អាជ្ញាធរខេត្តបាត់ដំបង បានចាត់ក្រុមការងារចំពោះកិច្ចចំនួន៤ក្រុម ដើម្បីចុះប្រចាំការដឹកនាំ និងទទួល ប្រជាពលករវិលត្រឡប់ពីប្រទេសថៃ តាមច្រកទ្វារព្រំដែនអន្តរជាតិដូង ក្នុងភូមិសាស្ត្រ និងនៅក្រៅភូមិសាស្ត្រខេត្តបាត់ដំបង និងមណ្ឌលចត្តាឡីស័កខេត្ត (វិទ្យាល័យព្រះមុនីវង្ស)។
ការបង្កើតក្រុមនេះ ដើម្បីអនុវត្តនូវកាតព្វកិច្ច និងភារកិច្ចចំពោះមុខតាមបទបញ្ជារបស់ប្រមុខរាជរដ្ឋាភិបាល និងការណែនាំរបស់ក្រសួងមហាផ្ទៃ និងវិធានការក្នុងការប្រយុទ្ធប្រឆាំងវីរុសរាតត្បាតជាសកលកូវីដ19 របស់ក្រសួងសុខាភិបាល។
លោក ងួន រតនៈ អភិបាលខេត្តបាត់ដំបង បានកំណត់នូវភារកិច្ចចំពោះមុខជូនដល់លោកអភិបាលរងខេត្ត ដោយបង្កើតនូវក្រុមការងារចំពោះកិច្ចរបស់ខ្លួន ដើម្បីប្រចាំការបំពេញភារកិច្ចចំពោះមុខតាមគោលដៅច្រកទ្វារអន្តរជាតិដូង និង តាមច្រកទ្វារព្រំដែនក្រៅភូមិសាស្ត្ររបស់ខេត្ត ក្នុងការរង់ចាំទទួលប្រជាពលករ ដែលវិលត្រឡប់ពីប្រទេសថៃ។
សូមបញ្ជាក់ថា ក្រុមទី១. ដឹកនាំដោយលោក ហឿង សុគន្ធ អភិបាលរងខេត្តបាត់ដំបង ប្រចាំច្រកទ្វារអន្តរជាតិដូង ខេត្តបាត់ដំបង, ក្រុមទី២. ដឹកនាំដោយ លោក ស៊ូ អារ៉ាហ្វាត់ អភិបាលរងខេត្ត ប្រចាំច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ, ក្រុមទី៣. ដឹកនាំដោយលោក អ៊ុយ សុធាវី អភិបាលរងខេត្ត ប្រចាំនៅច្រកទ្វារព្រំដែនអូរស្មាច់ ខេត្តឧត្តរមានជ័យ ហើយក្រុមទាំង៣ ជាក្រុមការងារចំពោះកិច្ចប្រចាំការ
ដើម្បីរង់ចាំទទួល និងធ្វើការសម្របសម្រួលក្នុងការដឹកជញ្ជូនពលករទាំងនោះ ឱ្យបានវិលត្រឡប់មកកាន់មណ្ឌលចត្តាឡីស័កខេត្ត ដែលមានក្រុមទី ៤ ដូចបានកំណត់នៅក្នុងសេចក្តីសម្រេចរបស់រដ្ឋបាលខេត្តបាត់ដំបង និងជាទីសំចតដើម្បីអនុវត្តនូវវិធាននៃការត្រួតពិនិត្យធ្វើតេស្តសុខភាព និងធ្វើការអប់រំពីរបៀបរស់នៅដាច់ដោយឡែកពីក្រុមគ្រួសារ រយៈពេល១៤ថ្ងៃ និងពីវិធានការទប់ស្កាត់ពីការឆ្លងនិងការចម្លងមេរោគកូវីដ-19 ពីមនុស្សម្នាក់ទៅមនុស្សម្នាក់និងទៅក្នុងសហគមន៍រស់នៅរបស់ខ្លួន។
ក្រោយពីការពិនិត្យ មិនមានសញ្ញាគួរឱ្យស ង្ស័ យពីការឆ្លងមេរោគកូវីដ19ទេនោះ ពលករទាំងនោះនឹងបានវិលត្រឡប់ទៅកាន់មូលដ្ឋានស្រុក-ក្រុងរបស់ខ្លួន តាមរយៈក្រុមការងារថ្នាក់ស្រុក មកទទួលយកផ្ទាល់ពីកន្លែងមណ្ឌលចត្តាឡីស័កខេត្ត(វិទ្យាល័យព្រះមុនីវង្ស)។
ក្នុងករណីដែលពលករធ្វើការត្រួតពិនិត្យសុខភាព ស្កែនតេស្កកម្តៅលើសពីកម្រិតកំណត់ ឬមានបញ្ហាសុខភាពនូវចំណុចគួរស ង្ស័ យ ក្រុមគ្រូពេទ្យទីនេះ នឹងឃាត់ទុកមួយរយៈសិន ដោយរង់ចាំយកសំណាកតេស្តត្រួតពិនិត្យ រហូតចេញលទ្ធផលជាមុនសិន មុននិងបញ្ជូនទៅកាន់មូលដ្ឋានក្រុង-ស្រុក នីមួយៗរបស់ខ្លួន។ ប្រសិនធ្វើតេស្តរកឃើញលទ្ឋផល វិជ្ជមានកូវីដ19 ពលករត្រូវបញ្ជូនទៅកាន់មន្ទីរពេទ្យបង្អែកខេត្តបាត់ដំបង ដើម្បីព្យាបាល៕
