កាលពីថ្ងៃសុក្រ ទី១៤ ខែកុម្ភៈ មានអ្នកដំណើរ១៤៥នាក់ ដែលបានចាកចេញពីនាវាទេសចរណ៌ខ្នាតយក្ស Westerdam ហើយបានជិះយន្ដហោះពីប្រទេសកម្ពុជា ដើម្បីបន្តដំណើរទៅកាន់ក្រុងគូឡាឡាំពួរ ប្រទេសម៉ាឡេស៊ី។ ជាមួយគ្នានេះដែរ ក្រសួងសុខាភិបាលម៉ាឡេស៊ី បានតេស្តឃើញវិជ្ជមានមេរោគកូរ៉ូណាវីរុសប្រភេទថ្មី (COVID-19) លើស្ត្រីអាមេរិកវ័យ៨៣ឆ្នាំម្នាក់ ខណៈស្វាមីរបស់គ្មានរោគសញ្ញាឡើយ។
ឧបនាយករដ្ឋមន្ត្រីម៉ាឡេស៊ីលោកស្រី Wan Azizah Wan Ismail បានធ្វើសន្និសីទសារព័ត៌មាននៅថ្ងៃអាទិត្យនេះ ដោយបានបញ្ជាក់ថា«អ្នកដំណើរនៅលើនាវា Westerdam ផ្សេងទៀតដែលស្ថិតនៅកម្ពុជានៅឡើយ មិនត្រូវបានអនុញ្ញាតឲ្យចូលម៉ាឡេស៊ីនោះទេ»។
ការកំហិតបែបនេះ បន្ទាប់ពីម៉ាឡេស៊ី នៅតែពិនិត្យឃើញវិជ្ជមាន COVID-19 លើស្ត្រីអាមេរិកវ័យ៨៣ឆ្នាំ ជាលើកទីពីរ បន្ទាប់ពីទទួលបានសំណើរពីភាគីកម្ពុជា។ ក្នុងសំណើរបស់ខ្លួន កម្ពុជា បានអះអាងពីការពិនិត្យសុខភាពយ៉ាងដិតលើអ្នកដំណើរដល់ ក្រោមកិច្ចសហការជាមួយអង្គការសុខភាពពិភពលោក និងមជ្ឈមណ្ឌលកម្ចាត់ជំងឺឆ្លងសហរដ្ឋអាមេរិក (USCDC)។
បើលោកស្រី Wan Azizah ក្រុមហ៊ុន Malaysia Airlines មានកម្មវិធីដឹកនាំអ្នកដំណើរពីកម្ពុជា៤ជើងចន្លោះពីថ្ងៃទី១៤ ដល់ថ្ងៃទី១៦ ខែកុម្ភៈ ដោយពេលនេះ មានអ្នកដំណើរ១៤៥នាក់ពីនាវា Westerdam បានជិះទៅដល់ម៉ាឡេស៊ីតាមជើងហោះហើរ MH8763។
ក្នុងចំណោមអ្នកដំណើរទាំង១៤៥នាក់ដែលបានទៅដល់ម៉ាឡេស៊ី មាន២នាក់ដែលបង្ហាញរោគសញ្ញា ហើយត្រូវបានបញ្ជូនទៅមន្ទីរពេទ្យ Sungai Buloh។ ប៉ុន្តែលទ្ធផលមានតែស្ត្រីជាភរិយាប៉ុណ្ណោះដែលមានវត្តមាន COVID-19 ៕
អត្ថបទ៖ kbn
