យោងតាមគេហទំព័រ China Xinhuoa News បានចុះផ្សាយកាលពីថ្ងៃអាទិត្យ ទី២ ខែកុម្ភៈ ឆ្នាំ២០២០នេះថា គណៈកម្មការសុខភាពជាតិចិន (NHC) បានប្រកាសចំនួនអ្នកជំងឺរលាកសួតកូរ៉ូណាប្រភេទថ្មី បានកើនឡើងចំនួន១៤,៣៨០នាក់ហើយ ក្នុងនោះចំនួនអ្នកស្លាប់ បានឈានដល់៣០៤នាក់ (Update: 01-Feb-2020)។
តាមសេចក្តីលំអិតបន្ថែមបានឲ្យដឹងទៀតថា អ្នកជំងឺទាំងនោះ ស្ថិតនៅតាមតំបន់ចំនួន៣១តំបន់ផ្សេងៗគ្នានៅក្នុងប្រទេសចិន ក្នុងនោះចំនួនអ្នកជំងឺដែលមានសភាពធ្ងន់ មានចំនួន២៩១០នាក់ ហើយជនសង្ស័យដែលមានឆ្លងជំងឺរលាកសួតកូរ៉ូណា មានរហូតដល់ទៅ ១៩,៥៤៤នាក់ ចំណែកអ្នកជំងឺដែលព្យាបាលហើយ បានជាសះស្បើយនោះ មានចំនួន៣២៨នាក់។
ទោះជាយ៉ាងណា អ្វីដែលធ្វើឲ្យប្រជាជនទូទាំងពិភពលោក កាន់តែមានការភ័យខ្លាច និងព្រួយបារម្ភថែមមួយកំរិតទៀតនោះ គឺគណៈកម្មការសុខភាពជាតិចិន បានបញ្ជាក់ពីមេរោគផ្តាសាយប្រភេទចាស់ H5N1 បានផ្ទុះឡើងសារជាថ្មី នៅក្នុងទីក្រុងនៃខេត្តហួណាន ប្រទេសចិន បន្ទាប់ពីគេប្រទះឃើញសត្វមាន់ នៅក្នុងកសិដ្ឋានបានងាប់ចំនួន៤,៥០០ក្បាល ក្នុងចំណោមមាន់ ៧,៨៥០ក្បាល ព្រោះតែឆ្លងជំងឺ H5N1។
ខណៈពេលនេះ អាជ្ញាធរចិន បានធ្វើការសម្លាប់មេរោគ និងកប់សត្វស្លាបចោលចំនួន១៧,៨២៨ក្បាល ដើម្បីមិនឲ្យមេរោគផ្តាសាយ H5N1 រីករាលដល់កាន់តែខ្លាំង ទៅកាន់តំបន់ផ្សេងៗផងដែរ ៕
អត្ថបទ៖ kbn
