នៅព្រឹកថ្ងៃទី២៧ ខែកុម្ភៈ លោក ហេង សួរ ថ្នាក់ដឹកនាំក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា តាមរយៈការព្យាករណ៍ គឺនាដើមខែមីនាខាងមុខនេះ អាចនឹងមានរោងចក្រ-សហគ្រាស់ចូលដល់ខ្ទង់ជិត ២០០ ដែលប្រឈមនឹងការខ្វះវត្ថុធាតដើមពីចិន ហើយអាចនឹងប៉ះពាល់ដល់កម្មករ-កម្មការីកម្ពុជាប្រហែល១៦ម៉ឺននាក។
ធ្វើជាវាគ្មិនក្នុងសន្និសីទសារព័ត៌មានស្តីពីវឌ្ឍនភាពនិងទិសដៅការងាររបស់ក្រសួងការងារ ដែលរៀបចំឡើងនៅទីស្តីការគណៈរដ្ឋមន្ត្រី លោក ហេង សួរ បានផ្តល់ព័ត៌មានថា ជាក់ស្តែងនៅព្រឹកនេះផងដែរក្រសួងទើបនឹងបានទទួលឯកសារពីរោងចក្រសហគ្រាសចំនួន១០ ដាក់ពាក្យស្នើព្យូរការងារកម្មករនៅផ្នែកខ្លះ ដែលអាចនឹងប៉ះកម្មករប្រមាណជា៣ពាន់នាក់ ។
លោកថ្លែងបន្តថា ក្រសួងការងារកំពុងសម្របសម្រួលជាមួយម្ចាស់រោងចក្រ ដើម្បីគិតគូរដោះស្រាយប្រាក់ខែនិងអត្ថប្រយោជន៍ផ្សេងៗជូនកម្មករ-កម្មការិនី។
យ៉ាងមិញថ្នាក់ដឹកនាំរាជរដ្ឋាភិបាលកម្ពុជា ក៏បានស្នើសុំមិត្តចិនធ្វើយ៉ាងណាជួយដល់វិស័យកាត់ដេរនៅកម្ពុជាដែលត្រង់នេះមានន័យថា មិត្តចិននឹងជួយធ្វើយ៉ាងណាឲ្យកម្ពុជានឹងអាចទទួលបានវត្ថុធាតុដើមមុនគេ ហើយរដ្ឋាភិបាលក៏បានត្រៀមប្រាក់ជួយដល់កម្មករដែលនឹងអាចត្រូវព្យួរការងារនាពេលខាងមុខដោយសារតែឥទ្ធិពលរបស់ COVID-19 ។
លោកបានបន្តថា «ប៉ុន្តែយើងក៏បានដឹងផងដែរថា សង្វាក់ផលិតកម្មនៅឯប្រទេសចិន ក៏មានការចាប់ផ្តើមដំណើការ ហើយរាជរដ្ឋាភិបាលបានខិតខំប្រើប្រាស់នូវគ្រប់មធ្យោបាយទាំងទំនាក់ទំនងជាមួយអ្នកបញ្ជារទិញរោងចក្រក៏ដូចជា កម្រិតរដ្ឋាភិបាល និងរដ្ឋាភិបាលផងដែរ ដើម្បីធ្វើម៉េចឲ្យរដ្ឋាភិបាលចិនផ្តល់ឲ្យនូវអាទិភាពនៅក្នុងការផ្គត់ផ្គង់នូវវត្ថុធាតុដើមនេះជូនមកប្រទេសកម្ពុជា ដើម្បីធ្វើម៉េចឲ្យបញ្ហានៃការខ្វះវត្ថុធាតុដើមគឺមានរយៈពេលខ្លី» ។
លោកហេង សួរ បានបញ្ជាក់ថា រោងចក្រទាំងនោះ ត្រូវព្យួរការងារ ដោយសារតែអស់វត្ថុធាតុដើម ដែលនាំចូលមកពីចិន។ ដោយសារតែរងការវាយប្រហារពីវីរុស COVID-19 រោងចក្រនិងក្រុមហ៊ុនជាច្រើននៅចិន ត្រូវបិទទ្វារ ហើយផ្អាកការផ្គត់ផ្គង់វត្ថុធាតុដើម ទៅកាន់បណ្តាប្រទេសនានា រួមទាំងកម្ពុជាផងដែរ ៕
អត្ថបទ៖ kbn
