ឥណ្ឌាអាចក្លាយជាចំណុចក្ដៅមួយទៀតរបស់ពិភពលោក សម្រាប់វីរុស Covid 19 ដោយអ្នកជំនាញជាច្រើនបានព្រមានពីវិធានការទប់ស្កាត់ដែលបង្ហាញថា ទទួលបានជោគជ័យនៅកន្លែងផ្សេងទៀតក្នុងទ្វីបអាស៊ី តែអាចនឹងមិនអាចដំណើរការនៅក្នុងប្រទេសដែលមានប្រជាជនច្រើនជាងគេលំដាប់ទី ២ នៅលើពិភពលោកមួយនេះ។
ប្រទេសអាស៊ីខាងត្បូងមួយនេះបានរាយការណ៍ថា មានអ្នកឆ្លង ១៣៧ នាក់និងអ្នកស្លាប់ ៣ នាក់ ហើយខ្លួនកំពុងព្យាយាមទប់ស្កាត់វីរុសនេះ ដោយការបិទព្រំដែនធ្វើតេស្តលើអ្នកដំណើរចូលមកនិងតាមដានអ្នកដែលបានធ្វើតេស្តវិជ្ជមាន។
កាលពីថ្ងៃអង្គារក្រុមប្រឹក្សាស្រាវជ្រាវវេជ្ជសាស្ត្រឥណ្ឌាបានប្រកាសថា ខ្លួនកំពុងបង្កើនសមត្ថភាពសាកល្បងរបស់ប្រទេសចំនួន ៨ពាន់ គំរូក្នុងមួយថ្ងៃពីចំនួន ៥០០ ក្នុងពេលបច្ចុប្បន្ននេះ។ ប៉ុន្តែរដ្ឋាភិបាលមិនទាន់បានបង្ហាញបញ្ជីនៃមន្ទីរពិសោធន៍ដែលត្រូវបានអនុញ្ញាតនៅឡើយទេ។
ចំណែកអគ្គនាយកលោក Balram Bhargava បានអះអាងថា មិនមានភស្តុតាងណាមួយនៃការចម្លងវីរុសនៅក្នុងសហគមន៍ទេ។ ប៉ុន្តែអ្នកជំនាញខ្លះនៅក្នុងប្រទេស ១,៣ ពាន់លាននាក់និយាយថា វានឹងមិនគ្រប់គ្រាន់ដើម្បីទប់ស្កាត់ការរីករាលដាលនេះទេ។ វិធានការផ្សេងទៀតដូចជាការធ្វើតេស្តិ៍ និងការដាក់ដាច់ដោយឡែក នឹងមិនអាចធ្វើទៅបាននៅក្នុងទីក្រុងដែលមានដង់ស៊ីតេប្រជាជនខ្ពស់និងហេដ្ឋារចនាសម្ព័ន្ធសុខភាពរញ៉េរញ៉ៃនេះឡើយ។
វេជ្ជបណ្ឌិត T. Jacob John ដែលជាអតីតប្រធានមជ្ឈមណ្ឌលស្រាវជ្រាវវេជ្ជសាស្ត្រឥណ្ឌាបាននិយាយថា ខណៈពេលដែលកំណើននៃចំនួនសរុបមានការយឺតយ៉ាវរហូតដល់បច្ចុប្បន្ ន“ ចំនួននឹងខ្ពស់ជាង ១០ ដង” នៅត្រឹមថ្ងៃទី ១៥ ខែមេសា។នាយករដ្ឋមន្ត្រី Narendra Modi បានមានប្រសាសន៍ថា ប្រជាជាតិអាស៊ីខាងត្បូងកំពុងប្រឹងប្រែងអស់ពីសមត្ថភាពដើម្បីប្រយុទ្ធប្រឆាំងនឹងការរីករាលដាលនៃវីរុសនេះ។
ទោះយ៉ាងណា ការព្រួយបារម្ភដ៏សំខាន់មួយនៅក្នុងប្រទេសឥណ្ឌា គឺរដ្ឋ Maharashtra ជារដ្ឋដែលមាននគរោបនីយកម្មខ្ពស់បំផុតនៅក្នុងប្រទេស និងជាទីប្រជុំជននៃរដ្ឋធានីហិរញ្ញវត្ថុនៃទីក្រុង Mumbai និងជាផ្សារភាគហ៊ុនគោល។ ហើយក៏បានរាយការណ៍ពីការរីករាលដាលធំបំផុតនៃការឆ្លងដោយមាន 39 ករណី។ រដ្ឋាភិបាលបានអំពាវនាវឱ្យមានការបិទក្រុងកាលពីថ្ងៃច័ន្ទដោយបិទកន្លែងសាធារណៈទាំងអស់ សូម្បីតែការប្រឡងនៅសកលវិទ្យាល័យ រួមទាំងស្នើឱ្យការិយាល័យរដ្ឋាភិបាលនិងក្រុមហ៊ុនឯកជនធានាថា យ៉ាងហោចណាស់បុគ្គលិកពាក់កណ្ដាលធ្វើការពីផ្ទះ។
រដ្ឋមន្ត្រីក្រសួងសុខាភិបាលនៃរដ្ឋ Maharashtra បានប្រាប់អ្នកយកព័ត៌មាននៅទីក្រុង Mumbai ថា “ រដ្ឋ Maharashtra ស្ថិតនៅក្នុងដំណាក់កាលទី ២ នៅពេលនេះ ប្រសិនបើយើងមិនបន្ថយឬបញ្ឈប់ការឆ្លងការរីករាលដាលនៃជំងឺនេះទេ យើងអាចធ្លាក់ដល់ដំណាក់កាលទី ៣ ហើយនោះអាចនឹងមានការកើនឡើងនូវចំនួននៃការឆ្លង” ។ យើងត្រូវទប់ស្កាត់ជំងឺនេះទោះស្ថិតក្នុងកាលៈទេសៈណាក៏ដោយ” ។
គួរបញ្ជាក់ថា ក្រៅពីទំហំតូចនៃប្រទេសនេះ បញ្ហាប្រឈមផ្សេងទៀតរបស់ឥណ្ឌាគឺដង់ស៊ីតេប្រជាជនដែលមានប្រមាណ ៤២០ នាក់រស់នៅក្នុងមួយគីឡូម៉ែត្រការ៉េ បើប្រៀបធៀបជាមួយដង់ស៊ីតេប្រជាជនចិនដែលមាន ១៤៨ នាក់ក្នុងមួយគីឡូម៉ែត្រការ៉េ។ ទីក្រុងនេះពោរពេញទៅដោយសំណង់អនាធិបតេយ្យ និងបណ្ដុំលំនៅឋានដែលមានប្រាក់ចំណូលទាបដែលស្ថានភាពរស់នៅមានភាពតឹងតែង។ ចំណែកការចំណាយលើការថែទាំសុខភាព ស្ថិតក្នុងចំណោមអត្រាទាបបំផុតនៅលើពិភពលោក ដែលមានត្រឹមតែ ៣,៧% នៃផលិតផលក្នុងស្រុកសរុប ៕
អត្ថបទ៖កម្ពុជាថ្មី
