ទីភ្នាក់ងារព័ត៌មានវៀតណាម បានរាយការណ៍កាលពីថ្ងៃចន្ទ ទី១៧ កុម្ភៈ ម្សិលមិញនេះថាការផ្ទុះជំងឺផ្តាសាយបក្សី A/H5N1 ត្រូវបានគេរកឃើញ ក្នុងខេត្តត្រាវិញ នៅភាគខាងត្បូងប្រទេសវៀតណាម។
មន្ត្រីបសុសត្វ ក្នុងប្រទេសវៀតណាម បានបញ្ជាក់ ថាសត្វបក្សី របស់គ្រួសារចំនួន២ ក្នុងស្រុកកូវ ខេត្ដត្រាវិញ ត្រូវបានធ្វើតេស្ត៍ រកឃើញវីរុស A/H5N1 មានចំនួន ១,០០០ក្បាល ។
បន្ទាប់មក នាយកដ្ឋានបសុសត្វ បានណែនាំដល់គ្រួសារក្នុងតំបន់ ឱ្យសម្លាប់ចោលសត្វបក្សីក្នុងស្រុក (មាន់,ទា,ក្ងាន..) ពីរដងក្នុងមួយថ្ងៃ ចំនួន១សប្តាហ៍ ក្នុងគោលបំណងបង្ការការរីករាលដាល នៃវីរុសឆ្លង A/H5N1 ។
នៅឆ្នាំ២០២០នេះ ប្រទេសវៀតណាម បានរាយការណ៍ពីការផ្ទុះជំងឺផ្តាសាយបក្សី ចំនួន១៦លើក ក្នុងរយៈពេល២១ថ្ងៃ ក្នុងនោះមានការផ្ទុះឡើងនៃជំងឺ A/H5N6 ចំនួន១៤ករណី និងការផ្ទុះឡើង នៃជំងឺ A/H5N1 ចំនួន២លើក នៅទីក្រុងហាណូយ, ភាគខាងជើងខេត្តប៊ីកនីញ, ខេត្តថាញ់ហូ, ភាគកណ្តាលខេត្តង៉ែអាន និងភាគខាងត្បូង ខេត្តត្រាវិញ នេះ ។
ទីភ្នាក់ងារ នេះបានដកស្រង់សំដីនាយកដ្ឋានសុខភាពសត្វ នៅក្រោមក្រសួងកសិកម្មនិងអភិវឌ្ឍន៍ជនបទអោយដឹងថា ចំនួនសត្វបក្សីដែលងាប់ និងសត្វត្រូវបានសម្លាប់ បានកើនឡើងដល់ជាង ៥៥.០០០ក្បាល ។
យោងតាមក្រសួងកសិកម្ម និងអភិវឌ្ឍន៍ជនបទរបស់វៀតណាម នៅឆ្នាំ២០១៩ ការផ្ទុះជំងឺផ្តាសាយបក្សី ត្រូវបានរកឃើញ នៅក្នុងស្រុកចំនួន៤១ ក្នុង២៤ខេត្ត និងក្រុងទូទាំងប្រទេស ដែលសត្វបក្សីមានចំនួនសរុបជាង ១៣៣.០០០ក្បាល ត្រូវបានកម្ទេចចោល ៕
អត្ថបទ៖ kbn
