ប្រមុខអង្គការសុខភាពពិភពលោក ហៅកាត់ WHO លោក Tedros Adhanom Ghebreyesus បានប្រកាសថា ការផលិតវ៉ាក់សាំងសម្រាប់វីរុសកូរ៉ូណាថ្មី ដែលទើបតែមានឈ្មោះជាផ្លូវការ Covid-19 អាចនឹងត្រូវបានផលិតរួចរាល់ នៅក្នុងរយៈពេល១៨ខែទៀត ខណៈចំនួនអ្នកស្លាប់នៅក្នុងប្រទេសចិននៅតែបន្តកើនឡើង ។ នេះបើតាមការចេញផ្សាយដោយសារព័ត៌មានចិន ស៊ីនហួរ នៅព្រឹកថ្ងៃទី១២ កុម្ភៈ នេះ ។
ប្រធានអង្គការសុខភាពពិភពលោក និយាយថា វ៉ាក់សាំងដំបូងសម្រាប់ជំងឺ Covid-19 ដែលបានចាប់ផ្តើមពីឆ្នាំ២០១៩ អាចនឹងរួចរាល់ក្នុងរយៈពេល១៨ខែខាងមុខទៀតនេះ ព្រោះថា ការអភិវឌ្ឍ និងផលិតវ៉ាក់សាំង ព្រមទាំងវិធីសាស្ត្រព្យាបាល គឺជាផ្នែកមួយដ៏សំខាន់នៃរបៀបវារៈក្នុងការសិក្សាស្រាវជ្រាវ ដូច្នេះវាត្រូវការពេលវេលាខ្លះ ។ នៅក្នុងរយៈពេលដែលមិនទាន់មានវ៉ាក់សាំង ប្រទេសទាំងឡាយគួរតែប្រើប្រាស់វិធានការ ដែលខ្លួនកំពុងអនុវត្តក្នុងការប្រយុទ្ធប្រឆាំងនឹងវីរុស Covid-19 នេះ ។
អត្ថបទ៖ kbn
