ចាប់តាំងពីថ្ងៃទី០៦ ខែមីនា ឆ្នាំ២០២០ អ្នកប៉ះពាល់ផ្ទាល់ជាមួយបុរសជនជាតិជប៉ុនម្នាក់ ដែលមានកើតជំងឺកូវីដ១៩ ចំនួន ៤នាក់ ( ស្រី ២នាក់ ) ជាជនជាតិខ្មែរយើង មានអាយុចន្លោះពី ១៩ ទៅ ៣៨ឆ្នាំ ត្រូវបានដាក់ឲ្យនៅដាច់ដោយឡែក ក្នុងបន្ទប់ព្យាបាល នៅមន្ទីរពេទ្យខេត្តសៀមរាប។ នៅព្រលប់ថ្ងៃទី០៧ ខែមីនា រដ្ឋមន្ត្រីក្រសួងសុខាភិបាល បានប្រកាសថា ក្នុងចំណោមអ្នកទាំង ៤នាក់នោះ គឺមានបុរសម្នាក់ អាយុ ៣៨ឆ្នាំ បានឆ្លងជំងឺកូវីដ១៩។
ភ្លាមៗ ក្រសួងសុខាភិបាល បានប្រកាសពីការរកឃើញអ្នកប៉ះពាល់ផ្ទាល់ជាមួយជនជាតិជប៉ុននោះ ចំនួន ៤នាក់ទៀត គឺស្ត្រីជនជាតិជប៉ុនម្នាក់ និងពលរដ្ឋខ្មែរយើង ៣នាក់ទៀត ដែលជាក្រុមគ្រួសាររបស់បុរសអាយុ ៣៨ឆ្នាំ ដែលទើបរកឃើញថា មានផ្ទុកជំងឺកូវីដ ១៩។ ក្រុមការងារនៃមន្ទីរសុខាភិបាល ខេត្តសៀមរាប បាននាំពួកគាត់ឱ្យមកនៅបន្ទប់ដាច់ដោយឡែកនៃមន្ទីរពេទ្យបង្អែកខេត្តសៀមរាប។
ដោយឡែក អ្នកប៉ះពាល់ដោយប្រយោល ជាមួយបុរសជនជាតិជប៉ុន ដែលមានជំងឺកូវីដ១៩ មានចំនួន ៤០នាក់ ( ស្រី ២៥នាក់ និងប្រុស ១៥នាក់ ) មានអាយុចន្លោះពី ១៩ ដល់ ៤០ឆ្នាំ ជាអ្នកធ្វើការជាមួយ បុរសជនជា តិជប៉ុននោះ និងជាអ្នកធ្វើការនៅព្រលានយន្តហោះខេត្តសៀមរាប។
រហូតដល់ព្រឹកថ្ងៃអាទិត្យនេះ លោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពា ក្យក្រសួងសុខា ភិបាល បានបញ្ជាក់ប្រាប់ Swift News ថា អ្នកទាំង អស់ រួមទាំងបុរស អាយុ ៣៨ឆ្នាំ ដែលឆ្លងជំងឺកូវីដ១៩នោះ មានសុខភាព ល្អធម្មតាទេ ហើយស្ថិតក្រោមការពិនិត្យព្យាបាលយ៉ាង យកចិត្តទុកដាក់ពីក្រុម គ្រូពេទ្យ នៅមន្ទីរពេទ្យខេត្តសៀមរាប។ រីឯលទ្ធផលនៃ ការពិនិត្យសំណាកលើអ្នក ស ង្ស័ យទាំង ៧នាក់នោះ មិនទាន់ ចេញនៅឡើយទេ។
សូមរម្លឹកថា បុរសជនជាតិ ជប៉ុនអាយុជាង ៤០ឆ្នាំម្នាក់ ជាអ្នកជំនួញ បានចូលមកខេត្តសៀមរាប កាលពីថ្ងៃទី២៨ ខែកុម្ភៈ ឆ្នាំ២០២០ ហើយបានចាកចេញពីខេត្តសៀមរាប កាលពីយប់ថ្ងៃទី០៣ ខែមីនា ទៅកាន់ទីក្រុងណាហ្គូយ៉ា ប្រទេសជប៉ុន ឆ្លងកាត់តាមប្រទេសវៀតណាម។ ទៅដល់ព្រលានយន្តហោះ ណាហ្គូយ៉ា ជប៉ុនពិនិត្យរកឃើញថា បុរសនេះ កើតជំងឺកូវីដ១៩ ខណៈដែលមុនពេលចាកចេញពីសៀមរាប និងនៅវៀតណាម ពិនិត្យរកមិនឃើញជំងឺដ៏កាចសាហាវនេះទេ៕
អត្ថបទ៖ Swiftnews
