សេចក្ដីរាយការណ៍បានឲ្យដឹងថានៅខេត្តសៀមរាប កំពុងកើតមានសកម្មភាព ដឹកជញ្ជូនឈើ យ៉ាងអនាធិបតេយ្យ ដោយក្រុមឈ្មួញប្រើរូបភាពផ្សេងៗគ្នា ក្នុងការដឹកជញ្ជូន ក្នុងនោះដែររថយន្តពណ៌ត្រេអី ក៏សម្បូរក្លាយជារថយន្តដឹកជញ្ជូនឈើ យ៉ាងគគ្រឹកគ្រេងផងដែរ។ ប៉ុន្តែសកម្មភាពទាំងអស់នោះ មិនទាន់ត្រូវបានអាជ្ញាធរសមត្ថកិច្ច ខេត្តសៀមរាប ចេញមុខទប់ស្កាត់បង្ក្រាបនៅឡើយទេ។
យោងតាមសេចក្ដីរាយការណ៍បានឲ្យដឹងថាបុរសម្នាក់ តែងតែយករថយន្តពាក់ស្លាកលេខ ខ.ម យកមកដឹកឈើជារៀងរាល់ថ្ងៃដោយដឹកចេញពីទំនប់ខ្នុរ ស្រុកត្រពាំងប្រាសាទ ខេត្តឧត្តរមានជ័យ ឆ្លងកាត់ស្រុកស្វាយលើ ដើម្បីយកមកចែកចាយ តាមដេប៉ូនិងរោងសិប្បកម្មមួយចំនួននៅក្រុងសៀមរាប។
បណ្ដាញសារព័ត៌មានបានរាយការណ៍ថា ជាក់ស្ដែងនៅព្រឹកថ្ងៃទី១៩ខែកុម្ភៈឆ្នាំ២០២០វេលាម៉ោង៦និង៣០នាទីព្រឹកអ្នកសារព័ត៌មានបាន ប្រទះឃើញឃើញរថយន្តម៉ាក Ford ដែលមានពាក់ស្លាកលេខ: ខេមរៈភូមិន្ទ២:៥៥៧៦ ផ្ទូកឈើពេញស្មើទ្រុងខាងក្រោយតែម្តង។ ប៉ុន្តែមិនត្រូវបានអាជ្ញាធរជំនាញបង្ក្រាបនោះទេ។
ពាក់ព័ន្ធការដឹកជញ្ជូនឈើយ៉ាងពេញបន្ទុកចេញពីទឹកដីខេត្តឧត្តរមានជ័យ និងខេត្តព្រះវិហារ ចូលមកក្រុងសៀមរាប ជារៀងរាល់ថ្ងៃបែបនេះ គេនៅមិនទាន់ដឹងថា ជំនាញពាក់ព័ន្ធ បានដឹងដែរឬយ៉ាងណានោះទេ ខណ:តាមផ្លូវនីមួយៗ មានប៉ុស្ដិ៍សមត្ថកិច្ច បណ្ដាក់គ្នាដូចខ្យង ប៉ុន្តែសកម្មភាព ដឹកជញ្ជូនឈើ នៅតែអាចបើកឆ្លងកាត់បានដោយរលូន។
អង្គភាពបណ្ដាញសារព័ត៌មានសៀមរាបប៉ុស្ដិ៍ នៅមិនទាន់ទទួលបានការបកស្រាយពីអាជ្ញាធរជំនាញពាក់ព័ន្ធ នៅខេត្តសៀមរាប បាននៅឡើយទេរហូតមកដល់រសៀលថ្ងៃនេះ ជុំវិញសកម្មភាពដឹកជញ្ជូនឈើ ដែលកើតមានក្នុងទឹកដីខេត្តសៀមរាប៕
អត្ថបទ៖ សៀមរាបប៉ុស្តិ៍
