រដ្ឋបាលក្រុងបាងកក បានប្រកាសបិទទីក្រុងបាងកកជាបណ្តោះអាសន្ន ដើម្បីកាត់បន្ថយការផ្ទុះឡើងនៃការឆ្លងជំងឺកូវីដ ១៩ ។ នេះបើយោងតាមសេចក្តីសម្រេចរបស់អង្គប្រជុំរដ្ឋបាលក្រុងបាងកកកាលពីពេលកន្លងទៅនេះ ។បទបញ្ជាថ្មីនេះ នឹងបញ្ជាឱ្យបិទទីតាំងមួយចំនួនជាបណ្តោះអាសន្នចាប់ពីថ្ងៃទី ២ ខែមេសា ឆ្នាំ ២០២០ ដល់ថ្ងៃទី ៣០ ខែមេសា ឆ្នាំ ២០២០
ដែលមានដូចជា ហាងអាហារ ភេសជ្ជៈ តាមស្តង់ រទេះ និង តូប តម្រូវឱ្យបើកលក់ចាប់ពីម៉ោង ៥ :០១ ព្រឹក រហូតដល់ម៉ោង ១២ យប់ (២៤:០០ នាទី) ដោយមិនឱ្យរៀបចំកន្លែងអង្គុយឡើយ ដោយឱ្យតែលក់ជាលក្ខណៈខ្ចប់តែប៉ុណ្ណោះ លើកលែងតែហាងដែលមានទីតាំងនៅអាកាសយានដ្ឋាន និង មន្ទីរពេទ្យ តែប៉ុណ្ណោះដែលអាចរៀបចំកន្លែងអង្គុយនៅបន្ទប់បរិភោគអាហារបាន ។
សម្រាប់ការលក់អាហារ ឬ ភេសជ្ជៈនៅក្នុងសណ្ឋាគារ គឺអនុញ្ញាតិឱ្យបម្រើតែភ្ញៀវនៅក្នុងសណ្ឋាគារនោះតែប៉ុណ្ណោះ ។ ក្រៅពីនេះ ភោជនីយដ្ឋាន ឬ ហាងភេសជ្ជៈ ផ្សេងៗត្រូវតែបិទទ្វារទាំងអស់ បើចំពោះផ្សារទំនើប និង ម៉ាតនានានឹងត្រូវបិទចាប់ពីម៉ោង ១២ យប់ រហូតដល់ម៉ោង ០៥.០០ ភ្លឺ (០០:០១ នាទី ដល់ម៉ោង ៥:០០ នាទីព្រឹក) ។
ចំពោះឧទ្យានសាធារណៈ ឬ ឯកជន និង ទីតាំងទាំងឡាយដែល មិនមានក្រោមសេចក្តីជូនដំណឹងនេះ ក៏ត្រូវតែអនុវត្តតាមវិធានការណ៍បង្ការជំងឺដែលបានបញ្ជាក់ដោយរដ្ឋាភិបាលនេះ ។ ប្រសិនបុគ្គល ឬ ទីតាំងណាមួយមិនគោរពតាមបទបញ្ជានេះ នឹងត្រូវផ្តន្ទាទោសដាក់ពន្ធនាគារមិនលើពី ១ ឆ្នាំ និង ពិន័យជាប្រាក់មិនលើសពី ១ សែនបាត ករណីមិនរាងចាលនឹងត្រូវផ្តន្ទាទោសដាក់ពន្ធនាគារមិនលើស ២ ឆ្នាំ និង ពិន័យប្រាក់មិនលើស ៤ ម៉ឺនបាត ៕
