ឯកឧត្តមកិត្តិសេដ្ឋាបណ្ឌិត ជាម យៀប ប្រធានគណៈកម្មការ ប្រធានគណៈកម្មការទី២រដ្ឋសភា មានប្រសាសន៍ថា រាជរដ្ឋាភិបាល និងបញ្ចប់នូវគម្រោងតបណ្តាញអគ្គិសនី គ្រប់ភូមិនៅទូទាំងប្រទេស និងបញ្ចប់នាពេលខាងមុខ ព្រោះបច្ចុប្បន្នការតបណ្តាញ ដល់គ្រប់ភូមិទូទាំងប្រទេសអនុវត្ត៩៧%ហើយ។
វិស័យថាមពល ត្រូវបានរាជរដ្ឋាភិបាលកម្ពុជា អភិវឌ្ឍក្នុងសន្ទុះយ៉ាងលឿន និងបានដើរតួនាទីស្នូលយ៉ាងសំខាន់ ក្នុងការទ្រទ្រង់ការអភិវឌ្ឍគ្រប់វិស័យនៅកម្ពុជា។ ឯកឧត្តម ជាម យៀប បានប្រសាសន៍ថា រាជរដ្ឋាភិបាលកម្ពុជា កំពុងជំរុញថាមពលអគ្គិសនី ដើម្បីបំពេញតម្រូវការអភិវឌ្ឍសេដ្ឋកិច្ចជាតិ និងមានថាមពលអគ្គិសនី ឲ្យប្រជាជន និងអ្នកវិនិយោគទុនប្រើប្រាស់គ្រប់តម្រូវការ។
ឯកឧត្តម ជាម យៀប បានបន្ថែមថា រាជរដ្ឋាភិបាល បាននិងកំពុងបន្តអនុវត្តនូវនយោបាយ បញ្ចុះតម្លៃលក់អគ្គិសនី ដើម្បីជំរុញកំណើនសេដ្ឋកិច្ច សមធម៌សង្គម និងលើកកម្ពស់ជីវភាព ប្រជាពលរដ្ឋឲ្យកាន់តែល្អប្រសើរឡើងថែមទៀត។
សមាជិកសភារូបនេះ បានបញ្ជាក់ទៀតថា នយោបាយ ឈ្នះ ឈ្នះ បាននាំមកនូវសន្តិភាព ស្ថិរភាពនយោបាយ ឯកភាពជាតិ និងការអភិវឌ្ឍនៅគ្រប់ទិសទី និងលើគ្រប់វិស័យ។
ក្នុងនោះ តម្រូវការប្រើប្រាស់អគ្គិសនី បន្តស្ថិតក្នុងអត្រាកំណើនខ្ពស់ ដើរស្របនឹងចក្ខុវិស័យដ៏មហិច្ឆតារបស់រាជរដ្ឋាភិបាលក្នុងការជំរុញផ្គត់ផ្គង់អគ្គិសនី ឲ្យបានគ្របដណ្តប់គ្រប់ភូមិក្នុងឆ្នាំ២០២០ ដោយតម្លៃសមរម្យ និងតម្លៃឯកភាពទូទាំងប្រទេស។
គួរបញ្ជាក់ថា សេចក្តីព្រាងច្បាប់ស្តីពីការអនុម័តយល់ព្រម លើការធានាទូទាត់ របស់រាជរដ្ឋាភិបាលកម្ពុជា ឲ្យក្រុមហ៊ុនរ៉ូយ៉ាល់គ្រុប សម្រាប់គម្រោងវិនិយោគសាងសង់រោងចក្រអគ្គិសនី ដុតធ្យូងថ្ម អនុភាព ៧០០ មេហ្គាវ៉ាត់ខេត្តកោះកុង គឺសម្រាប់ការអភិវឌ្ឍសេដ្ឋកិច្ចឲ្យរីកចម្រើន៕
អត្ថបទ៖ CEN
