បើតាមខាងអាជ្ញាធរទេសចរណ៍ប្រចាំប្រទេសថៃ បាននិយាយនៅថ្ងៃព្រហស្បតិ៍នេះថា ពួកគេមានគំនិតចង់លើកការប្រារព្ធពិធីបុណ្យសង្ក្រាន្តថៃឆ្នាំថ្មីនេះ ដែលធ្វើឡើងក្នុងខែមេសានេះ ទៅខែកក្កដាវិញ ដើម្បីបញ្ចៀសការឆ្លងវីរុស COVID-19 ។
បើតាមអភិបាលនៃអាជ្ញាធរទេសចរណ៍ លោក Yuthasak Supasorn បាននិយាយថា ការសម្រេចចិត្តនេះនឹងសម្រេចធ្វើឡើង ក្រោយការសម្រេចចិត្តពីដៃគូមុខជំនួញក្នុងតំបន់ ។ លោកបាននិយាយថា ការសម្រេចចិត្តចុងក្រោយនឹងធ្វើនៅក្នុងថ្ងៃសៅរ៍ខាងមុខនេះ ។
លោកបានបន្ថែមថា លោកនឹងធ្វើការសម្រេចចិត្តតាមការណែនាំដោយរដ្ឋមន្ត្រីទេសចរណ៍ Phiphat Ratchakitprakarn ដើម្បីស្វែងរកថាតើវិស័យឯកជនណា គួរគិតគូរពីគំនិតមួយនេះ ។ ប្រសិនបើការសុំពន្យារពេលនេះ ទទួលបានការអនុម័ត នោះកម្មវិធីបុណ្យជាតិមួយនេះ នឹងផ្លាស់ពីថ្ងៃទី ១៣-១៥ ខែមេសា ទៅដើមខែកក្កដាវិញ ។
គួរបញ្ជាក់ថា កម្មវិធីបុណ្យចូលឆ្នាំថៃ ឬហៅថាបុណ្យសង្ក្រាន្តថៃ ប្រារព្ធធ្វើឡើងរយៈពេល ៣ ថ្ងៃ ដោយមានការចូលរួមលេងល្បែងសប្បាយៗជាច្រើន ដូចជាការលេងជះទឹកជាដើម តែងតែទទួលបានការពេញនិយម និង ចូលរួមពីសំណាក់ភ្ញៀវទេសចរជាច្រើន មកកម្សាន្តលេងកកកុញពាសពេញក្រុងសំខាន់ៗក្នុងប្រទេសមួយនេះ រួមមានទីក្រុងបាងកក ឈៀងម៉ៃ និង ឈុនបុរីជាដើម ។
ដើម្បីកុំឲ្យមានការខកខានក្នុងការប្រារព្ធពិធីបុណ្យប្រពៃណីដ៏ធំប្រចាំប្រទេសមួយនេះ លោក Yuthasak បានបន្ថែមទៀតថា លោកគឺគាំទ្រសម្រាប់ការលើកការប្រារព្ធពិធីបុណ្យសង្ក្រានទៅខែកក្កដានេះ ព្រោះក្នុងខែនោះ គឺជាខែរដូវវស្សា ដូច្នេះតម្រូវការទឹកប្រើប្រាស់ គឺមិនមានការខ្វះខាតឡើយ ៕
អត្ថបទ៖ ប្រជាប្រិយ
