កាលពីថ្ងៃទី១៥ ខែកុម្ភៈ ឆ្នាំ២០២០ ក្រសួងសុខាភិបាលម៉ាឡេស៊ី បានចេញសេចក្ដីប្រកាសព័ត៌មានថា មានស្រ្ដីជនជាតិអាមេរិក វ័យ៨៣ឆ្នាំ មានផ្ទុកវីរុស COVID-19 ស្រ្ដីនោះគឺជាមនុស្សនៅក្នុងចំនោមអ្នកដំណើរដែលបានចាកចេញពីនាវាទេសចរណ៌ខ្នាតយក្ស Westerdam ដែលកម្ពុជាបានអនុញ្ញាតឲ្យចូលចតនៅកំពង់ផែក្រុងព្រះសីហនុ កាលពីថ្ងៃទី១៣ ខែកុម្ភៈ ឆ្នាំ២០២០ បន្ទាប់ពីត្រូវបានបដិសេធដោយប្រទេសមួយចំនួនមិនឲ្យចូលចត។ នេះបើយោងតាមការចុះផ្សាយរបស់សារព័ត៌មាន CNA ។
អគ្គនាយកសុខាភិបាលម៉ាឡេស៊ីលោក Noor Hisham Abdullah មានប្រសាសន៍ថា“ រដ្ឋាភិបាលកម្ពុជាបានអនុញ្ញាតឱ្យអ្នកដំណើរ និងសមាជិកនាវិកទាំងអស់វិលត្រឡប់ទៅប្រទេសកំណើតវិញបន្ទាប់ពីបានប្រកាសថាការត្រួតពិនិត្យសុខភាពត្រូវបានអនុវត្តយ៉ាងត្រឹមត្រូវម៉ត់ចត់” ។ លោកបានអះអាងទៀតថា ក្នុងចំណោមអ្នកដំណើរ ១៤៥នាក់ នៃនាវាទេសចរណ៍ដែលបានធ្វើដំណើរទៅកាន់ប្រទេសម៉ាឡេស៊ីកាលពីថ្ងៃសុក្រ នោះនាងនិងប្ដីត្រូវបានគេរកឃើញមានរោគសញ្ញាវីរុស COVID-19 បន្ទាប់ពីបានធ្វើដំណើរមកដល់អាកាសយានដ្ឋានអន្តរជាតិគូឡាឡាំពួរ។
ភ្លាមៗនោះក្រសួងសុខាភិបាលម៉ាឡេស៊ី បានបញ្ជូនពួកគេទៅកាន់មន្ទីរពេទ្យ Sungai Buloh ដើម្បីធ្វើការត្រួតពិនិត្យបន្តទៀត លទ្ធផលក៏បានបង្ហាញថាប្ដីអាយុ៨៥ឆ្នាំ គឺអវិជ្ជមាន ចំណែកនាងគឺវិជ្ជមាន ហើយឥឡូវនេះស្ថានភាពសុខភាពរបស់នាងមានអាការៈល្អទេ ប៉ុន្តែនាងត្រូវបានគេដាច់ឲ្យនៅដាច់ដោយឡែកពីគេដើម្បីរង់ចាំពិនិត្យមើលបន្តទៀត។ នេះបើតាមការការលើកឡើងរបស់លោកNoor Hisham Abdullah ។
ជាមួយគ្នានេះដែរ ក្រសួងសុខាភិបាលកម្ពុជា មានការមិនអស់ចិត្តចំពោះលទ្ធផលដែលបានបង្ហាញបែបនេះ ពីព្រោះខ្លួនបានពិនិត្យច្បាស់ទៅលើភ្ញៀវទេសចរចំនួន២០នាក់ គឺគ្មាននរណាម្នាក់គ្មានវីរុសកូរ៉ូណា COVID 19 ទេ។ ដើម្បីឲ្យមានភាពសុក្រិត ក្រសួងក៏បានចេញសេចក្ដីប្រកាសព័ត៌មានទាំងកណ្តាលអធ្រាត្រ នៅថ្ងៃទី១៥ ខែកុម្ភៈ ក្រសួងសុខាភិបាលកម្ពុជា ស្នើឲ្យអាជ្ញាធរម៉ាឡេស៊ី «ពិនិត្យឡើងវិញ» អំពីលទ្ធផលនៃការធ្វើតេស្ត៍លើស្ត្រីជនជាតិអាមេរិករូបនោះ ៕
អត្ថបទ៖ kbn
