គិតត្រឹមព្រឹកថ្ងៃទី០៤ ខែមេសា ឆ្នាំ២០២០នេះ អ្នកកំពុងសម្រាកព្យាបាលជំងឺកូវីដ១៩នៅកម្ពុជានៅសល់ត្រឹម៦៥នាក់ប៉ុណ្ណោះ ខណៈក្រសួងសុខាភិបាល ប្រកាសព្យាបាល អ្នកជំងឺឲ្យជារហូតដល់១៥នាក់ធ្វើឲ្យអ្នកជាសរុបកើនឡើងដល់៤៩នាក់ ហើយមិនមានករណីឆ្លងថ្មី នៅថ្ងៃនេះនោះ។
យោងតាមសេចក្ដីជូនព័ត៌មានរបស់ក្រសួងសុខាភិបាលចុះថ្ងៃទី០៤ ខែមេសា ឆ្នាំ២០២០នេះ បានបញ្ជាក់ថា គិតត្រឹមម៉ោង៧ព្រឹកថ្ងៃទី៤ ខែមេសានេះ អ្នកដែលកំពុងសម្រាកព្យាបាលនៅតាមមន្ទីរពេទ្យរដ្ឋនៅថ្នាក់ជាតិ និងថ្នាក់ខេត្ត បានថយចុះមកនៅសរុបចំនួន៦៥នាក់(ស្ត្រី២០នាក់ និងបុរស៤៥នាក់)។ ខណៈអ្នកព្យាបាលជាសះស្បើយសរុបចំនួនកើនឡើងដល់៤៩នាក់(ស្មើនឹង៤២.៩៨ភាគរយធៀបនឹងចំនួនអ្នកមានវីរុសកូវីដ១៩ទាំងអស់)។ចំពោះអ្នកជាសះស្បើយទាំង១៥នាក់នោះ ត្រូវបានប្រភពបញ្ជាក់ដូច្នេះថា ៖
ក. បុរសអាយុ៦៤ឆ្នាំ និងបុរសអាយុ៦០ឆ្នាំ ជនជាតិម៉ាឡេស៊ី ជាក្រុមមកធ្វើការងារសាសនា ស្នាក់នៅខេត្តកំពត បានជាសះស្បើយ ដោយទទួលបានលទ្ធផលតេស្ដអវិជ្ជមានវីរុសកូវីដ១៩ ចំនួន២លើក ត្រូវបានអនុញ្ញាតឲ្យចេញពីមន្ទីរពេទ្យខេត្តកំពត។
ខ.ស្ត្រីអាយុ៣៥ឆ្នាំ ជនជាតិខ្មែរ រស់នៅខេត្តបាត់ដំបង បានជាសះស្បើយ ដោយទទួលបានលទ្ធផលតេស្ដអវិជ្ជមានវីរុសកូវីដ១៩ចំនួន២លើក ត្រូវបានអនុញ្ញាតឲ្យចេញពីមន្ទីរពេទ្យខេត្តបាត់ដំបង។ ស្ត្រីរូបនេះ ជាភរិយាបុរសអាយុ៤៦ឆ្នាំ ដែលបានវិលត្រឡប់មកពីចូលរួមពិធីសាសនានៅម៉ាឡេស៊ី ហើយបុរសរូបនេះកំពុងព្យាបាលនៅមន្ទីរពេទ្យខេត្តបាត់ដំបងនៅឡើយ។
គ. បុរសអាយុ៦០ឆ្នាំ ជាជនជាតិខ្មែរ នៅភូមិបារ៉ែនក្រោម ឃុំស្វាយប្រទាល ស្រុកស្អាង ខេត្តកណ្ដាល បានជាសះស្បើយ ដោយទទួលបានលទ្ធផលតេស្ដអវិជ្ជមានវីរុសកូវីដ១៩ចំនួន២លើក ត្រូវបានអនុញ្ញាតឲ្យចេញពីមន្ទីរពេទ្យខេត្តកណ្ដាល។ បុរសរូបនេះ ជាក្រុមដែលវិលត្រឡប់មកពីចូលរួមពិធីសាសនានៅប្រទេសម៉ាឡេស៊ី។
ឃ. បុរសជនជាតិខ្មែរអាយុ៣៩ឆ្នាំ ជាមន្ត្រីជាន់ខ្ពស់នៃក្រសួងមួយ រស់នៅរាជធានីភ្នំពេញ បានជាសះស្បើយ ដោយទទួលបានលទ្ធផលតេស្ដអវិជ្ជមានវីរុសកូវីដ១៩ចំនួន២លើក ត្រូវបានអនុញ្ញាតឲ្យចេញពីមន្ទីរពេទ្យមិត្តភាពខ្មែរសូវៀត។
ង. បុរសចំនួន៤នាក់ និងស្ត្រីចំនួន៤នាក់ ជាជនជាតិបារាំង បានជាសះស្បើយ ដោយទទួលបានលទ្ធផលតេស្ដអវិជ្ជមានវីរុសកូវីដ១៩ចំនួន២លើក។ បុរសស្ត្រីទាំង៨នាក់នេះ ជាក្រុមអ្នកទេសចរបារាំង៣៦នាក់ នៅខេត្តព្រះហសីនុ រីឯបុរសជនជាតិបារាំងអាយុ៦៤ឆ្នាំ (ជាអ្នកទេសចរក្នុងក្រុមបារាំង៤នាក់ផ្សេងទៀត) ក៏បានជាសះស្បើយដែរ ដោយទទួលបានលទ្ធផលតេស្ដអវិជ្ជមានវីរុសកូវីដ១៩ចំនួន២លើក។ បុគ្គលទាំង៩នាក់នេះ ត្រូវបានអនុញ្ញាតឲ្យចេញពីកន្លែងព្យាបាលនៅក្នុងសណ្ឋាគារមួយនៃក្រុងព្រះសីហនុ ដើម្បីរង់ចាំវិលត្រឡប់ទៅប្រទេសបារាំងវិញ។
ច.បុរសជនជាតិខ្មែរអាយុ៣៩ឆ្នាំ ជាអ្នកប៉ះពាល់ផ្ទាល់ជាមួយក្រុមទេសចរបារាំង បានជាសះស្បើយ ដោយទទួលបានលទ្ធផលតេស្ដអវិជ្ជមានវីរុសកូវីដ១៩ចំនួន២លើក ត្រូវបានអនុញ្ញាតឲ្យចេញពីកន្លែងព្យាបាលនៅក្នុងសណ្ឋាគារមួយនៃក្រុងព្រះសីហនុ។
គួរបញ្ជាក់ថា គិតត្រឹមថ្ងៃទី៤ ខែមេសា ឆ្នាំ២០២០នេះ កម្ពុជា បានរកឃើញអ្នកមានវីរុសកូវីដ១៩សរុបទាំងអស់ចំនួន១១៤នាក់(រាប់បញ្ចូលទាំងអ្នកព្យាបាលជាសះស្បើយ៤៩នាក់ និងអ្នកកំពុងសម្រាកព្យាបាល៦៥នាក់) ដោយក្នុងចំណោម១១៤នាក់ មានស្ត្រី៣២នាក់ បុរស៨២នាក់ មិនមានការកើនឡើងទេ ដោយសារលទ្ធផលធ្វើតេស្ដមិនមានអ្នកឆ្លងថ្មីនោះទេនៅថ្ងៃនេះ៕
អត្ថបទ៖កម្ពុជាថ្មី
