កម្លាំងសមត្ថកិច្ចអាជ្ញាធរខណ្ឌទួលគោក បានចុះរឹតបន្តឹងនូវការងាររៀបចំធ្វើសណ្ដាប់ធ្នាប់ នៅតាមដងផ្លូវក្នុងមូលដ្ឋានរបស់ខ្លួន គ្រប់គ្រង ខណៈពេលនោះដោយមានឡានមួយចំនួនដោយឈប់ចតមិនត្រឹមត្រូវ គ្មានរបៀបរៀបរយយ៉ាងអាណាធិបតេយ្យពាសវាលពាសកាលពេញៗផ្លូវ យ៉ាងអាក្រក់មើលបំផុតនោះ ត្រូវកម្លាំងសមត្ថកិច្ចអាជ្ញាធរខណ្ឌទួលគោក ចាប់ដាក់ខ្នោះកង់មុខឡានយកទៅរក្សាទុកនៅសាលាខណ្ឌផងដែរ ដើម្បីឲ្យម្ចាស់ឡានចូលខ្លួនទៅដោះស្រាយ។
គេសង្កេតឃើញថាមានឡាន របស់គណៈបញ្ជាការឯកភាពខណ្ឌច្បារអំពៅមួយគ្រឿង ដែលចតលើចិញ្ចើមផ្លូវផ្តេសផ្តាស់ ត្រូវបានកងកម្លាំងសមត្ថកិច្ចអាជ្ញាធរខណ្ឌទួលគោក ចាប់ដាក់ខ្នោះកង់មុខឡាន ទុកជាការព្រមានដែលធ្វើឲ្យគណៈបញ្ជាការឯកភាពខណ្ឌច្បារអំពៅ អាក់អន់ចិត្ត ចំពោះអាជ្ញាធរដូចគ្នាំ ពិសេសថ្នាក់ដឹកនាំខណ្ឌយកមុខទៅទុកនៅឯណា នៅពេលអាជ្ញាធរខណ្ឌដូចគ្នា ចុះចាប់ឡានខណ្ឌរបស់ខ្លួន ដាក់ខ្នោះនៅតាមដងផ្លូវជាសាធារណៈ។
មហាជនលើកឡើងថា កន្លងមក ឬបច្ចុប្បន្ន សង្កេតឃើញកម្លាំងសមត្ថកិច្ចអាជ្ញាធរខណ្ឌច្បារអំពៅ ធ្លាប់តែចុះចាប់ឡានគេឯងគ្រប់ប្រភេទ នៅតាមផ្លូវនានា ក្នុងមូលដ្ឋានខ្លួនគ្រប់គ្រង ដោយយកលេសថាឈប់ចតឬដឹកសំពីងសំពោង មិនត្រឹមត្រូវដោយគ្មានការលើកលែងឡើយ ទោះបីម្ចាស់ឡាននីមួយៗ សុំអង្វរកយ៉ាងណាក៏ដោយ គឺអូសយកមកសាលាខណ្ឌ ធ្វើការផាកពិន័យជាលុយយ៉ាងចាស់ដៃ ដោយគ្មានក្ដីមេត្តាឡើយ។ ចុះនៅពេលនេះ នៅពេលអាជ្ញាធរខណ្ឌផ្សេង ចុះចាប់ឡានខណ្ឌរបស់ខ្លួនវិញនោះ តើយល់ពីអារម្មណ៍ខ្លួនឯងយ៉ាងណាដែរ ដែលកន្លងមកធ្លាប់ធ្វើបាបគេឯងនោះ។
មហាជនទូទៅលើកសរសើរ មិនដាច់ពីមាត់ពីចំណាត់ការដ៏តម្លាភាព របស់អាជ្ញាធរខណ្ឌទួលគោក ក្នុងការចុះរឹតបន្តឹងការងារសណ្ដាប់ធ្នាប់ តាមដងផ្លូវនានា ក្នុងមូលដ្ឋានខ្លួនគ្រប់គ្រងឲ្យមានរបៀបរៀបរយល្អ ហើយខណៈពេលឡានមួយចំនួនឈប់ចតមិនត្រឹមត្រូវ ក៏ចាប់ដាក់ខ្នោះកង់ឡានខាងមុខទុកជាការព្រមាន ដល់ម្ចាស់ឡានក្នុងនោះមានឡាន គណៈបញ្ជាការឯកភាពខណ្ឌច្បារអំពៅមួយគ្រឿង៕
អត្ថបទ៖ cen
