មួយរយៈចុងក្រោយនេះ កសិករខ្មែរបាននាំគ្នាប្រមូលភោគផលដំណាំរបស់ខ្លួន ដែលមានដូចជាត្រសក់ស្រូវ ស្ពៃក្ដោប ត្រសក់ផ្អែម ប៉េងប៉ោះ និង ត្រប់ ជាដើម ប៉ុន្ដែកសិករទាំងនោះ បែរជានាំគ្នារអ៊ូរទាំ និង ថតបង្ហោះត្អូញត្អែរនៅលើបណ្ដាញសង្គមថា ផលដំណាំបានប្រមូលមកហើយបែរជាមិនសូវមានទីផ្សារ ឬសក់បានក្នុងតម្លៃថោកខ្លាំង ។
តួយ៉ាងខណៈមានការត្អូញត្អែរទាំងនោះ ថ្មីៗនេះស្រាប់តែបងប្អូនអ្នកភូមិ ព្រែកត្រប់ ឃុំព្រែកនរិន្ទ ស្រុក ឯកភ្នំ ខេត្តបាត់ដំបង បានបង្ហោះសារអំពាវនាវដល់មហាជនតាមរយៈបណ្ដាញសង្គមហ្វេសប៊ុកដដែល សុំឱ្យបងប្អូនជួយទិញដំណាំត្រឡាច ដែលបានប្រមូលផលមក សក់បានតម្លៃត្រឹមតែ ១ គីឡូ ៥០ រៀល ។
បើតាមគណនីហ្វេសប៊ុកឈ្មោះ Master King Man បានរៀបរាប់ឱ្យដឹងថា ផលដំណាំត្រឡាចរបស់អ្នកភូមិរបស់ខ្លួនខាងលើ លក់បាន ១ គីឡូតែ ៥០ រៀលប៉ុណ្ណោះ មួយថង់ ១០ គីឡូ បានតែ ៥០០ រៀលទេ ។ លោកនៅបន្តទៀតថា «អាសូរអ្នកភូមិខ្ញុំ ពេលចុះធ្វើចម្ការ ខ្ចីលុយគេធ្វើដើមទន់ រំពឹងថានឹងបានផលពីការលក់ផលិតផលកសិកម្ម យកលុយសងគេវិញ ចុះបើតម្លៃថោកយ៉ាងហ្នឹង តើបានលុយពីណាសងគេវិញ?» ៕
អត្ថបទ៖ ប្រជាប្រិយ
