មន្ត្រីម្នាក់បាននិយាយនៅថ្ងៃអង្គារ ទី៤ ខែមីនានេះថា យ៉ាងហោចណាស់សមាជិកសភាអ៊ីរ៉ង់ចំនួន២៣នាក់ ក្នុងចំណោម២៩០នាក់ បានធ្វើតេស្តឃើញវីរុស COVID-19។ នេះបើយោងតាមការចុះផ្សាយដោយទីភ្នាក់ងារសារព័ត៌មានBBC។
ប្រភពព័ត៌មានដដែល បានឲ្យដឹងទៀតថា ក្នុងចំណោមមន្ត្រីជាន់ខ្ពស់អ៊ីរ៉ង់ មានសមាជិកក្រុមប្រឹក្សាមួយរូប គឺលោក Mohammad Mirmohammadi ដែលផ្តល់យោបល់ដោយផ្ទាល់ ដល់មេដឹកនាំដ៏មានឥទ្ធិពលក្នុងប្រទេសអ៊ីរ៉ង់ លោកAyatollah Ali Khamenei បានស្លា ប់ ខណៈលទ្ធផលធ្វើតេស្តបង្ហាញថាមានផ្ទុកវីរុសកូរ៉ូណា។
ទីភ្នាក់ងារសារព័ត៌មានរដ្ឋបានចុះផ្សាយកាលពីថ្ងៃចន្ទថា លោកMohammad Mirmohammadi វ័យ៧១ឆ្នាំ មានទំនាក់ទំនងជិតស្និទ្ធជាមួយលោក Ayatollah Ali Khamenei។ ក្រៅពីនោះ ប្រធានផ្នែកសេវាវេជ្ជសាស្ត្របន្ទាន់ គឺលោក Pirhossein Kolivand ក៏រកឃើញថាមានផ្ទុកវីរុសកូរ៉ូណាផងដែរ បន្ទាប់ពីធ្វើតេស្តរួច។
អនុប្រធានសភាលោក Abdul Reza Misri បាននិយាយនៅក្នុងសេចក្តីថ្លែងការណ៍មួយថា៖«ឥឡូវនេះសមាជិកសភាចំនួន ២៣ នាក់ត្រូវបានគេធ្វើតេស្ត៍ថាមេរោគកូវីដ១៩វិជ្ជមាន» ។ លោកបានបន្តទៀតថា កិច្ចប្រជុំរវាងសមាជិកសភានិងពលរដ្ឋត្រូវបានផ្អាកដោយសារបញ្ហាសុខភាព។
គួរជម្រាបជូនថា អាជ្ញាធរអ៊ីរ៉ង់បាននិយាយ មកទល់ពេលនេះនៅប្រទេសអ៊ីរ៉ង់មានមនុស្សឆ្លងវីរុស COVID-19 ជាង២ពាន់នាក់ ខណៈមនុស្សជិត៨០នាក់ បានស្លា ប់ដោយសារជំងឺរលាកសួតប្រភេទថ្មីនេះ ហើយអ៊ីរ៉ង់ជាប្រទេសទីពីរបន្ទាប់ពីចិន ដែលមានមនុស្សស្លាប់ច្រើនជាងគេ។
អត្ថបទ៖ KBN
