក្នុងនោះ ការផលិត ការកែច្នៃនិងការវេចខ្ចប់អំបិល ត្រូវគោរពតាមស្តង់ដារគុណភាព អនាម័យត្រឹមត្រូវ និយាយដោយខ្លីអំបិលទាំងអស់ មិនថាអំបិលសម្រាប់បរិភោគឬ អំបិលសម្រាប់ឧស្សាហកម្ម សិប្បកម្ម ត្រូវចាប់បង្ខំឲ្យបញ្ចូលជាតិអ៊ីយ៉ូតចាប់ពីចុងខែមិថុនាឆ្នាំនេះតទៅ ។
ក្នុងនោះការនាំចូលអំបិលនិងការចរាចរណ៍អំបិលលើទីផ្សារ ត្រូវមានការត្រួតពិនិត្យតឹងរ៉ឹង ហើយបើពិនិត្យឃើញថា៖ អំបិលមិនមានបញ្ចូលជាតិអ៊ីយ៉ូត បញ្ចូលមិនគ្រប់តាមស្តង់ដារ ឬអំបិលមិនមានស្លាកសញ្ញាបញ្ចូលជាតិអ៊ីយ៉ូតដែលទទួលស្គាល់ដោយក្រសួងឧស្សាហកម្មនិងសិប្បកម្ម ត្រូវណែនាំ ដកហូត ឬពិន័យតាមច្បាប់និងអនុក្រឹត្យ ដែលបានកំណត់រួចហើយ។ ការសម្រេចការងារនេះបាន មានន័យថា៖យើងបានរួមចំណែកធំណាស់សម្រាប់ផលសេដ្ឋកិច្ច និង សង្គម ជាពិសេសគឺអនាគតកុមារយើង ដែលជាទំពាំងស្នងឫស្សី ត្រូវការអាហារូបត្ថម្ភបានគ្រប់គ្រាន់ ដើម្បីទទួលបានការលូតលាស់ផ្នែករាងកាយ និងបញ្ញាញាណវៀងវៃ ។
ជាមួយគ្នានេះ លោកទេសរដ្ឋមន្រី្ត ចម ប្រសិទ្ធ ក៏បានលើកឡើងពីភាពប្រឈមមួយចំនួន ដែលត្រូវការជំនួយពីដៃគូនានា ជាពិសេសអង្គការUNICEF មានដូចជា៖ការផ្ទេរបច្ចេកវិទ្យា ការបង្កើនផលិតភាព ការឧបត្ថម្ភគាំទ្រទៅលើម៉ាស៊ីនបញ្ចូលសារធាតុអ៊ីយ៉ូត និងផ្សព្វផ្សាយការយល់ដឹងពីសារសំខាន់នៃការបញ្ចូលសារធាតុអ៊ីយ៉ូតក្នុងអំបិលតាមប្រព័ន្ធផ្សព្វផ្សាយនានា ជាពិសេសតាមបណ្តាញព័ត៌មានទូរទស្សន៍ក្នុងស្រុក ។
សូមបញ្ជាក់ថា៖ ក្នុងឱកាសនោះ ក៏មានការពិភាក្សាលើកឡើងពីភាពប្រឈមនៃការផលិតអំបិលផងដែរ បើទោះបីតាមរយៈក្រសួងឧស្សាហកម្មនិងសិប្បកម្ម រាជរដ្ឋាភិបាលបានចេញគោលនយោបាយលើកទឹកចិត្តលើវិស័យផលិតអំបិលនេះជាច្រើនយ៉ាងណាក៏ដោយ ។ បញ្ហាចម្បងបំផុតគឺ៖ កត្តាអាកាសធាតុ បច្ចេកទេសផលិត និងកង្វះកម្លាំងពលកម្ម ដោយសារតម្លៃឈ្នួលថោកបើប្រៀបធៀបនិងការងារសំណង់ ។ ការងារនេះនឹងត្រូវលើកទៅពិភាក្សាបន្តទៀត ក្នុងគណៈកម្មការគោលនយោបាយសេដ្ឋកិច្ចនិងហិរញ្ញវត្ថុនាពេលខាងមុខ ៕
អត្ថបទ៖ cen
