សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានលើកឡើងចំពោះមុខស្នងការដ្ឋានគរបាលជាតិ ទាំង២៥រាជធានី-ខេត្តថា នគរបាលទាំងអស់មិនត្រូវបម្រើបក្សពួក និងក្រុមគ្រួសាររបស់ខ្លួនជាធំឡើយ ត្រូវបម្រើជាតិនិងប្រជាពលរដ្ឋជាធំ ។
សម្តេចក្រឡាហោម បានថ្លែងដូចនេះ នៅក្នុងពិធីប្រគល់រថយន្ដដល់ស្នងការដ្ឋាននគរបាល រាជធានី-ខេត្ត នៅថ្ងៃទី២៩ ខែមករា ឆ្នាំ២០២០ ។
សម្ដេច ស ខេង បន្តថា “តើនគរបាល គាត់បំពេញតួនាទីរបស់គាត់តាមវិជ្ជាជីវៈជានគរបាលឬអត់? ដូចម្ដេចទៅដែលហៅថា បំពេញតួនាទីវិជ្ជាជីវៈជានគរបាល ? មានន័យថា គាត់ស្មោះត្រង់តួនាទីរបស់គាត់ដើម្បីបម្រើជាតិ និងបម្រើប្រជាពលរដ្ឋ មិនមែនបម្រើដើម្បីខ្លួនយើង បក្សពួកយើង ក្រុមគ្រួសារយើងទេ គឺបម្រើផលប្រយោជន៍រួម ផលប្រយោជន៍ជាតិ និងប្រជាពលរដ្ឋ” ។
ជាមួយគ្នានោះ សម្តេចក្រឡាហោម ឱ្យមន្ត្រីនគរបាលជាតិទាំងអស់ត្រូវតាមដានព័ត៌មាននៅតាមបណ្តាញសង្គម ព្រោះជាប្រភពប្រភពព័ត៌មានដែលសមត្ថកិច្ចត្រូវតាមដាន និងពិនិត្យ ដោយព័ត៌មានខ្លះជាព័ត៌មានពិតដែលសមត្ថកិច្ចមិនអាចដឹង ដែលត្រូវចុះទៅពិនិត្យផ្ទាល់ ស្រាយឱ្យភ្លាមៗ មិនត្រូវទុកបង្អង់យូរឡើយ ៕
អត្ថបទ៖ CPC
