អភិបាលខេត្តសៀមរាបលោកទៀ សីហា បានថ្លែងថា ក្នុងឆ្នាំ២០២០នេះ គឺជាឆ្នាំអនុវត្តនូវអភិក្រមទី៥”វះកាត់” របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ទៅលើមន្ត្រីណាដែលមានភាពអសកម្មភាព ដើម្បីពង្រឹងការផ្តល់សេវាសាធារណៈ អភិបាលកិច្ចល្អជូនប្រជាពលរដ្ឋឲ្យកាន់តែឆាប់រហ័ស ងាយស្រួល មានតម្លាភាព គណនេយ្យភាព និងលែងមានការថ្នាំងថ្នាក់ពីប្រជាពលរដ្ឋ។ ជាពិសេសមេឃុំ សង្កាត់ត្រូវបញ្ឈប់ការបញ្ជាក់លើ ឯកសារកាន់កាប់ដីធ្លីខុសគោលការណ៍ និងនីតីវិធី។
លោកទៀ សីហា ក៏បានផ្តល់ការណែនាំ និងឱ្យដល់មន្ទីរ អង្គភាព និងរដ្ឋបាលក្រុង ស្រុកទាំងអស់សហការគ្នាអនុវត្តការងារ ដោយសង្កត់ធ្ងន់លើ ការសាងសង់សំណង់មិនត្រូវអនុញ្ញាតឱ្យសាងសង់សំណង់មុនលិខិតអនុញ្ញាត ត្រូវបន្តពង្រឹងការអនុវត្តច្បាប់ស្តីពីចរាចរណ៍ សិក្សាស្ថានភាព និងលើកជាយោបល់រៀបចំទិសចរាចរណ៍ក្នុងខេត្ត តម្លើងស្លាកសញ្ញាចរាចរណ៍ ភ្លើងសញ្ញាចរាចរណ៍ គំនូសសញ្ញាចរាចរណ៍ និងគំនូសកាត់ទ្រូងផ្លូវ ឬចិញ្ចើមផ្លូវដោយលុបបំបាត់ការហុយដីក្នុងក្រុង។
ម្យ៉ាងទៀត ត្រូវសហការគ្នាក្នុងការចូលរួមសាងសង់បង្គន់អនាម័យនៅតាមសាលា និងណែនាំដល់ប្រជាពលរដ្ឋ ក៏ដូចជាសិស្សានុសិស្សត្រូវសម្អាតអនាម័យឱ្យបានល្អប្រសើរផងដែរ។ ក្នុងនោះដែរត្រូវបន្តការបង្ក្រាប ទប់ស្កាត់ការជួញដូរ ប្រើប្រាស់គ្រឿងញៀន នៅតាមមូលដ្ឋាន។
សារថ្លែងយ៉ាងដូច្នេះ នៅព្រឹកថ្ងៃទី០៤ ខែមីនា ឆ្នាំ២០២០ នាឱកាស លោកអភិបាល អញ្ជើញពិធីបូកសរុបការងារសន្និបាតឆ្នាំ២០១៩ និងទិសដៅការងារឆ្នាំ២០២០ របស់រដ្ឋបាលខេត្តសៀមរាបនៅសាលសន្និសិទសុខា សៀមរាប៕
អត្ថបទ៖ សៀមរាបប៉ុស្តិ៍
