អធិការនគរបាលស្រុកកំចាយមារ និងលោកម៉ាន់ រចនា មន្ត្រីសុរិយោដីស្រុកកំចាយមារ ព្រមទាំងបក្ខពួក២នាក់ទៀត ត្រូវបានលោកសឿន មុនីរ័ត្ន ព្រះរាជអាជ្ញារងអមសាលាដំបូងរាជធានីភ្នំពេញ សម្រេចចោទប្រកាន់ជាផ្លូវការពីបទ “ឆ បោក”ប្រាក់ជាង ២លានដុល្លារ លក់ដីខ្យល់ជាង៤០០ហិកតារ ។
ប្រភពច្បាស់ការណ៍មួយបានបង្ហើបឲ្យដឹងនៅថ្ងៃទី២ ខែមីនា ឆ្នាំ២០២០ នេះថា លោក សឿន មុនីរ័ត្ន ព្រះរាជអាជ្ញារងអមសាលាដំបូងរាជធានីភ្នំពេញ សម្រេចចោទប្រកាន់ជាផ្លូវការលើឈ្មោះ ស៊ីវ សុខុមអាយុ៥៤ឆ្នាំ ជាអធិការនគរបាលស្រុកកំចាយមារ , ឈ្មោះម៉ាន់ រចនា អាយុ៣៩ឆ្នាំ ជាមន្ត្រីសុរិយោដីស្រុកកំចាយមារ , ឈ្មោះ ពិន សារន់ អាយុ៥១ឆ្នាំ និងឈ្មោះ គួន សុវណ្ណ អាយុ២៩ឆ្នាំ ពីបទ “ឆបោក” ប្រព្រឹត្តនៅចំណុចភូមិចំការចេក១ ឃុំក្រញូង និង ភូមិព្រៃទួលថ្មី ឃុំក្របៅ ស្រុកកំចាយមារ ខេត្តព្រៃវែង កាលពីថ្ងៃទី២២ ខែកក្កដា ឆ្នាំ២០១៧ តាមមាត្រា៣៧៧ និង ៣៧៨ នៃក្រមព្រហ្មទណ្ឌ ។
ក្រោយការចោទប្រកាន់ លោកសឿន មុនីរ័ត្ន ព្រះរាជអាជ្ញារងអមសាលាដំបូងរាជធានីភ្នំពេញ បានបញ្ជូនសំណុំរឿងនេះឱ្យលោកកី ម៉ានេរ៉ា អនុប្រធានសាលាដំបូងរាជធានីភ្នំពេញ ចាត់ការបន្តតាមនីតិវិធីដោយភ្ជាប់ការស្នើសុំដាក់ឱ្យស្ថិតនៅការឃុំខ្លួនបណ្តោះអាសន្នផងដែរ។ តែពេលនេះ ជនទាំង៤នាក់នេះ អាចឈានដល់ការចាប់ខ្លួននាពេលខាងមុខនេះ។
តាមអង្គហេតុបានឲ្យដឹងថា កាលពីថ្ងៃទី២៤ ខែមេសា ឆ្នាំ២០១៧ និងថ្ងៃទី៣០ ខែមេសាឆ្នាំ ២០១៨ ឈ្មោះស៊ីវ សុខុមជាអធិការនគរបាលស្រុកកំចាយមារ, ឈ្មោះម៉ាន់ រចនា ជាមន្ត្រីសុរិយោដីស្រុកកំចាយមារ, ឈ្មោះពិន សារុន និងឈ្មោះគួន សុវណ្ណ បានចុះកិច្ចព្រមព្រៀងទិញលក់ដីជាមួយដើមបណ្តឹងឈ្មោះ តាំង ស្រ៊ីអ៊ុយ , ឈ្មោះណម តុង , ឈ្មោះវ៉ែន វ៉ាន់យូ និងឈ្មោះឈុន អេង លើផ្ទៃដីសរុបចំនួន៤១០,៤៦ហិកតារ ក្នុងនោះ ទីតាំងទី១មានទំហំសរុប២៣១,៤១ហិកតារ ស្ថិតនៅភូមិចំការចេក១ ឃុំក្រញូង ស្រុកកំចាយមារ ។ ទីតាំងទី២ មានទំហំ១៧៩,០៥ហិកតារ ស្ថិតនៅភូមិព្រៃទួលថ្មី ឃុំក្របៅ ស្រុកកំចាយមារ តាមតម្លៃដែលបានឯកភាពគ្នានៅក្នុងកិច្ចព្រមព្រៀង ។
អង្គហេតុដដែលបានឲ្យដឹងបន្តថា ចាប់តាំងពីថ្ងៃចុះកិច្ចព្រមព្រៀងទិញលក់លើកទី១ រហូតមកដល់ថ្ងៃទី១៧ ខែតុលា ឆ្នាំ២០១៨ ភាគីអ្នកលក់ទាំង៤នាក់ គឺ ឈ្មោះ ស៊ីវ សុខុម ឈ្មោះ ម៉ាន់ រចនា ឈ្មោះ ពិនសារន់ និង ឈ្មោះ គួន សុវណ្ណ បានទទួលប្រាក់ជាបន្តបន្ទាប់ពីភាគីអ្នកទិញ គឺឈ្មោះតាំង ស្រ៊ីអ៊ុយ , ឈ្មោះណម តុង , ឈ្មោះវ៉ែន វ៉ាន់យូ និងឈ្មោះឈុន អេង សរុបចំនួន២.០៣១.៣៨២ ដុល្លារអាមេរិករួចហើយ។តែភាគីអ្នកលក់ពុំមានដីប្រគល់ឱ្យភាគីអ្នកទិញឡើយ ។
ខណៈនេះ “KBN” មិនអាចសុំការបំភ្លឺពីលោកវរសេនីយ៍ឯក ស៊ីវ សុខុម អធិការនគរបាលស្រុកកំចាយមារ និងលោកម៉ាន់ រចនា ជាមន្ត្រីសុរិយោដីស្រុកកំចាយមារ បាននៅឡើយទេ តែយ៉ាងណា សង្ស័យថាមិនផុតពីគុក…៕
អត្ថបទ៖ kbn
