និស្សិតខ្មែរម្នាក់ដែលកំពុងបន្ដការសិក្សានៅទីក្រុងវូហាន ប្រទេសចិន ទីដែលកំពុងផ្ទុះជំងឺផ្លូវដង្ហើមធ្ងន់ធ្ងរ បង្កដោយវីរុសកូរ៉ូណា បានបង្ហោះសារបង្ហាញពីមានអារម្មណ៍រំភើប និងកក់ក្តៅក្នុងចិត្តយ៉ាងខ្លាំង ក្រោយទទួលដំណឹងថា សម្ដេចនាយករដ្ឋមន្ដ្រី ហ៊ុន សែន គ្រោងអញ្ជើញទៅសួរសុខទុក្ខ និស្សិតដោយផ្ទាល់នៅកន្លែងផ្ទុះជំងឺ ប្រសិនបើខាងរដ្ឋាភិបាលចិនអនុញ្ញាត។
ក្នុងឱកាសជួបសំណេះសំណាលប្រជាពលរដ្ឋខ្មែររស់នៅ និងធ្វើការងារ នាទីក្រុងសេអ៊ូល ប្រទេសកូរ៉េខាងត្បូង កាលពីថ្ងៃទី០៣ ខែកុម្ភៈ ឆ្នាំ២០២០ម្សិលមិញ សម្ដេចនាយករដ្ឋមន្ដ្រី ហ៊ុន សែន បានប្រកាសថា សម្ដេចនឹងអញ្ជើញទៅសួរសុខទុក្ខដោយផ្ទាល់ និស្សិតខ្មែរដែលកំពុងសិក្សានៅទីក្រុងវូហាន ទីដែលផ្ទុះជំងឺរលាកសួត ប្រសិនបើរដ្ឋាភិបាលចិនអនុញ្ញាត។
និស្សិតខ្មែរកំពុងបន្ដការសិក្សានៅទីក្រុងវូហាន ប្រទេសចិន ដែលមានគណនី Facebook ឈ្មោះ ប៉ែន បារាំង នៅព្រឹកថ្ងៃទី០៤ ខែកុម្ភៈ ឆ្នាំ២០២០នេះបានបង្ហោះសារថា «ទើបតែបានចែកអាហារពេលព្រឹកដល់មិត្តបរទេសរួច លោកពុក ជាទីគោរព កូនបានស្ដាប់ប្រសាសន៍ដែលថា លោកពុកមានគម្រោងអញ្ជើញមកសួរសុខទុក្ខពួកកូន តែកូនគិតថា លោកពុកមានភារកិច្ចត្រូវបំពេញសម្រាប់គ្រួសារមានច្រើន ទាំងក្នុងផ្ទះ និងក្រៅផ្ទះ បានស្ដាប់សាររបស់លោកពុកប៉ុណ្ណឹង កូនមានអារម្មណ៍ថាកក់ក្ដៅ និងគ្រប់គ្រាន់។
ពួកកូនអាចឈឺបាន តែលោកពុកមិនអាចឈឺបានទេ ព្រោះលោកពុកត្រូវមានភារកិច្ចជាច្រើន ដែលចាំបាច់ត្រូវការលោកពុកដើម្បីដោះស្រាយ ហើយការជួបសួរសុខទុក្ខ ចាំពួកកូនរៀនចប់ត្រលប់ទៅផ្ទះយើងវិញ ចាំជួបជុំគ្នាក៏បានដែរ។ ពួកកូន នឹងថែទាំសុខភាពឲ្យបានល្អ និងប្រុងប្រយ័ត្នខ្ពស់ និងសហការជាមួយរដ្ឋបាលសាលាឲ្យបានល្អបំផុត»៕
អត្ថបទ៖ kbn
