រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ បានថ្លែងថា នៅក្នុងឆ្នាំ២០១៩ ជាពិសេសក្នុងរយៈពេល ២ខែចុងក្រោយ សេដ្ឋកិច្ចពិភពលោក បានធ្លាក់ចុះយ៉ាងខ្លាំង ក្នុងនោះកម្ពុជាអាច នឹងថមថយធ្លាក់ចុះបន្តិចបន្តូច តែកម្ពុជានៅតែអាចឈរក្នុងរង្វង់ប្រមាណ ៧% ពោលគឺឈរខ្ពស់ជាងគេ នៅក្នុងអាស៊ាន និងនៅក្នុងពិភពលោក ។
ឯកឧត្តម វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានលើកឡើង នៅក្នុងវេទិកាសាធារណៈ ស្តីពីការគ្រប់គ្រងម៉ាក្រូសេដ្ឋកិច្ច និងច្បាប់ថវិកា ឆ្នាំ២០២០ នៅថ្ងៃទី ៣០ ខែមករា ឆ្នាំ២០២០ នេះថា ពាក់ព័ន្ធ នឹងស្ថានភាព បើតាមការវាយតម្លៃពិភពលោក ចាប់ពីខែវិច្ឆិការ ឆ្នាំ២០១៩
សេដ្ឋកិច្ចពិភពលោកបានស្រុតចុះយ៉ាង ខ្លាំង តែមកដល់ពេលនេះ បានងើបឡើងបន្តិចវិញហើយ គឺដោយការដោះស្រាយជម្លោះពាណិជ្ជកម្ម រវាងអាមេរិក និងចិនបានត្រូវរ៉ូវគ្នាឡើងវិញ, ក្នុងនោះចំពោះការត្រូវគ្នា រវាងចិន និងអាមេរិកនេះ ឯកឧត្តម វង្សី វិស្សុត បានចាត់ទុក ថា វាជាលក្ខណៈបណ្តោះអាសន្នប៉ុណ្ណោះ ព្រោះទំនាស់រវាងប្រទេសទាំងពីរ គឺជាទំនាស់ផលប្រយោជន៍យូរអង្វែង ប៉ុន្តែទោះបីយ៉ាងណា វាអាចជួយដោះស្រាយក្នុងពេលស្ថានភាពបច្ចុប្បន្ន ។
ឯកឧត្តម បន្តថា ស្ថិតក្នុងស្ថានភាពនេះ សេដ្ឋកិច្ចពិភពលោក បានងើបឡើងបន្តិចមកវិញ តែសេដ្ឋកិច្ចពិភព លោក បានបន្តធ្លាក់ចុះខុសពីការគ្រោងទុក ក្នុងនោះដោយយើងមិនទាន់គិតបញ្ចូល ព្រឹត្តិការដែលទើបកើតឡើង ពីកត្តាវូហានវីរ៉ុសនៅឡើយ គឺនៅចំប្រទេសមហាអំណាចចិនផ្ទាល់ ដែលជាអ្នករកស៊ីពាណិជ្ជលេខ១ ក្នុងពិភព លោក ដូច្នេះវានឹងអាចជះឥទ្ធិពល ខ្លះៗជាមិនខាន ។
ចំពោះស្ថានភាពកម្ពុជាវិញ ឯកឧត្តម បានបញ្ជាក់ថា នៅក្នុងឆ្នាំ២០១៩ កន្លងមកនេះ ខណៈសេដ្ឋកិច្ចពិភព លោកបន្តកំណើនសេដ្ឋកិច្ចយឺត ចំពោះស្ថានភាពនៅកម្ពុជា នៅតែឈរក្នុងលំដាប់រឹងមាំ គឺឈរក្នុងកំណើនរង្វង់ ប្រមាណ ៧% ពោលគឺឈរខ្ពស់ជាងគេ នៅក្នុងអាស៊ាន និងនៅក្នុងពិភពលោកផងដែរ ។
ឯកឧត្តម វង្សី វិស្សុត បានបន្តថា ខណៈសេដ្ឋកិច្ចពិភពលោកបានធ្លាក់ចុះ កម្ពុជាអាចនៅឈរក្នុងលំដាប់រឹងមាំ, ជាក់ស្តែងអតិផរណាបានបន្តក្នុងកម្រិតទាប ១,៨%, និងភាពអត់ការងារធ្វើស្ទើរតែសូន្យភាគរយ, ក្នុងនោះចំពោះ កំណើននៃការនាំចេញ សម្រាប់វិស័យខាងក្រៅ ស្ថិតក្នុងប្រមាណ ១៥% គឺបានឈរក្នុងលំដាប់រឹងមាំយ៉ាងខ្លាំង, ក្នុង នោះសម្រាប់អ្វីដែលអស្ចារ្យ កម្ពុជាមានទុនវិនិយោគបរទេស នៅក្នុងឆ្នាំ២០១៩ បានកើនប្រមាណ ១៣% នៃ GDP បើគិតជាទឹកប្រាក់មានប្រមាណជា ៣៦០០លានដុល្លារអាមេរិក ក្រៅពីនេះមានការលំហូរសាច់ប្រាក់យ៉ាងល្អផងដែរ៕
អត្ថបទ៖ btv
