លោក ឃុន យ៉ាន អធិការរងនគរបាលស្រុកសំរោង ខេត្តតាកែវ ត្រូវប្រភពអះអាងថា បានពន្យារអាយុអស់រយៈពេល៣ឆ្នាំជាប់គ្នា មិនព្រមចូលនិវត្តន៍ ដោយមានសម្របសម្រួលជួយជ្រោមជ្រែងពីលោកសុខ សំណាង ស្នងការនគរបាលខេត្តតាកែវ ក្រោមលេសថា គ្មានមនុស្សធ្វើការ ដូច្នេះមានតែប្រើគាត់បណ្តោះអាសន្នសិនទៅ ។
ប៉ុន្តែក្រុមមន្ត្រីនគរបាលស្រុកសំរោង ខេត្តតាកែវ មិនពេញចិត្តចំពោះចំណាត់ការនេះទេ ពីព្រោះថា បើដល់អាយុចូលនិវត្តន៍ហើយនោះ គួរតែអនុវត្តទៅតាមច្បាប់ ។ប្រភពពីមន្ត្រីនគរបាលខេត្តតាកែវអះអាងថា លោកអធិការរងស្រុកសំរោងឈ្មោះ ឃុន យ៉ាន តែងតែបានពន្យារអាយុមួយឆ្នាំម្តង ដោយសារការសម្របសម្រួលពីលោក សុខ សំណាងអធិការនគរបាលខេត្តតាកែវ ។
ហើយអ្វីដែលធ្វើឲ្យក្រុមមន្ត្រីនគរបាលស្រុកសំរោង ហួសចិត្តនោះ គឺការដែលគាត់អាចពន្យារអាយុមួយឆ្នាំហើយមួយឆ្នាំទៀត, ម្តងហើយម្តងទៀត ។ ការដែលគាត់អាចធ្វើយ៉ាងដូច្នេះបាន ក៏ព្រោះតែដោយសារតែមានខ្សែបណ្តោយ និងខ្សែទទឹង ចាំជួយ ។
ពោលគឺបើគ្មានការបិទភ្នែកសម្របសម្រួលពីលោកស្នងការនគរបាលខេត្តទេ ក៏លោកឃុន យ៉ាន គ្មានឱកាសនៅធ្វើការរហូតដល់ទៅ៣ឆ្នាំយ៉ាងដូច្នោះដែរ។តាមសេចក្តីរាយការណ៍បានឲ្យដឹងថា លោក ឃុន យ៉ាន បានចំណាយសេវាជាច្រើនជូនថ្នាក់ដឹកនាំប្រយោជន៍ ដើម្បីបាននៅធ្វើការ ច្នេះមានតែឲ្យលោក ឃុន យ៉ាន នៅធ្វើការជាបន្តទៅទៀត បើទោះបីជាគាត់លើសអាយុច្រើនហើយក៏ដោយ ។
គេមិនដឹងថា តើជាគោលការណ៍ ក្រសួងមហាផ្ទៃអាចឲ្យមន្ត្រីនគរបាលពន្យារអាយុរហូតដល់ទៅ៣ឆ្នាំនោះឬយ៉ាងណាទេ ។ប៉ុន្តែករណីនេះ ក្រសួងមហាផ្ទៃ គួរពិនិត្យរឿងអធិការរងស្រុកសំរោង ដែលពន្យារអាយុបាន៣ឆ្នាំជាប់គ្នា មិនព្រមចូលនិវត្តន៍។ ព្រោះថា មានមន្ត្រីនគរបាលក្មេងៗ មានសមត្ថភាពច្រើនណាស់នៅចាំទទួល ៕
អត្ថបទ៖ អរិយធម៌
