នាថ្ងៃទី២២ ខែកុម្ភៈ ឆ្នាំ២០២០ នៅខេត្តតាកែវ ជាប់ព្រំដែនវៀតណាម មានវត្គបណ្ដុះបណ្ដាលមួយត្រូវបានបើកវគ្គដំបូងដែលមានរយៈ ពេល៣ខែ ដើម្បីបង្រៀនដល់បងប្អូនវៀតណាម ដែលកំពុងរស់នៅកម្ពុជា ចំនួន៣៦នាក់ មុនពេលពួកគេចូលជាសញ្ជាតិកម្ពុជា។
គោលបំណងក្នុងការបើកវត្គបណ្ដុះបណ្ដាលនេះគឺដើម្បីឲ្យពួកគេយចេះនិយាយភាសាខ្មែរ យល់ដឹងពីវប្បធម៌ ប្រវត្តិសាស្ត្រ និងច្បាប់របស់កម្ពុជា។ នេះបើតាមទីភ្នាក់សារព័ត៌មានវៀតណាម VNA បានចុះផ្សាយកាលពីថ្ងៃទី២២ ខែកុម្ភៈ ។
ការបើកវត្គបណ្ដុះបណ្ដាលនេះគឺសម្រាប់តែជនជាតិវៀតណាមណាដែលមានបំណងចង់សុំចូលសញ្ជាតិខ្មែរតែប៉ុណ្ណោះ។ ហើយគេសង្កេតឃើញថាមានជនជាតិវៀតណាមស្រី ប្រុស ចំនួន៣៦នាក់ ចូលរួមនឹងត្រូវរៀនសូត្ររយៈពេល៣ខែ។
លោក សឺន ជុំជួន អគ្គលេខាធិការសមាគមខ្មែរកម្ពុជាក្រោម ដើម្បីសិទ្ធិមនុស្សនិងអភិវឌ្ឍន៍ បានស្វាគមន៍ចំពោះការបើកវគ្គបង្រៀនដល់ជនជាតិវៀតណាមដែលរស់នៅកម្ពុជានេះតែជំរុញឲ្យអាជ្ញាធរវៀតណាមត្រូវបើកលំហសេរីភាពឲ្យពលរដ្ឋខ្មែរកម្ពុជាអាចរៀនសូត្រពីអក្សរសាស្ត្រខ្មែរ និងវប្បធម៌ប្រពៃណីយ៍របស់ខ្មែរក្រោមដែលជាម្ចាស់ស្រុកនេះផងដែរ។
បើតាម លោក សឺន ជុំជួន មិនមែនតែពលរដ្ឋខ្មែរនៅកម្ពុជាក្រោមទេដែលពិបាកទទួលបានការអប់រំអក្សរសាស្ត្រខ្មែរ និងវប្បធម៌របស់ខ្លួននោះ សូម្បីតែស្ត្រីខ្មែរកម្ពុជាក្រោមដែលរស់នៅកម្ពុជាភាគច្រើនមិនចេះអក្សរខ្មែរឡើយ។ ហេតុដូច្នេះលោកចង់ឲ្យរដ្ឋាភិបាលកម្ពុជា បើកវគ្គបង្រៀនដល់ស្ត្រីខ្មែរកម្ពុជាក្រោមដែលកំពុងរស់នៅលើទឹកដីកម្ពុជាសព្វថ្ងៃនេះផងដែរ។
យោងតាមរបាយការន៏ក្រសួងមហាផ្ទៃ បានឲ្យដឹងថា មានជនជាតិវៀតណាម ប្រមាណ១៦ម៉ឺននាក់កំពុងរស់នៅប្រទេសកម្ពុជា ដែលភាគច្រើននៅទីក្រុងភ្នំពេញ កំពង់ឆ្នាំង ពោធិ៍សាត់ បាត់ដំបង និងសៀមរាប ៕
អត្ថបទ៖ RFI
