លោកឌី ខាំបូលី អ្នកនាំពាក្យក្រសួងអប់រំ យុវជន និងកីឡា បានលើកឡើងនៅក្នុងសន្និសីទសារព័ត៌មាន ដែលរៀបចំឡើងដោយអង្គភាពអ្នកនាំពាក្យរាជរដ្ឋាភិបាលកម្ពុជាស្តីពី«វឌ្ឍនភាព និងទិសដៅការងារបន្តរបស់ក្រសួងអប់រំ » នៅព្រឹកថ្ងៃទី១០ ខែកុម្ភៈថា ក្រសួងនឹងចាត់វិធានការជាបន្តបន្ទាប់ ចំពោះគ្រូបង្រៀនរូបណា ដែលប្រមូលលុយពីសិស្ស ទោះបីជាក្រោមហេតុផលណាមួយក៏ដោយ ។លោកបន្ថែមថា ជាគោលការណ៍ក្រសួងអប់រំ មិនអនុញ្ញាតឲ្យយកថ្លៃសិក្សា ពីសិស្សនោះទេ។
ចំពោះការលើកឡើង របស់លោកឌី ខាំបូលី ខាងលើនេះ ត្រូវបានលោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ បញ្ជាក់ប្រាប់វិទ្យុវាយោតាមទូរស័ព្ទនៅថ្ងៃទី១១ ខែកុម្ភៈថា បើក្រសួងមិនចង់ឃើញសកម្មភាពគ្រូបង្រៀនប្រមូលលុយពីសិស្សនោះ គឺត្រូវតែយកចិត្តទុកដាក់ ពីជីវភាពរបស់គ្រូបង្រៀន ព្រមទាំងបញ្ចេញកញ្ចប់ថវិកាដល់សាលាដើម្បីផ្គត់ផ្គង់សម្ភារៈ និងបច្ចេកទេស …
ជាមួយគ្នានេះដែរ លោកស្រីក៏បានបន្ថែមថា ការលើកឡើងរបស់អ្នកនាំពាក្យក្រសួងអប់រំ គ្រាន់តែល្អមើលតែប៉ុណ្ណោះ ទោះបីជាក្រសួងដាក់ចេញសារាចរ ក៏ដូចជាវិធានការបែបបណាក៏ដោយក៏មិនមានប្រសិទ្ធិភាពដែរ ព្រោះវាបានក្លាយទៅជាវប្បធម៌ទៅហើយ។
ទាក់ទងទៅនឹងបញ្ហានេះដែរ លោកឌី ខាំបូលី ក៏បានទទួលស្គាល់ដែរថា សព្វថ្ងៃនេះពិតជាមានការយកលុយពីសិស្ស នៅតាមសាលារៀនមួយចំនួនតូចពិតប្រាកដមែន ហើយចំពោះការរាយការណ៍ពីសកម្មភាពយកលុយពីសិស្ស បើសិនមានការសហការ ពីគ្រប់មជ្ឈដ្ឋាននានានោះ គឺជារឿងដែលក្រសួងចង់បានបំផុត។
លោកបានបន្តថា មកដល់ពេលបច្ចុប្បន្ន កម្ពុជាមានសាលារៀននៅទូទាំងប្រទេសសរុប ១៤,៥២២សាលា រាប់ចាប់ពីមត្តេយ្យសិក្សា ដល់ថ្នាក់វិទ្យាល័យ ក្នុងនោះសាលារដ្ឋមានចំនួន ១៣,៣០០សាលា។ ដោយឡែក គ្រឹះស្ថានបណ្តុះបណ្តាលថ្នាក់ឧត្តមសិក្សា និងក្រោយឧត្តមសិក្សា
ដែលរួមមានសាកលវិទ្យាល័យ និងវិទ្យាស្ថាននោះ មានចំនួន ១២៥សាលា ក្នុងនោះរដ្ឋមានចំនួន៤៨ហើយសិស្សដែលកំពុងសិក្សាពីថ្នាក់មត្តេយ្យ ដល់ឧត្តមសិក្សាមានជាង ៣លាននាក់ សិស្សជានារីមានជាង ៤៩ភាគរយ។ ក្នុងនោះសិស្សកំពុងសិក្សាថ្នាក់ឧត្តមសិក្សា និងក្រោយឧត្តមសិក្សាមានជាង ២១ម៉ឺននាក់។ បច្ចុប្បន្នមានបុគ្គលិកអប់រំទាំងអ្នកបង្រៀន និងអ្នកបម្រើការងារលើវិស័យអប់រំមានចំនួនសរុបជាង ១២ម៉ឺននាក់ ក្នុងនោះអ្នកបង្រៀនមានជាង ៩ម៉ឺននាក់៕
អត្ថបទ៖ វាយោ
